ବୋଲଗଡ଼,୧୮ା୪(ଡି.ଏନ୍.ଏ.): କେନ୍ଦ୍ର ସରକାର ରେଲଓ୍ବେ ଓଭରବ୍ରିଜ ନିର୍ମାଣ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ତେବେ ବିଭାଗୀୟ ଅଧିକାରୀଙ୍କ ତଦାରଖ ଅଭାବରୁ କାର୍ଯ୍ୟାଦେଶ ପାଇଥିବା ଠିକାସଂସ୍ଥାମାନେ ନିମ୍ନମାନର କାର୍ଯ୍ୟ କରୁଥିବା ଜଣାପଡ଼ିଛି। ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ସାନପଦର ଗ୍ରାମ ଦେଇ ଯାଇଥିବା ରେଳପଥ ଉପରେ ହୋଇଥିବା ଓଭରବ୍ରିଜ ରାସ୍ତା ନିମ୍ନମାନର ଯୋଗୁ ମରଣଯନ୍ତା ପାଲଟିଛି, ଯାହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେବା ସହ ରାସ୍ତା ମରାମତି ପାଇଁ ଦାବି ହେଉଛି।
ଯେ, ପ୍ରାୟ ୨ବର୍ଷ ପୂର୍ବେ ଏହି ରେଲଓ୍ବେ ଓଭରବ୍ରିଜ ରାସ୍ତା କାମ ସମ୍ପୂର୍ଣ୍ଣ ହୋଇଥିବା ବେଳେ ଏହାକୁ ଦେଢ ବର୍ଷ ହେବ ଜନସାଧାରଣଙ୍କ ବ୍ୟବହାର ପାଇଁ ଅନୁମତି ମିଳିଥିଲା। ଉକ୍ତ ସମୟରେ ରାସ୍ତାର ଉଭୟ ପାଶର୍ବ ଦବି ଯାଇଥିବା ନେଇ ଗ୍ରାମବାସୀଙ୍କ ବିରୋଧ ପରେ ନିର୍ମାଣକାରୀ ସଂସ୍ଥା ଏହା ଉପରେ ମେଣ୍ଟାଲ ଓ ବଜୁରି ପକାଇ ସମତୁଲ କରିଥିଲା। ପୁନର୍ବାର ଏବେ ଏହି ରାସ୍ତା ଦବିଯିବାରୁ ରାସ୍ତାର ଉଭୟ ପାଶର୍ବରେ ଚିପସ ଓ ବଜୁରି ଗୁଣ୍ଡ ପକାଯାଇ ରାସ୍ତା ସମତୂଲ କରାଯାଇଛି। ଏହା ରାସ୍ତାରେ ନ ମିଶି ଇତସ୍ତତଃ ହୋଇ ପଡିଥିବାରୁ ଯାତାୟାତରେ ବାଧା ସୃଷ୍ଟି ହେବା ସହ ଦୁର୍ଘଟଣା ଘଟୁଥିବା ନଜିର ରହିଛି। ଏହି ରାସ୍ତା ବୋଲଗଡ଼ ବ୍ଲକ ଅଞ୍ଚଳର ପିଚୁକୁଳି, ସାନପଦର ଓ ଗୋପାଳପୁର ପଞ୍ଚାୟତ ପାଇଁ ବହୁ ଗୁରୁତ୍ୱ ବହନ କରୁଥିବା ବେଳେ ଚିକିତ୍ସାକେନ୍ଦ୍ର, ମହାବିଦ୍ୟାଳୟକୁ ଏହି ରାସ୍ତା ଦେଇ ଯାଇଥାନ୍ତି। ଏ ସମ୍ପର୍କରେ ଠିକାଦାର ସଂସ୍ଥା ପ୍ରକଳ୍ପ ପରିଚାଳକ ଓ ଇଷ୍ଟକୋଷ୍ଟ ରେଲଓ୍ବେର ସାଧାରଣ ନିର୍ମାଣ ବିଭାଗ ଯନ୍ତ୍ରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ପ୍ରତିକ୍ରିୟା ମିଳିପାରି ନାହିଁ। ଅନ୍ୟପଟେ ଏହି ରାସ୍ତାକୁ ତୁରନ୍ତ ମରାମତି କରିବା ପାଇଁ ସାନପଦର ସରପଞ୍ଚ ବୈକୁଣ୍ଠ ନାଥ ସ୍ବାଇଁ ଦାବି କରିଛନ୍ତି।