ଖଣ୍ଡପଡ଼ା,୧୧ା୧୦(ସ୍ବ.ପ୍ର.): ଦୀର୍ଘ ବର୍ଷ ହେଲା ଉଠା ଜଳସେଚନ ପ୍ରକଳ୍ପ ଅଚଳ ହୋଇପଡିଛି। ବିଦ୍ୟୁତ୍ ତାର ଚୋରି ହେବା ପରେ ଏପରି ଅବସ୍ଥା ସୃଷ୍ଟି ହୋଇଛି। ତଥାପି ୮୦ ହଜାରରୁ ଊର୍ଦ୍ଧ୍ୱ ଟଙ୍କାର ବିଦ୍ୟୁତ୍ ବିଲ୍ ଆସିବା ଘଟଣା ପାଣି ପଞ୍ଚାୟତ ସଦସ୍ୟଙ୍କୁ ଚିନ୍ତାରେ ପକାଇଛି।
ଖଣ୍ଡପଡ଼ା ବ୍ଲ୍ଳକ, ଗଣିଆ ବିଦ୍ୟୁତ୍ ସେକ୍ସନ ଅଧୀନ ସିଧାମୂଳା ପଞ୍ଚାୟତର ସିଧାମୂଳା-୧, ସିଧାମୂଳା-୨, ଘୋଡ଼ାମାରୀଦ୍ୱାର-୧, ଘୋଡ଼ାମାରୀଦ୍ୱାର-୨ ବଳରାମପ୍ରସାଦ-୧ ଓ ଘୋଡ଼ାମାରୀଦ୍ୱାର-୨ ଏପରି ୬ଟି ଉଠାଜଳସେଚନ ପ୍ରକଳ୍ପ ୨୦୧୨ରୁ ପ୍ରତିଷ୍ଠା ହୋଇଥିଲା। ସେଥିରୁ ୩ଟି ପାଣି ପଞ୍ଚାୟତକୁ ହସ୍ତାନ୍ତର କରାଯାଇଥିଲା। ସିଧାମୂଳାଠାରେ ଥିବା ଏକ ସ୍ବତନ୍ତ୍ର ସବ୍ଷ୍ଟେଶନରୁ ଏହି ସବୁ ପ୍ରକଳ୍ପକୁ ବିଦ୍ୟୁତ୍ ସଂଯୋଗ କରାଯାଇଥିଲା। ମାତ୍ର ସେହି ପ୍ରକଳ୍ପଗୁଡିକ ପାଣି ପଞ୍ଚାୟତ ଦାୟିତ୍ୱ ନେବା ପରଠାରୁ ଆଦୌ ଚାଲି ନ ଥିଲା। ଏହାର ୨ ମାସ ପରେ ବିଦ୍ୟୁତ୍ ତାର ଚୋରି ହୋଇଯାଇଥିଲା। ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ପ୍ରକଳ୍ପଗୁଡିକ ଗତ ୮ ବର୍ଷ ହେବ ଅଚଳ ହୋଇ ପଡିରହିଛି। ଅପରପକ୍ଷେ ବଳରାମ ପ୍ରସାଦ-୧ ପ୍ରକଳ୍ପର ନିର୍ମାଣ କାର୍ଯ୍ୟ ୨୦୧୨ରେ ଠିକାଦାରଙ୍କ ଦ୍ୱାରା ସମ୍ପନ୍ନ ହେବାପରେ ବିଦ୍ୟୁତ୍ ସଂଯୋଗ କରାଯାଇ ଉଠା ଜଳସେଚନ ପ୍ରକଳ୍ପର ପାଣି ଟେଷ୍ଟ କରାଯାଇ ଉଠାଜଳ ସେଚନ ନିଗମ ପକ୍ଷରୁ ପ୍ରକଳ୍ପର ବିଲ୍ ପୈଠ କରାଯାଇଥିଲା। ପାଣି ପଞ୍ଚାୟତକୁ ପ୍ରକଳ୍ପ ହସ୍ତାନ୍ତର ପରଠାରୁ ଆଉ ପ୍ରକଳ୍ପଟି ଚାଲି ନ ଥିଲା। ବିଦ୍ୟୁତ୍ ତାର ଚୋରି ହେବା ପରେ ସଂପୃକ୍ତ ପ୍ରକଳ୍ପର ମୋଟର ଓ ପାଇପ୍ ଏବଂ ଆନୁଷଙ୍ଗିକ ସରଞ୍ଜାମଗୁଡ଼ିକ ଖୋଲାଯାଇ ପାଣି ପଞ୍ଚାୟତର ସଭାପତିଙ୍କ ପାଖରେ ମହଜୁଦ ରହିଛି। ମାତ୍ର ବିଭିନ୍ନ ସମୟରେ ବିଦ୍ୟୁତ୍ ବିଲ୍ ଆସୁଛି। କୋଭିଡ୍ କଟକଣା ଯୋଗୁ ଚାଷୀମାନେ ହାତବାନ୍ଧି ବସିଥିବା ବେଳେ ଗତ ଲଘୁଚାପ ଲଗାଣ ବର୍ଷା ଚାଷୀମାନଙ୍କ ମେରୁଦଣ୍ଡକୁ ଭାଙ୍ଗି ଦେଇଛି। ଏହି ସମୟରେ ଟିପିସିଓଡିଏଲ୍ ପକ୍ଷରୁ ପାଣି ପଞ୍ଚାୟତ ସଭାପତି ସନାତନ ଲେଙ୍କାଙ୍କ ପାଖକୁ ଆସନ୍ତା ୧୮ ତାରିଖରେ ୮୦ ହଜାର ୫୧୧ ଟଙ୍କା ବିଦ୍ୟୁତ୍ ବିଲ୍ ପୈଠ କରିବାକୁ ମେସେଜ ଆସିଛି।ଗତ ନଭେମ୍ବରରେ ବଳରାମ ପ୍ରସାଦ-୧ ବରଦାତ୍ରୀ ମା’ମଙ୍ଗଳା ପାଣି ପଞ୍ଚାୟତ ସଭାପତି ସନାତନ ଲେଙ୍କାଙ୍କ ନାମରେ ୭୩ ହଜାର ୨୩୩ ଟଙ୍କା ବିଦ୍ୟୁତ୍ ବିଲ ଆସିଥିଲା।
ଏ ସମ୍ପର୍କରେ ନୟାଗଡ଼ ଉଠାଜଳସେଚନ ଡ଼ିଭିଜନର ନିର୍ବାହୀ ଯନ୍ତ୍ରୀ ନିରଞ୍ଜନ ଦାଶଙ୍କ ସହ ଯୋଗାଯୋଗ କରିବାରେ ବିଭାଗ ପକ୍ଷରୁ ପ୍ରକଳ୍ପ ନିର୍ମାଣ କରାଯାଇ ବିଦ୍ୟୁତ୍ ସଂଯୋଗ ପରେ ପାଣି ଟେଷ୍ଟିଂ କରାଯାଇ ସମ୍ପୃକ୍ତ ପାଣି ପଞ୍ଚାୟତକୁ ହସ୍ତାନ୍ତର କରାଯାଇଛି। ପରବର୍ତ୍ତୀ ସମୟରେ ପ୍ରକଳ୍ପର ସମସ୍ତ ଦାୟିତ୍ୱ (ଜମିକୁ ଜଳସେଚନ କରିବାଠାରୁ ଆରମ୍ଭ କରି ପ୍ରକଳ୍ପର ମରାମତି ଓ ରକ୍ଷଣାବେକ୍ଷଣ ସହିତ ବିଦ୍ୟୁତ୍ ବିଲ୍ ପୈଠ) ପାଣି ପଞ୍ଚାୟତ ଉପରେ ନ୍ୟସ୍ତ ରହିଛି। ବିଭାଗର କୌଣସି ଦାୟିତ୍ୱ ନାହିଁ। ଅପରପକ୍ଷେ ଗଣିଆ ବିଦ୍ୟୁତ୍ ବିଭାଗ କନିଷ୍ଠ ଯନ୍ତ୍ରୀ ଜ୍ଞାନରଞ୍ଜନ ସାହୁଙ୍କ ସହ ଯୋଗାଯୋଗ କରିବାରେ ପ୍ରକଳ୍ପ ନ ଚାଲିଲେ ମଧ୍ୟ ବିଦ୍ୟୁତ୍ ବିଲ୍ ଅଟୋମେଟିକ ଭାବେ ବଢ଼ୁଛି। ଯେତେବେଳେ ସମ୍ପୃକ୍ତ ପ୍ରକଳ୍ପକୁ ଚାଲୁ କରାଯିବ ସେତେବେଳେ ବିଲ୍ ରିଭିଜନ ହୋଇ ମିଟର ରିଡିଂ ଅନୁସାରେ ବିଲ୍ ହେବ ବୋଲି ସାହୁ ସୂଚନା ଦେଇଛନ୍ତି।