ରାଜନଗର,୧ା୪(ଭାସ୍କର ରାଉତରାୟ): ସରକାରୀ ଗାଡ଼ିରେ ଡ୍ୟୁଟି ଛାଡି ବାବୁ କରୁଛନ୍ତି ଭ୍ରମଣ। ବିନା ଛୁଟିରେ କାହାକୁ ନ ଜଣାଇ ସରକାରୀ ଗାଡ଼ି ନେଇ ପରିବାର ସଦସ୍ୟଙ୍କ ସହ କଟକ ଓ ଭୁବନେଶ୍ୱର ଘୁରି ବୁଲିବା ସହ ବିଳମ୍ବିତ ରାତ୍ରି ଯାଏଁ ଭୁବନେଶ୍ୱର ଏୟାରପୋର୍ଟରେ ରହିଥିଲେ।
ସରକାରୀ ଗାଡ଼ି ବିଳମ୍ବିତ ରାତ୍ରିରେ ଏୟାରପୋର୍ଟରେ ପାର୍କିଂ କରିବା ଓ ବାହାରିବାର ଟିକେଟ ଏବେ ସୋସିଆଲ ମିଡ଼ିଆରେ ଘୁରି ବୁଲୁଛି। ବନବିଭାଗର ଏହି ରେଞ୍ଜ ଅଫିସର ଜଣଙ୍କ ଦୁଇଦିନ ଧରି ସରକାରୀ ଗାଡ଼ି ନେଇ କିପରି ନିଜ ରେଞ୍ଜ ଏରିୟାଠାରୁ ୧୪୦ କିମି ଦୂରକୁ ଗଲେ ଓ ପରିବାର ସଦସ୍ୟଙ୍କ ସହ ବୁଲିଲେ, ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି।
ସୂଚନା ଅନୁଯାୟୀ, ରାଜନଗର ବନବିଭାଗ ରେଞ୍ଜ କାର୍ଯ୍ୟାଳୟରେ ପଟ୍ଟାମୁଣ୍ଡାଇ କୁନ୍ଦୁପୁର ଅଞ୍ଚଳର ଏକ ବୋଲେରୋ ଗାଡ଼ି ଭଡ଼ାରେ ଲାଗିଛି। ଗାଡ଼ିରେ ତେଲ ପୋଡ଼ିବା ଓ ମାସିକ ଭଡା ସରକାରୀ ତହବିଲରୁ ଦିଆଯାଉଛି। ମାତ୍ର ଏହି ଗାଡ଼ିକୁ ରାଜନଗର ରେଞ୍ଜର ରେଞ୍ଜ ଅଫିସର ବ୍ୟକ୍ତିଗତ କାର୍ଯ୍ୟରେ ବହୁ ସମୟରେ ବ୍ୟବହାର କରିଥାଆନ୍ତି। ଚଳିତମାସ ୨୭ ତାରିଖ ବୁଧବାର ଦିନ ରେଞ୍ଜ ଅଫିସର ଚିତ୍ତ ରଞ୍ଜନ ବେଉରା ଏହି ସରକାରୀ ଗାଡ଼ିକୁ ନେଇ ତାଙ୍କ ଘରକୁ ଯାଇଥିଲେ। ସେଠାରୁ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦରକୁ ଯାଇଥିଲେ। ବିମାନ ବନ୍ଦରରେ ପହଞ୍ଚତ୍ବା ପରେ ରାତି ୧୧ଟା ୩୨ରେ ଗାଡ଼ି ପାର୍କିଂ କରିଥିଲେ। ତାଙ୍କ ପୁଅ ବିମାନରୁ ଓହ୍ଲାଇବା ପରେ ତାଙ୍କୁ ଏହି ସରକାରୀ ଗାଡ଼ିରେ ଆଣି ରାତି ୧୧ଟା ୪୭ରେ ବିମାନ ବନ୍ଦରରୁ ବାହାରି ଆସିଥିଲେ। ବିମାନ ବନ୍ଦରରେ ପାର୍କିଂ ଟିକେଟ୍ ଓ ବାହାରିବା ସମୟର ଅନଲାଇନ ଟିକେଟ ଏବେ ସୋସିଆଲ ମିଡ଼ିଆରେ ଭାଇରାଲ ହେଉଛି। ରେଞ୍ଜ ଅଫିସର ବିମାନ ବନ୍ଦରରୁ ପୁଅକୁ ଧରି ସରକାରୀ ଗାଡ଼ିରେ ବାହାରି ନିଜ ଘରକୁ ଫେରିଥିଲେ। ୨୯ ତାରିଖ ଦିନ ପରିବାର ସଦସ୍ୟଙ୍କ ସହ ବିଭିନ୍ନ ସ୍ଥାନ ବୁଲାବୁଲି କରିବା ପରେ ରାଜନଗର ରେଞ୍ଜ କାର୍ଯ୍ୟାଳୟକୁ ଫେରିଥିଲେ। ବୁଧବାର ଓ ଗୁରୁବାର ଦିନ ସରକାରୀ କାର୍ଯ୍ୟ ଦିବସରେ ରେଞ୍ଜ ଅଫିସର ସରକାରୀ ଭାବେ ଛୁଟି ନେଇଥିଲେ କି? ଯଦି ଛୁଟି ନେଇ ନ ଥିଲେ ତେବେ କଟକ, ଭୁବନେଶ୍ୱରରେ କାହିଁକି ବୁଲୁଥିଲେ। ଏ ସମ୍ପର୍କରେ ରେଞ୍ଜ ଅଫିସର ବେଉରାଙ୍କୁ ପଚାରିବାରୁ ସେ ୨୭ ତାରିଖ ଦିନ ଭୁବନେଶ୍ୱର ଏୟାରପୋର୍ଟ ଯାଇଥିବା ସ୍ବୀକାର କରିଛନ୍ତି।
ଏ ସମ୍ପର୍କରେ ଏସିଏଫ୍ ଗଗନ ବିହାରୀ ମଲିକଙ୍କୁ ପଚାରିବାରୁ ସରକାରୀ ଗାଡ଼ି ନେଇ ଘରୋଇ କାମରେ ଯିବା କଥା ନୁହେଁ, ଏ ସମ୍ପର୍କରେ ଡିଏଫ୍ଓ ଯାହା ପଦକ୍ଷେପ ନେବେ ବୋଲି ସେ କହିଛନ୍ତି।