ବ୍ରହ୍ମପୁର ଅଫିସ,୧୭।୪: ବ୍ରହ୍ମପୁର ସହରରେ ନକଲି ପୋଲିସର ପ୍ରାଦୁର୍ଭାବ ଦେଖିବାକୁ ମିଳିଛି। ଏଭଳି ଏକ ଘଟଣା ସେଲ୍ସଟ୍ୟାକ୍ସ ଛକରେ ଗତ ୩ ତାରିଖ ସ୍ପଷ୍ଟ ଦିବାଲୋକରେ ଘଟିଥିଲା। ରାସ୍ତାରେ ଚାଲି ଚାଲି ଯାଉଥିବା ସୁଭଦ୍ରା ମିଶ୍ରଙ୍କୁ ପୋଲିସ ପରିଚୟ ଦେଇ ତାଙ୍କ ସୁନା ଗହଣା ଠକି ନେଇଥିଲେ। ଘଟଣାର ଦୁଇ ସପ୍ତାହ ବିତିଯାଇଥିଲେ ମଧ୍ୟ ଅସଲି ପୋଲିସ ଏଯାବତ ନକଲି ପୋଲିସକୁ କାବୁ କରିବାରେ ବିଫଳ ରହିଛି। ଅଯୋଧ୍ୟାନଗରରେ ରହୁଥିବା ଅବସରପ୍ରାପ୍ତ ଶିକ୍ଷୟିତ୍ରୀ ମିଶ୍ର ସେଲ୍ସଟ୍ୟାକ୍ସ ଛକକୁ ଜେରକ୍ସ କରିବାକୁ ଆସିଥିବା ବେଳେ ଦୁଇ ଜଣ ଯୁବକ ନିଜକୁ ପୋଲିସ ପରିଚୟ ଦେଇ ଅଟକାଇ ଥିଲେ। ଆଗରେ ଜଣେ ବ୍ୟକ୍ତିଙ୍କୁ ହତ୍ୟା କରାଯାଇଛି, ତେଣୁ ସେ ପିନ୍ଧିଥିବା ସୁନା ଅଳଙ୍କାର ଖୋଲି ବ୍ୟାଗ ଭିତରେ ରଖିଦିଅନ୍ତୁ ବୋଲି ନକଲି ପୋଲିସ କହିଥିଲା। ଆଉ କୌଶଳକ୍ରମେ ସେହି ସୁନା ଅଳଙ୍କାର ତାଙ୍କଠାରୁ ଛଡାଇ ନେଇ ସେମାନେ ଘଟଣାସ୍ଥଳରୁ ଚମ୍ପଟ ମାରିଥିଲେ। ସୁଭଦ୍ରାଙ୍କ ଅଭିଯୋଗକ୍ରମେ ବୈଦ୍ୟନାଥପୁର ପୋଲିସ ନଂ. ୧୦୧/୨୨ ରେ ଏକ ମାମଲା ରୁଜୁ କରିଥିଲା। ପରେ ସେହି ଅଞ୍ଚଳରେ ଲାଗିଥିବା ସିସିଟିଭି ଫୁଟେଜକୁ ଆଧାର କରି ତଦନ୍ତ କରିଥିଲା।
ଆଜକୁ ପ୍ରାୟ ୩ ବର୍ଷ ତଳେ ନକଲି ପୋଲିସ ସହରର ବିଭିନ୍ନ ସ୍ଥାନରୁ ମହିଳା ଓ ପୁରୁଷଙ୍କୁ ଟାର୍ଗେଟ କରି ସେମାନଙ୍କର ଅଳଙ୍କାର ଲୁଟି ଫେରାର ହେବାରେ ସକ୍ଷମ ହେଉଥିଲା। ସେହି ସମୟରେ ବାରମ୍ବାର ଏଭଳି ଘଟଣା ଘଟୁଥିଲେ ମଧ୍ୟ ଅସଲି ପୋଲିସ ନକଲି ପୋଲିସକୁ ଧରିବାରେ ବିଫଳ ହୋଇଥିଲା। ୨୦୧୮ ମାର୍ଚ୍ଚରୁ ୨୦୧୯ ସେପ୍ଟେମ୍ବର ଭିତରେ ନକଲି ପୋଲିସ ଗ୍ୟାଙ୍ଗ ବ୍ରହ୍ମପୁର ସହରର ୮ ଜଣଙ୍କଠାରୁ ସୁନା ଅଳଙ୍କାର ଅଭିନବ ଉପାୟରେ ଠକି ନେଇଥିଲା। ଗ୍ୟାଙ୍ଗର ସଦସ୍ୟମାନେ ରାସ୍ତାରେ ଚାଲି ଚାଲି ଯାଉଥିବା ସହରବାସୀଙ୍କୁ ଟାର୍ଗେଟ କରୁଥିଲେ। ନିଜକୁ ପୋଲିସ ପରିଚୟ ଦେଇ ଲୋକଙ୍କୁ ଅଟକାଇ ଆଗରେ ପୋଲିସ ଯାଞ୍ଚ ଚାଲିଥିବା କହି ସୁନା ଅଳଙ୍କାର ଖୋଲି ଦେବାକୁ ପରାମର୍ଶ ଦେଉଥିଲେ। ପୋଲିସ କହୁଥିବା ଭାବି ଲୋକମାନେ ସୁନା ଅଳଙ୍କାର ଖୋଲିବା ପରେ କୌଶଳକ୍ରମେ ସେହି ଅଳଙ୍କାର ଠକି ନେଇ ଗ୍ୟାଙ୍ଗର ସଦସ୍ୟମାନେ ଫେରାର ହୋଇଯାଉଥିଲେ। ଏପରିକି ଏହି ନକଲି ପୋଲିସ କିଛି ଲୋକଙ୍କୁ ଅଳଙ୍କାର ବଦଳରେ ଗୋଡି ଓ ପଥର ମଧ୍ୟ ହାତରେ ଧରାଇ ଦେଇ ସେତେବେଳେ ଚମ୍ପଟ ମାରିଥିଲେ। ସେତେବେଳେ ଏହି ଘଟଣା ଅସଲି ପୋଲିସର ଚିନ୍ତା ବଢାଇ ଥିଲା। ୨୦୧୯ ଅକ୍ଟୋବର ୨ରେ ନକଲି ପୋଲିସ ଗ୍ୟାଙ୍ଗର ମାଷ୍ଟରମାଇଣ୍ଡ ସିକନ୍ଦର ଅଲ୍ଲୀଙ୍କୁ ଗୋଷାଣୀନୂଆଗଁା ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଥିଲା। ଏହା ପରେ ସହରରେ ଆଉ ନକଲି ପୋଲିସକୁ ଦେଖିବାକୁ ମିଳିନଥିଲା। ଗତ ଏପ୍ରିଲ ୩ରେ ପୁଣି ଥରେ ସହରରେ ନକଲି ପୋଲିସ ଉଭା ହୋଇଥିଲେ।