ବରୀ,୧୦ା୮(ଡି.ଏନ.ଏ): ବନ୍ୟା ସମୟରେ ଲୋକମାନଙ୍କୁ ଉଦ୍ଧାର କରିବାକୁ ବ୍ୟବହୃତ ସରକାରୀ ବୋଟ୍ଗୁଡ଼ିକ ରାସ୍ତାକଡ଼ରେ ଦୀର୍ଘ ଦିନ ଧରି ଅଯତ୍ନ ଭାବେ ପଡ଼ିରହିଛି। ବରୀ ବ୍ଲକ ଅଞ୍ଚଳ ଦେଇ ପ୍ରବାହିତ ଖରସ୍ରୋତାର ଶାଖା ଦୁଧେଇ ନଦୀରେ ବନ୍ୟାଜଳ ପ୍ରବେଶ କରିସାରିଥିବା ବେଳେ ଏ ଯାଏଁ ଉଦ୍ଧାରକାରୀ ବୋଟ୍କୁ ଠିକଣାସ୍ଥାନରେ ପହଞ୍ଚାଯାଇନି। ଦୁଧେଇ ନଦୀ ସମେତ ଓ ବ୍ରାହ୍ମଣୀ ଏବଂ ବିରୂପା ନଦୀରେ ବନ୍ୟା ହେଲେ ବ୍ଲକ ଅଞ୍ଚଳର ବହୁ ଗ୍ରାମ ପ୍ରଭାବିତ ହେବା ଆଶଙ୍କା ରହିଛି। ଅନ୍ୟପଟେ ବିଗତ ଦିନରେ ବ୍ଲକ ପ୍ରଶାସନକୁ ବନ୍ୟା ସମୟରେ ସହଯୋଗର ହାତ ବଢ଼ାଇଥିବା ଦେଶୀ ଡଙ୍ଗା ମାଲିକମାନେ ପ୍ରାପ୍ୟ ପାଇ ନ ଥିବାରୁ ସେମାନେ ଆଉ ସହଯୋଗ କରୁନାହାନ୍ତି। ମାତ୍ର ପ୍ରଶାସନ ନିକଟରେ ଆବଶ୍ୟକ ବୋଟ୍ ନ ଥିବା ବେଳେ ଯେତିକି ବୋଟ୍ ରହିଛି, ସେଗୁଡ଼ିକର ରକ୍ଷଣାବେକ୍ଷଣ କରାଯାଉନି। ବାଲିଆପାଳ ଛକ ନିକଟରେ ଦୀର୍ଘଦିନ ଧରି ଖତ ଖାଉଥିବା ବୋଟ୍କୁ କାର୍ଯ୍ୟକ୍ଷମ କରିବାକୁ ବ୍ଲକ ପ୍ରଶାସନ ପକ୍ଷରୁ ଶୁକ୍ରବାରଠାରୁ ଉଦ୍ୟମ ଆରମ୍ଭ ହୋଇଥିବା ଦେଖାଯାଇଛି। ଏ ସମ୍ପର୍କରେ ବରୀ ବ୍ଲକ ନୂତନ ବିଡିଓ ଶିବାନନ୍ଦ ସ୍ବାଇଁଙ୍କୁ ପଚାରିବାରେ ବୋଟଗୁଡିକୁ କାର୍ଯ୍ୟକ୍ଷମ କରିବା ପାଇଁ ଯଥାଶୀଘ୍ର ବ୍ୟବସ୍ଥା କରାଯିବ ବୋଲି କହିଛନ୍ତି।