ଜୟପୁର ୧୦ା୩: ଗଞ୍ଜେଇ ଚାଲାଣ ଅଭିଯୋଗରେ ଗିରଫ ହୋଇଥିବା ୨ ଅଭିଯୁକ୍ତଙ୍କ ୯୬ଲକ୍ଷ ୫୦ ହଜାର ଟଙ୍କାର ସମ୍ପତ୍ତି ବାଜ୍ୟାପ୍ତ କରାଯାଇଛି। ଏପରି ଘଟଣା ଜିଲାରେ ପ୍ରଥମ ବୋଲି ଜୟପୁର ଏସ୍ଡିପିଓ ଅରୂପ ଅଭିଷେକ ବେହେରା ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ଗତ ଅଗଷ୍ଟ ୯ରେ ଏକ ଟ୍ରକ୍(ଡବ୍ଲ୍ୟୁବି-୦୨୦ଜି-୬୭୩୨) ଓ ବୋଲେରୋ (ଓଡି-୩୩ଡବ୍ଲ୍ୟୁ-୩୬୯୦)କୁ ଜୟପୁର ସଦର ଥାନା ଅଧିକାରୀ ଆଦିତ୍ୟ ମହାକୁଡ଼ ଯାଞ୍ଚ କରିଥିଲେ। ସେଥିରେ ୧୮୧ ପ୍ୟାକେଟରେ ୯୩୭ରୁ ଊର୍ଦ୍ଧ୍ୱ କେଜି ଗଞ୍ଜେଇ ରହିଥିଲା; ଯାହାର ଆନୁମାନିକ ମୂଲ୍ୟ ୫୦ ଲକ୍ଷ ଟଙ୍କା ହେବ। ଏହି ଗଞ୍ଜେଇ କୋରାପୁଟ ଜିଲା ଜଲାପୁଟରୁ ବିହାରକୁ ଚାଲାଣ ହେଉଥିଲା। ଏହି ଘଟଣାରେ ଜଲାପୁଟର ସୁଦର୍ଶନ ପାଣିଗ୍ରାହୀ (୨୮), ସେମିଳିଗୁଡ଼ାର ଚନ୍ଦ୍ରଶେଖର ଖରା(୩୦), ମାଛକୁଣ୍ଡ ଅଞ୍ଚଳର ରଞ୍ଜନ ଗଡ଼ଙ୍ଗା(୨୩) ଓ ଗୋପୀନାଥ ନିରିକା (୨୩)ଙ୍କୁ ଗିରଫ କରାଯାଇଥିଲା। ସେମାନଙ୍କଠାରୁ ୭ଟି ମୋବାଇଲ, ୩ ଲକ୍ଷ୧୦ ହଜାର ଟଙ୍କା ସହ ଚାଲାଣରେ ବ୍ୟବହୃତ ହେଉଥିବା ଟ୍ରକ୍ ଓ ବୋଲେରୋକୁ ଜବତ କରାଯାଇଥିଲା। ତଦନ୍ତ ବେଳେ ଜଲାପୁଟର ଗୋପୀନାଥ ନିରିକାଙ୍କ ନାମରେ ୬୭ ଲକ୍ଷ ୬୯ ହଜାର ଟଙ୍କା ସହ ଏକ ବୋଲୋର ଓ ସୁଦର୍ଶନ ପାଣିଗ୍ରାହୀ ନାମରେ ୨୧ ଲକ୍ଷ ୮୦ ହଜାର ଟଙ୍କା ଥିବା ପୋଲିସ ଜାଣିବାକୁ ପାଇଥିଲା। ବାହାର ରାଜ୍ୟର ଗଞ୍ଜେଇ ବ୍ୟବସାୟୀମାନେ ସେମାନଙ୍କ ଆକାଉଣ୍ଟରେ ଏହି ଟଙ୍କା ଡିପୋଜିଟ କରିଥିଲେ। ଏନେଇ ଏନ୍ଡିପିସି କୋର୍ଟ କୋଲକାତାର ଦ୍ୱାରସ୍ଥ ହୋଇଥିଲେ ା ଗତ ଫେବୃୟାରୀ ୨୪ରେ ଉକ୍ତ ମାମଲାର ତଦନ୍ତକାରୀ ଅଫିସର ଆଦିତ୍ୟ ମହାକୁଡଙ୍କଠାରୁ କୋର୍ଟର ଆଇନଜୀବୀ ଭିଡିଓ କନ୍ଫରେନ୍ସରେ ତଥ୍ୟ ଗ୍ରହଣ କରିଥିଲେ। କୋର୍ଟ ଏହି ମାମଲାର ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତିକରି ମାର୍ଚ୍ଚ ୪ରେ ସମ୍ପତ୍ତି ବାଜ୍ୟାପ୍ତ ନିଷ୍ପତ୍ତି ନିର୍ଦ୍ଦେଶ ଦେଇଥିଲେ।