ଭଦ୍ରକ ଅଫିସ,୨୫।୯: ମହିଳା ଓ ଶିଶୁମାନଙ୍କ ସୁରକ୍ଷା, ବିକାଶ ପାଇଁ ଉଭୟ କେନ୍ଦ୍ର ଏବଂ ରାଜ୍ୟ ସରକାର ବିଭିନ୍ନ ଯୋଜନା ପ୍ରଣୟନ କରୁଛନ୍ତି। ମହିଳା ସଶକ୍ତୀକରଣ ଓ ସଚେତନତା ନେଇ ବିଭିନ୍ନ ପଦକ୍ଷେପ ନିଆଯାଉଛି। ଏସବୁ ଯୋଜନା ପାଇଁ କୋଟି କୋଟି ଟଙ୍କା ସରକାର ଖର୍ଚ୍ଚ କରୁଛନ୍ତି। କିନ୍ତୁ ଏତେସବୁ ପରେ ବି ଭଦ୍ରକ ଜିଲାରେ ମହିଳା ଓ ଶିଶୁ ନିର୍ଯାତନା ବଢ଼ିବାରେ ଲାଗିଛି। ଜିଲା ଆରକ୍ଷୀ ବିଭାଗ ଅଧୀନ ମହିଳା ଶିଶୁ ଡେସ୍କ ପକ୍ଷରୁ ମିଳିଥିବା ତଥ୍ୟ ଅନୁସାରେ, ୨୦୧୬ରୁ ୨୦୨୨ ଜୁନ ଶେଷ ପର୍ଯ୍ୟନ୍ତ ମୋଟ ୧୮,୧୫୫ ମାମଲା ବିଭିନ୍ନ ଥାନାକୁ ଆସିଥିବା ବେଳେ ସେଥିମଧ୍ୟରୁ ୮୧୩୯ କେଶ୍ ରୁଜୁ ହୋଇଛି। ୧୦,୦୧୬ ମାମଲାର ଫଇସଲା କରାଯାଇଛି। ୨୦୧୬ରେ ୧୯୫୩, ୨୦୧୭ରେ ୨୫୪୪, ୨୦୧୮ରେ ୨୪୭୭, ୨୦୧୯ରେ ୨୪୭୧, ୨୦୨୦ରେ ୨୭୦୧, ୨୦୨୧ରେ ୨୯୩୧ ଓ ୨୦୨୨ ଜୁନ୍ ଶେଷ ସୁଦ୍ଧା ୩୦୭୮ ମାମଲା ଥାନାକୁ ଆସିଛି। ଏହାବ୍ୟତୀତ ଅନେକ ମାମଲା ଥାନାକୁ ନ ଆସି ରଫାଦଫା ହୋଇଯାଉଥିବା ସୂଚନା ରହିଛି।
ଅସହାୟ ନିର୍ଯାତିତ ମହିଳା ଓ ଶିଶୁଙ୍କ ଥଇଥାନ ପାଇଁ ଜିଲାରେ ଆସିଆନା, ଫେଲୋଶିପ, ୱାନଷ୍ଟପ ସେଣ୍ଟର ସଖୀ ଓ ଉଜାଲା ହୋମ୍ ଭଳି ୪ ସଙ୍ଗଠନ କାର୍ଯ୍ୟ କରୁଛି। ଏହି ସଙ୍ଗଠନଗୁଡ଼ିକ ଅଧୀନରେ ସୁଧାରଗୃହ ଓ ମୁକ୍ତାଶ୍ରୟ କେନ୍ଦ୍ର ରହିଥିବା ବେଳେ ସେଠାରେ ଅସହାୟ, ନିରାଶ୍ରୟ, ନିର୍ଯାତିତା, ଅପହୃତା ନାବାଳିକା, ସ୍ବାମୀ ପରିତ୍ୟକ୍ତାମାନଙ୍କୁ ଆଶ୍ରୟ ଦିଆଯିବା ସହ ସେମାନଙ୍କୁ ଆତ୍ମନିର୍ଭରଶୀଳ ଓ ସ୍ବାବଲମ୍ବୀ କରିବା ପାଇଁ ବିଭିନ୍ନ ପ୍ରଶିକ୍ଷଣ ବ୍ୟବସ୍ଥା କରାଯାଇଛି। ସ୍ବାମୀ ସ୍ତ୍ରୀ ମଧ୍ୟରେ ବିବାଦ, ପ୍ରେମବିବାହ ଆଦି ବହୁ ମାମଲାରେ କାଉନସେଲିଂ କରାଯାଇ ସମସ୍ୟାର ସମାଧାନ କରାଯାଉଛି। ଏହି ସଙ୍ଗଠନଗୁଡ଼ିକ ମଧ୍ୟ ବହୁ ମାମଲା ନିଜ ହାତକୁ ନେଇ ସମାଧାନ କରିଛନ୍ତି। ୨୦୧୯ ଅକ୍ଟୋବରରେ ଆରମ୍ଭ ହୋଇଥିବା ୱାନଷ୍ଟପ ସେଣ୍ଟର ସଖୀ ନିର୍ଯାତିତା ମହିଳା ଓ ବାଳିକାମାନଙ୍କୁ ପୋଲିସ ସହାୟତା, ଡାକ୍ତରୀ ସହାୟତା, ଆଇନଗତ ସହାୟତା, ମନସ୍ତାତ୍ୱିକ ଓ ସାମାଜିକ ପରାମର୍ଶ ପ୍ରଦାନ ଆଦି ଦିଗରେ ସହାୟତା କରୁଛି।