ନୟାଗଡ଼ ଅଫିସ,୧।୭: ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟ(ଡିଏଚ୍ଏଚ୍)ରେ ଭର୍ତ୍ତି ହେଉଥିବା ଗର୍ଭବତୀଙ୍କୁ ଆଉ ରେଫର ନ କରିବାକୁ ଜିଲା ମୁଖ୍ୟ ଚିକିତ୍ସାଧିକାରୀ(ସିଡିଏମ୍ଓ) ନିର୍ଦ୍ଦେଶ ଦେଇଛନ୍ତି। ଆଉ ଜଣେ ଆନାସ୍ଥେସିଆ ବିଶେଷଜ୍ଞ କାର୍ଯ୍ୟରେ ଯୋଗ ଦେବା ପରେ ଡିଏଚ୍ଏଚ୍ରେ ୨୪ ଘଣ୍ଟିଆ ସେବା ଉପଲବ୍ଧ ହେବା ଆରମ୍ଭ ହୋଇଛି। ଗର୍ଭବତୀମାନେ ଏଣିକି ଉତ୍ତମ ସ୍ବାସ୍ଥ୍ୟସେବା ପାଇବେ, ସେମାନଙ୍କୁ ଆଉ ଅନ୍ୟ ଡାକ୍ତରଖାନାକୁ ପଠାଯିବ ନାହିଁ ବୋଲି ନିଷ୍ପତ୍ତି ନିଆଯାଇଛି ।
ଗତକିଛି ବର୍ଷ ହେବ ଜିଲା ମୁଖ୍ୟ ଚିକିତ୍ସାଳୟକୁ ବହୁ ଆଶା ଓ ବିଶ୍ୱାସ ନେଇ ଆସୁଥିବା ଗର୍ଭବତୀମାନେ ବିଭିନ୍ନ କାରଣରୁ ହଟହଟା ହେଉଥିଲେ । ଉକ୍ତ ଚିକିତ୍ସାଳୟରେ ୪ଜଣ ସ୍ତ୍ରୀ ରୋଗ ବିଶେଷଜ୍ଞ ଥିଲେ ମଧ୍ୟ ଜଣେ ଆନାସ୍ଥେସିଆ ବିଶେଷଜ୍ଞ ଥିଲେ। ଦିନରେ ଅପରେଶନ ଦାୟିତ୍ୱ ସମ୍ଭାଳିବା ପରେ ଆନାସ୍ଥେସିଆ ବିଶେଷଜ୍ଞ ଆଉ ସନ୍ଧ୍ୟାରେ ଡ୍ୟୁଟି କରୁ ନ ଥିଲେ। ଫଳରେ ସନ୍ଧ୍ୟା ପରେ ପ୍ରସବ ପାଇଁ ଆସୁଥିବା ମହିଳାଙ୍କୁ ଅନାସ୍ଥେସିଆ ବିଶେଷଜ୍ଞ ନ ଥିବା କହି ଫେରାଇ ଦିଆଯାଉଥିଲା । ଏପରିକି ଗୁରୁତର ଗର୍ଭବତୀମାନଙ୍କୁ ଅନ୍ୟତ୍ର ରେଫର କରି ଦିଆଯାଉଥିଲା । ହେଲେ ଆନାସ୍ଥେସିଆ ବିଶେଷଜ୍ଞ ଅନିଲ ସାମନ୍ତରାୟ କାର୍ଯ୍ୟରେ ଯୋଗ ଦେବା ପରେ ତାଙ୍କୁ ରାତି ଅପରେଶନ ଦାୟିତ୍ୱ ଦିଆଯାଇଛି। ଫଳରେ ପ୍ରସବ ପାଇଁ ଆସୁଥିବା ମହିଳାଙ୍କୁ ଆଉ ରେଫର କରିବାକୁ ପଡ଼ିବ ନାହିଁ ବୋଲି ଡାକ୍ତରଖାନା କର୍ତ୍ତୃପକ୍ଷ କହିଛନ୍ତି ।