ଚନ୍ଦାହାଣ୍ଡି,୭।୧୦(ଡି.ଏନ୍.ଏ.): ଜଣେ ଯୁବକ ନିଜକୁ ଖବରଦାତା କହି ଟଙ୍କା ମାଗୁଥିବା ନେଇ ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ଶରଧାପୁର ସରପଞ୍ଚ ଲେବନୀ ମାଝି ଚନ୍ଦାହାଣ୍ଡି ଥାନାରେ ଅଭିଯୋଗ କରିଛନ୍ତି। ଯୁବକ ଜଣଙ୍କ ସରପଞ୍ଚଙ୍କ ନାମରେ ଭିଡିଓ ଭାଇରାଲ କରି ଦେବାର ଧମକ ଦେଇଥିବା ନେଇ ଉକ୍ତ ଏତଲାରେ ଉଲ୍ଲଖ ଥିବା ଚନ୍ଦାହାଣ୍ଡି ଥାନାଧିକାରୀ ଉମେଶ ଚନ୍ଦ୍ର ନାୟକ କହିଛନ୍ତି। ଚନ୍ଦାହାଣ୍ଡି ପୋଲିସ ୧୧୫/୨୨ରେ ଏକ ମାମଲା ରୁଜୁ କରିଛି। ଏସ୍ଆଇ ସମୀର ପ୍ରଧାନଙ୍କୁ ତଦନ୍ତ ଦାୟିତ୍ୱ ଦିଆ ଯାଇଛି ବୋଲି ଥାନାଧିକାରୀ କହିଛନ୍ତି।
ପୋଲିସ ସୂତ୍ରନୁସାରେ ପାଟଖଲିଆ ପଞ୍ଚାୟତ ସଦର ଗ୍ରାମର ଚତୁର ଗହୀର ୧ ତାରିଖରେ ସରପଞ୍ଚ ଲେବନୀ ମାଝିଙ୍କୁ ନିଜେ ଜଷର ଖବରଦାତା ବୋଲି କହି ଫୋନରେ ୨୦ ହଜାର ବଟି ମାଗିଥିଲେ । ପରେ ତାଙ୍କ ଘର ତେଲାତାଣ୍ଡି ଗ୍ରାମକୁ ଯାଇ ପଇସା ମାଗିବା ସହ ଜାତିଆଣ ମନ୍ତବ୍ୟ ଦେଇଥିଲେ। ସରପଞ୍ଚ ମାଝି ଟଙ୍କା ଦେବାରେ ଅକ୍ଷମତା ପ୍ରକାଶ କରିବା ସହ ଯୁବକଙ୍କ ନାମରେ ଗତ ୪ ତାରିଖରେ ଚନ୍ଦାହାଣ୍ଡି ଥାନାରେ ଲିଖିତ ଅଭିଯୋଗ କରିଛନ୍ତି। ଏହା ପୂର୍ବରୁ ମଧ୍ୟ ଚତୁର ଖବରଦାତା ବୋଲି ପରିଚୟ ଦେଇ ହଇରାଣ କରିଥିବା ସରପଞ୍ଚ ନିଜ ଏତଲାରେ ଦର୍ଶାଇଛନ୍ତି l ଘଟଣାକୁ ଚନ୍ଦାହାଣ୍ଡି ପ୍ରେସ କ୍ଳବ ପକ୍ଷରୁ ନିନ୍ଦା କରାଯାଇଛି। ଦୋଷୀଙ୍କ ବିରୋଧରେ କାର୍ଯ୍ୟନୁଷ୍ଠାନ ନେବାକୁ ପ୍ରେସ୍ କ୍ଲବ ସଭାପତି ଦିଲ୍ଲୀପ ଦାସ କହିଛନ୍ତି। ଏ ନେଇ ଚତୁର ଗହୀରଙ୍କୁ ପଚାରିବାରୁ ସେ ଏହାକୁ ଖଣ୍ଡନ କରିବା ସହ ମିଛରେ ଫଶା ଯାଉଛି ବୋଲି ସେ କହିଛନ୍ତି। ପ୍ରକାଶ ଯେ ଚନ୍ଦାହାଣ୍ଡି ବ୍ଲକରେ କେତେଜଣ ଯୁବକ ନିଜ ବାଇକ ଓ କାରରେ ପ୍ରେସ୍ ଲେଖି ବୁଲିବା ସହ ବିଭିନ୍ନ ଅନୁଷ୍ଠାନକୁ ଧମକ ଦେଇ ଚାନ୍ଦା ମାଗିଥିବା ଅଭିଯୋଗ ହୋଇଛି। ତେଣୁ ପୋଲିସ ଓ ବ୍ଲକ ପ୍ରଶାସନ ଏପରି ନକଲି ଖବରଦାତାଙ୍କୁ ଚିହ୍ନଟ କରିବାକୁ ଲୋକେ ଦାବି କରିଛନ୍ତି।