ପଦ୍ମପୁର, ୨୪।୫ (ଡି.ଏନ.ଏ.) ଭଦ୍ରକ ଜିଲାର ବନ୍ୟା ଓ ବାତ୍ୟା ପ୍ରପୀଡ଼ିତ ଅଞ୍ଚଳ ଭାବେ ଜଣାଶୁଣା ବାସୁଦେବପୁର ବ୍ଲକରେ ଥିବା ଏକମାତ୍ର ଉଦ୍ଧାରକାରୀ ବୋଟ୍ ଏବେ ଖତ ଖାଉଛି। ବନ୍ୟା ସମୟରେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ଜଗନ୍ନାଥପ୍ରସାଦ ପଞ୍ଚାୟତ ମନ୍ତେଈ ନଦୀର ଦଧିବାମନପୁରଠାରେ ରାଜସ୍ବ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଏକ ବୋଟ୍ ଯୋଗାଇ ଦିଆଯାଇଥିଲା। ଏଥିସହ ଜଣେ ଚାଳକଙ୍କୁ ବୋଟ୍ର ରକ୍ଷଣାବେକ୍ଷଣ ପାଇଁ ସ୍ଥାୟୀ ଭାବେ ନିଯୁକ୍ତି ଦିଆଯାଇଥିଲା। ଉକ୍ତ ବୋଟ୍ ୨୦୨୦ରେ ଭାଙ୍ଗିରୁଜି ଯାଇଥିବା ବେଳେ ତତ୍କାଳୀନ ତହସିଲଦାର ସୌମ୍ୟଶ୍ରୀ ପାଣିଗ୍ରାହୀଙ୍କ ନିର୍ଦ୍ଦେଶ କ୍ରମେ ଏହାର ମରାମତି କରାଯାଇଥିଲା। ବୋଟ୍ଟି ପୁଣି ଭାଙ୍ଗିରୁଜି ଯାଇ କଳଙ୍କି ଲାଗି ଗଲାଣି। ଆଗକୁ ବର୍ଷାଋତୁ ଆସୁଥିବା ବେଳେ ବନ୍ୟା ବାତ୍ୟା ସମୟରେ ଲୋକଙ୍କୁ ସ୍ଥାନାନ୍ତର କରିବା ଲାଗି ଏହା ସକ୍ଷମ ହେବ ନାହିଁ। ଏଥିସହ ବୋଟ୍ର ତଦାରଖ କରୁଥିବା ଚାଳକଙ୍କୁ ବାଲିମେଦ ରାଜସ୍ବ ସର୍କଲରେ କାମ କରିବା ପାଇଁ ନିର୍ଦ୍ଦେଶ ଦିଆଯାଇଥିବାରୁ ଦୁଇବର୍ଷ ଧରି ଏହାର ରକ୍ଷଣାବେକ୍ଷଣ କରାଯାଉ ନାହିଁ। ଫଳରେ ଦିନକୁ ଦିନ ଏହି ବୋଟ୍ଟି ନଷ୍ଟ ହେବାକୁ ବସିଛି। ଏ ସମ୍ପର୍କରେ ତହସିଲଦାର ଅନିତା ନାୟକ କହିଛନ୍ତି, ଉକ୍ତ ବୋଟ୍ର ପୁନଃ ମରାମତି ପାଇଁ ଜିଲାପାଳଙ୍କୁ ଲିଖିତ ଭାବେ ଜଣାଯାଇଛି। ନିର୍ଦ୍ଦେଶ ଆସିଲେ ପଦକ୍ଷେପ ନିଆଯିବ।
