ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ଶୁକ୍ରବାର ବ୍ୟାଙ୍କିଙ୍ଗ୍ ବ୍ୟବସ୍ଥା ଓ ନିୟମାବଳୀ ସମ୍ପର୍କିତ ଏକ ସମୀକ୍ଷା ବୈଠକ କରିଥିଲେ। ଏଥିରେ ବ୍ୟାଙ୍କରେ ବିଭିନ୍ନ କାରଣ ଯୋଗୁ ଠିକ୍ ସମୟରେ ଅଭିଯୋଗ ନ ହୋଇପାରିବାରୁ ଅନେକ ସମସ୍ୟା ଉପୁଜିଥିବା ଲକ୍ଷ୍ୟ କରାଯାଇଛି। ଏହାକୁ ନଜରରେ ରଖି ଆର୍ବିଆଇ ଅବଧି ଜମା (ଏଫ୍ଡି) ନିୟମରେ କିଛିଟା ପରିବର୍ତ୍ତନ କରିଛନ୍ତି। ଏଥିରେ ଅବଧି ପୂରା ହେବା ପରେ ଜମା ଥିବା ଟଙ୍କା ଲାଗି ପୂର୍ବର ସୁଧ ନିୟମ ବଦଳିଯାଇଛି। ନୂଆ ନିୟମ ଅନୁସାରେ ମାଚୁରିଟି ପୂରଣ ହେବା ପରେ ଯଦି ଜମା ରାଶି ଉପରେ ଦାବି ନ କରାଯାଏ ତେବେ ତା’ ଉପରେ କମ୍ ସୁଧ ପ୍ରଦାନ କରାଯିବ। ପୂର୍ବରୁ ଏପରି ରାଶି ଉପରେ ସଞ୍ଚୟ ଜମାଖାତାରେ ମିଳୁଥିବା ସୁଧ ଧାର୍ଯ୍ୟ କରି ଦିଆଯାଉଥିଲା। ହେଲେ ଏବେ ଆଉ ସେପରି ହେବ ନାହିଁ ବୋଲି ଆର୍ବିଆଇ ପକ୍ଷରୁ ଏକ ନିର୍ଦ୍ଦେଶାବଳୀ ଜାରି କରାଯାଇଛି। ଏଥିରେ ଜମା ଅବଧି ପୂରଣ ହେବା ପରେ ପଡ଼ି ରହିଥିବା ଅନ୍କ୍ଲେମଡ ଫଣ୍ଡ ଉପରେ ସଞ୍ଚୟ ଜମା ରାଶି ମିଳିବାକୁ ଥିବା ସୁଧହାର ଯାହା କମ୍ ହେବ ବୋଲି ଉଲ୍ଲେଖ ରହିଛି। ଆର୍ବିଆଇ ପକ୍ଷରୁ ଦିଆଯାଇଥିବା ଏଫ୍ଡି ସମ୍ପର୍କିତ ଏହି ନିୟମାବଳୀକୁ ଦେଶର ସମସ୍ତ ବାଣିଜି୍ୟକ ବ୍ୟାଙ୍କ ସମେତ ସ୍ମଲ୍ ଫାଇନାନ୍ସ ବ୍ୟାଙ୍କ, କୋଅପରେଟିଭ ବ୍ୟାଙ୍କ ଓ ସ୍ଥାନୀୟ ଆଞ୍ଚଳିକ ବ୍ୟାଙ୍କ ଲାଗି ମଧ୍ୟ ପ୍ରଯୁଜ୍ୟ ହେବ ବୋଲି କୁହାଯାଇଛି।