ଚମ୍ପୁଆ, ୮।୨(ଡି.ଏନ.ଏ)-ଐତିହାସିକ ଓ ଭୌଗୋଳିକ ଦୃଷ୍ଟି କୋଣରୁ ଗୁରୁତ୍ୱପୁର୍ଣ୍ଣ ହୋଇପାରିଛି ଧଳା ପଥରଖଣ୍ଡ ଟିକି ପାହାଡ ସାତକୁଟୁଣିଆ। ନିର୍ଦ୍ଦିଷ୍ଟ ଏକ ଚଟାଣରେ ସାତଟି କୁଟୁଣି ଏହି ପାହାଡର ପରିଚୟ। ଏହି କୁଟୁଣି କାରଣରୁ ଏହାର ନାମ ସାତକୁଟୁଣିଆ ହୋଇପାରିଛି। ଏହି ସାତକୁଟୁଣିଆ ପାହାଡ ମଧ୍ୟରେ ରହିଥିବା ସାତଟି କୁଟୁଣିକୁ ନେଇ ଦୁଇଟି ମତ ଦେଖିବାକୁ ମିଳଛି।
ଲୋକକଥା ଅନୁଯାୟୀ ଉକ୍ତ ସାତକୁଟୁଣି ହେଉଛି ସାତ ଭଉଣୀଙ୍କ ବାସସ୍ଥାନ। ଦୀର୍ଘ ବର୍ଷ ପୁର୍ବରୁ କୋହ୍ଲ ଓ ମୁଣ୍ଡା ସମ୍ପ୍ରଦାୟର ଲୋକମାନେ ଏଠାରେ ପୂଜାର୍ଚ୍ଚନା କରିଆସୁଛନ୍ତି। ଆଦିବାସୀଙ୍କ ଗଭୀର ଶ୍ରଦ୍ଧା ଓ ବିଶ୍ୱାସ ଏହି ସ୍ଥାନ ପ୍ରତି ରହୁଥିବାରୁ ଆଶାଳୀ ପୂଜା ପୁର୍ବରୁ ଗ୍ରାମବାସୀ ଏହି ସାତ କୁଟୁଣିକୁ ପୂଜା କରିଥାନ୍ତି। ଏହି କୁଟୁଣୀରେ ପୂଜା କଲେ ନିଶ୍ଚିତ ବର୍ଷା ହୋଇଥାଏ ବୋଲି ଏବେବି ବିଶ୍ୱାସ ରହିଛି। ଐତିହାସିକ ଘଟଣାବଳୀ ଅନୁଯାୟୀ ଟାଟା କଲେଜ ଚାଇବସାର ଇତିହାସ ଅଧ୍ୟାପକ ଡ. ରଘୁନାଥ ସିଙ୍କୁଙ୍କ ଗବେଷଣାରୁ ଜଣାପଡେ ଯେ ଇଷ୍ଟ ଇଣ୍ଡିଆ କମ୍ପାନୀର ପ୍ରଥମ ବଡଲାଟ ଲର୍ଡ କ୍ଳାଇବଙ୍କ ସମୟରେ ନିକଟସ୍ଥ ଗ୍ରାମର ଜଣେ ଆଦିବାସୀ ବ୍ୟକ୍ତି ତା ଶସ୍ୟ କ୍ଷେତ୍ରରୁ ଅମଳ ସମୟରେ ତା ଫସଲକୁ ବନ୍ୟଜନ୍ତୁ କବଳରୁ ରକ୍ଷା କରିବା ପାଇଁ ବଡ ବଡ ଗଛ ଡାଳରେ ମଞ୍ଚା ପ୍ରସ୍ତୁତ କରି ଜଗିରହିବା ସହ ଏକ ସ୍ବତନ୍ତ୍ର ଶବ୍ଦ ସୃଷ୍ଟି କରି କେତେକ ପିଣ୍ଡୁଳା ବନ୍ୟଜନ୍ତୁ ଘଉଡାଇବା ପାଇଁ ବ୍ୟବହାର କରୁଥିଲେ। ଉକ୍ତ ପିଣ୍ଡୁଳା ଗୁଡିକ ବନ୍ୟଜନ୍ତୁଙ୍କ ଦେହରେ ବାଜିଲେ ଏକ ଶବ୍ଦ କରୁଥିଲା। ଫଳରେ ବନ୍ୟଜନ୍ତୁମାନେ ସେ ସ୍ଥାନ ଛାଡି ପଳାଉଥିଲେ। ସେହି ବ୍ୟକ୍ତି ଜଣଙ୍କ ଏହି ପାହାଡରେ ୭ ଟି ସ୍ଥାନରେ ଏହି ଗୋଳା ପ୍ରସ୍ତୁତ କରୁଥିବାରୁ ଉକ୍ତ ସ୍ଥାନଟି କୁଟୁଣିଆ ଆକାର ହୋଇଥିବା ଜଣାଯାଏ। ତେବେ ପଥର ଚଟାଣ ଉପରେ ସୃଷ୍ଟି ହୋଇଥିବା ଏହି ୭ଟି କୁଟୁଣି ମଣିଷକୃତ ବା ପ୍ରକୃତିଦତ୍ତ ତାହା ଗବେଷଣା ସାପେକ୍ଷ। କୁଟୁଣୀଗୁଡିକ ମଧ୍ୟରେ ୬ଟି କୁଟୁଣି ପାଖାପାଖି ଏକ ପ୍ରକାର ରହିଥିବା ବେଳେ ଗୋଟିଏ କୁଟୁଣି ସେଥିରୁ ଟିକିଏ ଅଲଗା। କୁଟୁଣିର ଆକୃତି ଭିନ୍ନ ଭିନ୍ନ ରହିଥିବା ବେଳେ ଏହା ପ୍ରାୟ ୨ ରୁ ୩ ଇଞ୍ଚ ହେବ ବୋଲି ଜଣାଯାଇଛି। ଏ ନେଇ ଜିଲା ପର୍ଯ୍ୟଟନ ବିଭାଗ ଅଧିକାରୀ ରମେଶ ନାଏକ କହିଛନ୍ତି, ଖୁବ୍ଶୀଘ୍ର ଉକ୍ତ ସ୍ଥାନ ପରିଦର୍ଶନ କରିବା ସହିତ ସ୍ଥାନୀୟ ବାସିନ୍ଦାଙ୍କ ସହ ଆଲୋଚନା ପରେ ଉକ୍ତ ସ୍ଥାନ ପ୍ରତି ପଦକ୍ଷେପ ନିଆଯିବ।