ଚନ୍ଦାହାଣ୍ଡି,୨୬।୬(ଦିଲ୍ଲୀପ ଦାସ): ଜନସାଧାରଣଙ୍କ ଗମନାଗମନ ପାଇଁ ରାଜ୍ୟ ଏବଂ କେନ୍ଦ୍ର ସରକାର କୋଟି କୋଟି ଟଙ୍କା ଖର୍ଚ୍ଚ କରି ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ରାସ୍ତା ତିଆରି କରିଛନ୍ତି।
ବିଭାଗୀୟ ଯନ୍ତ୍ରୀ ଏବଂ ଠିକାଦାରଙ୍କ ଖାମଖିଆଲି ମନୋଭାବ ଯୋଗୁ ରାସ୍ତାରେ ପକା ଯାଇଥିବା ପିଚୁ ବର୍ଷାରେ ଧୋଇ ଯାଇଛି। ନିର୍ମାଣାଧୀନ କଲଭର୍ଟ ଅସମ୍ପୂର୍ଣ ହୋଇ ପଡ଼ିଥିବା ଯୋଗୁ ବର୍ଷା ମାସରେ ଲୋକେ ନାହିଁ ନଥିବା ହଇରାଣ ହେଉଛନ୍ତି। ଏହିଭଳି ଦେଖିବା କୁ ମିଳିଛି ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ସାଲେବିଡିରୁ ବରିଗୁଡା ଆର୍ଡି ବିଭାଗ ନିର୍ମାଣଧୀନ ପ୍ରଧାନମନ୍ତ୍ରୀ ରାସ୍ତାରେ। ଠିକାଦାର ଏବଂ ବିଭାଗୀୟ ଯନ୍ତ୍ରୀଙ୍କ ଖାମଖିଆଲ ମନୋଭାବ ଯୋଗୁ ପହିଲି ବର୍ଷାରେ ପିଚୁ ଉଠିଛି ବୋଲି ଲୋକେ ଅଭିଯୋଗ କରିଛନ୍ତି। ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେଇ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି ହୋଇଛି।
ସୂଚନା ମୁତାବକ ଚନ୍ଦାହାଣ୍ଡି ସଦରକୁ ଅନକାବେଡା, ଘୁଙ୍ଗୁଟିପଡା, ନୂଆପଡା ଭାୟା ସାଲେବିଡି, ବାରୀଗୁଡା ଦେଇ ଯାତାୟତ କରିବା ପାଇଁ ୨୦୨୧/୨୨ ଆର୍ଥିକ ବର୍ଷରେ ୫୩୭.୭୩ ଲକ୍ଷ ଅଟକଳ ମୂଲ୍ୟର ପ୍ରଧାନମନ୍ତ୍ରୀ ସଡ଼କ ଯୋଜନା ମଞ୍ଜୁର ହୋଇଥିଲା। ଏହାର ନିର୍ମାଣ ଦାୟିତ୍ୱ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର କରାଯାଇଥିଲା। ନିର୍ମାଣ ପାଇ ନୂଆପଡା ଜିଲାର ଏକ କମ୍ପନୀକୁ ଠିକା ଦାୟିତ୍ୱ ଦିଆଯାଇଥିଲା। ରାସ୍ତା ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲୁଛି। ରାସ୍ତାରେ ଥିବା କଲଭର୍ଟ କାମ ଅସମ୍ପୂର୍ଣ ଥିବାରୁ ଲୋକେ ଯାତାୟତରେ ଅସୁବିଧା ଭୋଗୁଛନ୍ତି। ଏପଟେ ସାଲେବିଡିରୁ ଜୁନାପାଣି ରାସ୍ତା ପାଖରେ ପକା ଯାଇଥିବା ପିଚୁ ପ୍ରଥମ ବର୍ଷାରେ ଧୋଇଯାଇଛି। ଏଥିସହ ଏହାର ଦୁଇ ପାର୍ଶ୍ୱରେ ପକା ଯାଇଥିବା ମାଟି ଧସି ଆଁ କରିବାକୁ ବସିଲାଣି l ଏହାକୁ ନେଇ ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖା ଦେଇଛି। ଏଥିସହ ଏହାର ଉଚିତ ପଦକ୍ଷେପ ନେବାକୁ ଦାବି ହୋଇଛି। ଏ ସମ୍ପର୍କରେ ବିଭାଗୀୟ ଏସ୍ଡିଓ ଅର୍ଜୁନ ମୁଦୁଲିଙ୍କୁ ପଚାରିବାରୁ ରଜପର୍ବ ସମୟରେ ରାସ୍ତାରେ ପିଚୁ ପକା ଯାଇଥିଲା। ଏହା ଜମିବା ପାଇଁ ମାସେ ସମୟ ନେଇଥାଏ। ଏହାପୂର୍ବରୁ ବର୍ଷା ହେବାରୁ ପିଚୁ ଉଠି ଯାଇଛ। ପିଚୁ ଉଠିଥିବା ରାସ୍ତାରେ ପୁନଃ ପିଚୁ ପକାଯିବ ବୋଲି ସେ କହିଛନ୍ତି। ଏ ଦିଗରେ ଜିଲା ପ୍ରଶାସନ ତୁରନ୍ତ ଦୃଷ୍ଟି ଦେଇ ପଦକ୍ଷେପ ନେବା ଲୋକେ ଦାବି କରିଛନ୍ତି।