ଢେଙ୍କାନାଳ ଅଫିସ, ୨୩।୪ ଢେଙ୍କାନାଳ ପୌରାଞ୍ଚଳ ୧ନଂ. ଓ୍ବାର୍ଡ ଅନ୍ତର୍ଗତ ଶ୍ୟାମାଚରଣପୁର ଅଞ୍ଚଳରେ ନିର୍ମିତ ଶ୍ମଶାନ, ପୋଖରୀ ଖନନ ଏବଂ ଜାଗା ମିଶନକୁ ନେଇ ଶୁକ୍ରବାର ସ୍ଥାନୀୟ ଆଞ୍ଚଳିକ ବିକାଶ ସମିତି କର୍ମକର୍ତ୍ତାମାନେ ମୁହଁ ଖୋଲିଛନ୍ତି। ସେମାନେ ଜାଗା ମିଶନ ପ୍ରକଳ୍ପ ଏବଂ ଏଥିପାଇଁ ନିର୍ମିତ କମ୍ୟୁନିଟି ସେଣ୍ଟରକୁ ତୀବ୍ର ବିରୋଧ କରିଛନ୍ତି। ସେହିପରି ଜିଲା ଖଣିଜ ପାଣ୍ଠିରୁ ୧୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଶ୍ମଶାନକୁ ହସ୍ତାନ୍ତର କରିବା, ଶ୍ମଶାନରେ ଆଶ୍ରୟସ୍ଥଳ ସହିତ ମନ୍ଦିର ପାର୍ଶ୍ୱରେ ପାଚେରି ନିର୍ମାଣ ଏବଂ ପୋଖରୀ ଖନନ କାର୍ଯ୍ୟ ତୁରନ୍ତ ସାରିବା ଲାଗି ଦାବି କରିଛନ୍ତି।
ଶ୍ୟାମାଚରଣପୁର ଆଞ୍ଚଳିକ ବିକାଶ ସମିତି ସଭାପତି ଯୋଗୀନାଥ ମହାନ୍ତି, ସମ୍ପାଦକ ପ୍ରସନ୍ନ ସାହୁ, ସଦସ୍ୟ ପ୍ରଫେସର ରାମଚନ୍ଦ୍ର ଦାସ, ଡ. ଭବାନୀ ଶଙ୍କର ମିଶ୍ର, ବିରଞ୍ଚତ୍ ନାଥ, ସର୍ବେଶ୍ୱର ପତି, ସ୍ବର୍ଣ୍ଣଭାନୁ ଦାସ, ରବି ନନ୍ଦ, ଅରୁଣ ମହାନ୍ତି, ଶରତ ପଟ୍ଟନାୟକ ପ୍ରମୁଖ କହିଛନ୍ତି, ଶ୍ମଶାନ ନିର୍ମାଣ କାର୍ଯ୍ୟ ଶେଷ ହୋଇଥିଲେ ମଧ୍ୟ ହସ୍ତାନ୍ତର କରାଯାଉନାହିଁ। ଏହା ଅସାମାଜିକଙ୍କ ଆଡ୍ଡା ପାଲଟିଛି। ଜାଗା ମିଶନ କାର୍ଯ୍ୟକାରୀ କରିବା ନେଇ ପୌରସଂସ୍ଥା ପକ୍ଷରୁ କୌଣସି ଆଲୋଚନା କରାଯାଉ ନ ଥିବା ସେମାନେ ଅଭିଯୋଗ କରିଛନ୍ତି।
ଏ ସଂକ୍ରାନ୍ତରେ ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ କୁହନ୍ତି, ଶ୍ମଶାନ ନିର୍ମାଣ କାର୍ଯ୍ୟ ସରିବା ପରେ ଏହାକୁ ଠିକ୍ ଭାବେ ଦୃଷ୍ଟି ଦିଆଯାଇ ପାରିନାହିଁ। ୭ଦିନ ମଧ୍ୟରେ ପରିଷ୍କାର କରାଯାଇ ଏହାକୁ ବ୍ୟବହାର ଉପଯୋଗୀ କରାଯିବ। ପୋଖରୀ କାର୍ଯ୍ୟ ଠିକ୍ ଭାବେ ହୋଇଛି କି ନାହିଁ ଦେଖିବା ପରେ ଠିକାଦାରଙ୍କ ପେମେଣ୍ଟ କରାଯିବ। ରାଜ୍ୟ ସରକାରଙ୍କ ନିର୍ଦ୍ଦେଶରେ ଉକ୍ତ ଅଞ୍ଚଳରେ ଜାଗା ମିଶନ କାର୍ଯ୍ୟକାରୀ କରାଯିବା ସହିତ କମ୍ୟୁନିଟି ସେଣ୍ଟର ନିର୍ମାଣ କରାଯାଇଛି। ଏଥିପାଇଁ ଡ୍ରୋନ୍ ସର୍ଭେ କରାଯାଇଥିଲା। ଅଞ୍ଚଳରେ ରହୁଥିବା ୨୦ରୁ ଊର୍ଦ୍ଧ୍ୱ ବସ୍ତିବାସିନ୍ଦାଙ୍କ ସମେତ ଅଞ୍ଚଳବାସୀ ଉକ୍ତ କମ୍ୟୁନିଟି ସେଣ୍ଟର ବ୍ୟବହାର କରିପାରିବେ। ଯଦି କିଛି ସମସ୍ୟା ରହିଥାଏ, ତେବେ ଅଞ୍ଚଳବାସୀଙ୍କ ସହିତ ଆଲୋଚନା କରି ଏହାର ସମାଧାନ କରାଯିବ ବୋଲି ସେ କହିଛନ୍ତି।