ବ୍ରହ୍ମପୁର ଅଫିସ,୩୧ା୧୨-ଗଞ୍ଜାମ ଜିଲା ଚିକିଟି ବ୍ଲକ ବାହୁଦା ନଦୀ ତଟ ଚିଙ୍ଗୁଡ଼ି ଘେର ଜାଲରେ ଫସିଯାଇଥିବା ହାତୀ ଛୁଆକୁ ମଙ୍ଗଳବାର ସ୍ଥାନୀୟ ଲୋକେ ଉଦ୍ଧାର କରି ବନ ବିଭାଗକୁ ହସ୍ତାନ୍ତର କରିଥିଲେ। ଉଦ୍ଧାର ହାତୀ ଛୁଆକୁ ଗୁରୁବାର କପିଳାସ ଚିଡିଆଖାନାକୁ ପଠାଯାଇଛି ବୋଲି ବ୍ରହ୍ମପୁର ବନଖଣ୍ଡ ଅଧିକାରୀ ଅମ୍ଳାନ ନାୟକ ସୂଚନା ଦେଇଛନ୍ତି। ଛୁଆ ହାତୀଟି ପୁରୁଷ ହୋଉଥିବା ବେଳେ ତାର ବୟସ ୫/୬ ମାସ ହୋଇଥିବା ଅନୁମାନ କରାଯାଉଛି ବୋଲି ସେ କହିଛନ୍ତି। ବର୍ତ୍ତମାନ ହାତୀ ଛୁଆଟି ସୁସ୍ଥ ରହିଛି, ଡାକ୍ତରଙ୍କ ପରାମର୍ଶ ଅନୁସାରେ ତାକୁ ଶିଶୁ ଖାଦ୍ୟ ଦିଆଯାଉଛି।
ଗଜପତି ଜିଲା ଲଖାରୀ ଜଙ୍ଗଲରୁ ଦକ୍ଷିଣ ଘୁମୁସର ଦେଇ ଗଞ୍ଜାମ ଜିଲାର ବ୍ରହ୍ମପୁର ବନାଞ୍ଚଳକୁ ଗତ ନଭେମ୍ବର ମାସରୁ ଆସିଥିବା ୧୫ ହାତୀ ଥିବା ପଲ ଜଙ୍ଗଲରେ ରହି ଧାନ ଫସଲ ଖାଉଥିଲେ। ଗତ ମଙ୍ଗଳବାର ଏହି ହାତୀ ପଲ ଖାଦ୍ୟ ଅନ୍ବେଷଣରେ ବାହୁଦା ନଦୀ ଦେଇ ଯାଉଥିବା ବେଳେ ଦଳରେ ଥିବା ଏକ ଛୁଆ ହାତୀ ମାଛ ଧରା ଜାଲରେ ଲାଗିଯାଇଥିଲା। ସ୍ଥାନୀୟ ଲୋକେ ହାତୀ ଛୁଆଟିକୁ ଉଦ୍ଧାର କରିଥିଲେ ମଧ୍ୟ ହାତୀ ପଲ ଉକ୍ତ ଛୁଆଟିକୁ ତାଙ୍କ ଦଳରେ ସାମିଲ କରି ନ ଥିଲେ। ଛୁଆ ହାତୀଟିକୁ ବନ ବିଭାଗ ହାତୀପଲରେ ଛାଡିବା ପାଇଁ ବାରମ୍ବାର ଉଦ୍ୟମ କରିଥିଲେ ମଧ୍ୟ ହାତୀମାନେ ଦଳରୁ ଅଲଗା ହୋଇଯାଇଥିବା ଛୁଆଟିକୁ ଗ୍ରହଣ ନ କରି ଜଙ୍ଗଲ ଭିତରକୁ ପଳାଇ ଯାଇଥିଲେ। ଫଳରେ ଉଦ୍ଧାର ହାତୀ ଛୁଆଟିକୁ ବନ ବିଭାଗ ଟାମଣା ରେଞ୍ଜରେ ରଖି ତାର ଯତ୍ନ ନେଇଥିଲା ବୋଲି ଡିଏଫଓ ନାୟକ କହିଛନ୍ତି।