ବାରିପଦା ଅଫିସ,୪ ।୨ ସରକାରଙ୍କ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ନିର୍ଦ୍ଦେଶନୁସାରେ ଚଳିତ ଖରିଫ ଋତୁରେ ମୟୂରଭଞ୍ଜ ଜିଲାରୁ ଧାନ କିଣା ଆରମ୍ଭ ହୋଇଛି। ଜିଲାର ଶାମାଖୁଣ୍ଟା ଲ୍ୟାମ୍ପସ୍ ଜରିଆରେ ପଞ୍ଜୀକୃତ ଚାଷୀମାନଙ୍କ ଠାରୁ ସୋମବାର ଧାନ କିଣାଯାଇଛି। ଜିଲାପାଳ ବିନୀତ ଭରଦ୍ୱାଜ ଆନୁଷ୍ଠାନିକ ଭାବେ ଧାନ ମଣ୍ଡି ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଜିଲା ମୁଖ୍ୟ ଯୋଗାଣ ଅଧିକାରୀ ସୁରେନ୍ଦ୍ର କୁମାର ପାଢ଼ୀ, ସଦର ଯୋଗାଣ ଅଧିକାରୀ ଦିଲ୍ଲୀପ କୁମାର ପାଣିଗ୍ରାହୀ, ଡିଆର୍ସିଏସ୍ ଦମୟନ୍ତି ସିଂ, ଏସ୍ଆର୍ସିଏସ୍ ତୁଷାରକାନ୍ତ ମହାନ୍ତି, ଆର୍ଏମ୍ସି ସମ୍ପାଦକ ସୁଧାକର ସାହୁ, ଶାମାଖୁଣ୍ଟା ବିଡିିଓ ଓ ତହସିଲଦାର ପ୍ରମୁଖ ଉପସ୍ଥିତ ଥିଲେ। ଚଳିତ ବର୍ଷ ଜିଲାରୁ ୧୪ ମିଲରଙ୍କ ଜରିଆରେ ମୋଟ ୧୮ ଲକ୍ଷ ୫୮ ହଜାର ୭୯୯.୭୫ କୁଇଣ୍ଟାଲ୍ ଧାନ ସଂଗ୍ରହ ଲକ୍ଷ୍ୟ ରଖାଯାଇଛି। ପ୍ରଥମ ପର୍ଯ୍ୟାୟରେ ୧୪ଲକ୍ଷ ୨୬ହଜାର ୪୭୦.୫୮ କୁଇଣ୍ଟାଲ୍ ଧାନ କିଣା ହେବ। ଏ ନେଇ ଜିଲାର ୫୨ଟି ପ୍ରାଥମିକ ସମବାୟ ସମିତି (ପ୍ୟାକ୍ସ) ଓ ଲ୍ୟାମ୍ପସ୍ ଅଧୀନରେ ଥିବା ୧୦୧ଟି କେନ୍ଦ୍ର(ମଣ୍ଡି)ଜରିଆରେ ଧାନ କ୍ରୟ କରାଯିବ। ନିର୍ଦ୍ଧାରିତ ସମୟ ସୀମା ମଧ୍ୟରେ ଜିଲାର ମୋଟ ୭୧ହଜାର ୮୭୭ଚାଷୀ ନାମ ପଞ୍ଜୀକରଣ କରିଥିବା ବେଳେ ସେଥି ମଧ୍ୟରେ ୮୭୭ଜଣ ଭାଗ ଚାଷୀ ରହିଛନ୍ତି। ଏହି ଅବସରରେ ଜୟଗୋପାଲ ମହାନ୍ତ, ପଲ୍ଲବ କୁମାର ବେହେରା ଓ ଭରତ ଚନ୍ଦ୍ର ମହାନ୍ତ ପ୍ରମୁଖ ୩ ପଞ୍ଜୀକୃତ ଚାଷୀ ୧୮୦ କୁଇଣ୍ଟାଲ ଧାନ ବିକ୍ରି କରିଛନ୍ତି।