କଟକ ଅଫିସ,୨ା୨: ତାଳଦଣ୍ଡା କେନାଲ ଭଳି ସିଡିଏ ମର୍କତନଗରସ୍ଥିତ ପେଟାନାଳର ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ କାର୍ଯ୍ୟ ଖୁବ୍ଶୀଘ୍ର ଆରମ୍ଭ ହେବ। ଏଥିପାଇଁ ୩୬ କୋଟି ଟଙ୍କା ବ୍ୟୟ ଅଟକଳ କରାଯାଇଛି। ଆସନ୍ତା ୧୮ ମାସ ମଧ୍ୟରେ ଉକ୍ତ ପ୍ରକଳ୍ପ କାର୍ଯ୍ୟ ଶେଷ କରାଯିବ ବୋଲି ବୁଧବାର କଟକ ଉନ୍ନୟନ କର୍ତ୍ତୃପକ୍ଷ(ସିଡିଏ) ସମ୍ମିଳନୀ କକ୍ଷରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ନିଷ୍ପତ୍ତି ନିଆଯାଇଛି।
କଟକ ସହରକୁ ଅଧିକ ସୁନ୍ଦର କରିବା ପାଇଁ ପ୍ରଶାସନ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି। ମାର୍ଚ୍ଚ ପହିଲାରୁ ପ୍ରକଳ୍ପ କାର୍ଯ୍ୟ ଆରମ୍ଭ ହେବ ବୋଲି ବୈଠକରେ ସିଡିଏ ଅଧ୍ୟକ୍ଷ ଅନିଲ କୁମାର ସାମଲ କହିଛନ୍ତି। ନିଷ୍ପତ୍ତି ମୁତାବକ, ପ୍ରଥମ ପର୍ଯ୍ୟାୟରେ ୱାଟ୍କୋ ପକ୍ଷରୁ ପେଟାନାଳ ମଧ୍ୟକୁ ଛୋଟ ଡ୍ରେନ୍ରୁ ଛଡାଯାଉଥିବା ନର୍ଦ୍ଦମା ପାଣି ଓ ସ୍ବେରେଜ ବର୍ଜ ଜଳକୁ ବନ୍ଦ କରାଯାଇ ସିଧାସଳଖ ୱାଟର ଟ୍ରିଟ୍ମେଣ୍ଟ ପ୍ଲାଣ୍ଟକୁ ଛଡ଼ାଯିବ। ତେବେ ଏହି କାର୍ଯ୍ୟ ୱାଟ୍କୋ ପକ୍ଷରୁ ଆରମ୍ଭ ହୋଇଥିବା ନେଇ ବୈଠକରେ କୁହାଯାଇଛି। ସେହିପରି ଦ୍ୱିତୀୟ ପର୍ଯ୍ୟାୟ କାର୍ଯ୍ୟ ସ୍ବରେଜ ବିଭାଗ ପକ୍ଷରୁ ମାର୍ଚ୍ଚ ପହିଲାରୁ ଆରମ୍ଭ କରାଯିବ। ବିଶେଷକରି ନାଳରୁ ମାଟି ବାହାର କରାଯାଇ ସମତଳ କରାଯିବ ଓ ଭିତର ପଟର ଉଭୟ କଡକୁ ସଫା କରାଯିବ। ପରବର୍ତ୍ତୀ ପର୍ଯ୍ୟାୟରେ କଟକ ମହାନଗର ନିଗମ ପକ୍ଷରୁ ଅନୁଧ୍ୟାନ କରାଯାଇ ଆବଶ୍ୟକ ସ୍ଥଳେ ସେଠାରେ ଥିବା ଜବରଦଖଲ ଉଚ୍ଛେଦ କରାଯିବ। ଶେଷ ପର୍ଯ୍ୟାୟରେ ସୌନ୍ଦର୍ଯ୍ୟକରଣ, ମନୋରଞ୍ଜନ ପାଇଁ ଉଦ୍ୟାନ ନିର୍ମାଣ, ଘାସ, ଫୁଲଗଛ, ଲୋକ ବସିବା ପାଇଁ ବେଞ୍ଚ ସହ ଜଳଫୁଆରା ଓ ଆଧୁନିକ ଆଲୋକୀକରଣ ବ୍ୟବସ୍ଥା କରାଯିବ ବୋଲି ବୈଠକରେ ନିଷ୍ପତ୍ତି ନିଆଯାଇଛି। ସୂଚନାଯୋଗ୍ୟ, ପେଟାନାଳର ପୁନରୁଦ୍ଧାର ପାଇଁ ପୂର୍ବରୁ ଅନେକ ଯୋଜନା ପ୍ରସ୍ତୁତ ହୋଇଥିଲା। ହେଲେ ଏହା କେବଳ ଯୋଜନାରେ ସୀମିତ ରହିଯାଇଥିଲା। ତେବେ ଉକ୍ତ ବୈଠକରେ ନିଆଯାଇଥିବା ନିଷ୍ପତ୍ତି କାର୍ଯ୍ୟକାରୀ ହେବ ନା ଯୋଜନାରେ ସୀମିତ ରହିବ, ତାହାକୁ ଦେଖିବା ପାଇଁ ସହରବାସୀ ଅପେକ୍ଷା କରିଛନ୍ତି।
ସେହିପରି ଏଠାରେ ଆଉ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଖାନ୍ନଗର ଓ ସତୀଚୌରାରେ ଶବଦାହ ପାଇଁ ଗ୍ୟାସ୍ଚୁଲା କାର୍ଯ୍ୟକ୍ଷମ ସମ୍ପର୍କରେ ଆଲୋଚନା ହୋଇଥିଲା। ଆଗାମୀ ୧୫ ଦିନ ଭିତରେ ଖାନ୍ନଗରସ୍ଥିତ ଶବଦାହ ଗ୍ୟାସ୍ ଚୁଲା ଚାଲୁ କରାଯିବ ବୋଲି ନିଷ୍ପତ୍ତି ହୋଇଛି। ୩.୫ କୋଟି ଟଙ୍କା ବ୍ୟୟରେ ଖାନ୍ନଗରସ୍ଥିତ ଶବଦାହ କେନ୍ଦ୍ରରେ ଏକାଥରକେ ଦୁଇଟି ଶବଦାହ ପାଇଁ ବ୍ୟବସ୍ଥା କରାଯାଇଛି। ଏହି ବୈଠକରେ କଟକ ମହାନଗର ନିଗମ(ସିଏମ୍ସି) କମିଶନର ନିଖିଲ ପୱନ କଲ୍ୟାଣ, ଡେପୁଟି କମିଶନର ଅଜୟ ମହାନ୍ତି, ଜାଇକା ନିର୍ବାହୀ ଯନ୍ତ୍ରୀ, ୱାଟ୍କୋ ଅଧୀକ୍ଷଣ ଯନ୍ତ୍ରୀ, ସିଏମ୍ସି ସିଟି ଇଞ୍ଜିନିୟର, ନିର୍ବାହୀ ଯନ୍ତ୍ରୀ, ଡ୍ରେନେଜ୍ ବିଭାଗ ମୁଖ୍ୟଯନ୍ତ୍ରୀ, ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ, ଗେଲ୍ର ନିର୍ବାହୀ ଯନ୍ତ୍ରୀଙ୍କ ସମେତ ଅନ୍ୟ ବିଭାଗର ଅଧିକାରୀ ଉପସ୍ଥିତ ଥିଲେ।
