କେସିଙ୍ଗା, ୧୩।୨ (ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକର ବିଭିନ୍ନ ମଣ୍ଡିରେ ଦୀର୍ଘ ମାସେ ହେଲା ଧାନ ପଡିରହିଛି। ଚାଷୀମାନେ ଶୀତ କାକରରେ ଦିନରାତି ମଣ୍ଡିରେ ଜଗି ରହୁଛନ୍ତି। କେସିଙ୍ଗା ବ୍ଲକରେ ୧୪ଟି ଧାନ ମଣ୍ଡି ରହିଛି। ସେଥି ମଧ୍ୟରୁ ମଶାଣିବନ୍ଧ ମଣ୍ଡିରୁ ଧାନ ସମ୍ପୂର୍ଣ୍ଣ ଭାବେ ଉଠିଯାଇଛି। କିନ୍ତୁ ବ୍ଲକର ପାଷ୍ଟିକୁଡି ଧାନ ମଣ୍ଡିରେ ୧୩ ହଜାର ୩୦୯ ବ୍ୟାଗ, ଗୋକୁଳେଶ୍ୱର ମଣ୍ଡିରେ ୬ ହଜାର ୫୦୦ ବ୍ୟାଗ, ଉତ୍କେଲାରେ ୧୮ ହଜାର ବ୍ୟାଗ, କିକିଆରେ ୨୬ ଶହ ବ୍ୟାଗ, କାଣ୍ଡେଲରେ ଏକ ହଜାର ୨୮୦ ବୃାଗ, ସିରୋଲରେ ଏକ ହଜାର ୧୧୦ ବ୍ୟାଗ, ବାଲସିରେ ଏକ ହଜାର ୨୦୩ ବ୍ୟାଗ, ତହସିର ଧାନ ମଣ୍ଡିରେ ୧ ହଜାର ୫୦୦ ବ୍ୟାଗ, କଶୃପଡାରେ ୨ ହଜାର, ତୁର୍ଲାଖମନରେ ୫୦୦ ବ୍ୟାଗ, ତୁଣ୍ଡଲାରେ ୩ ହଜାର ୧୯୯ ବ୍ୟାଗ, ହାତୀଖୋଜରେ ୫ ହଜାର ୫୯୧ ବ୍ୟାଗ, ବେଲଖଣ୍ଡି ଧାନ ମଣ୍ଡିରେ ୨୭୧ ବ୍ୟାଗ ଏହିପରି ୧୩ଟି ମଣ୍ଡିରେ ୯୧୦ଜଣ ଚାଷୀଙ୍କ ୯୧ ହଜାର ୩୦୩ ବ୍ୟାଗ ଧାନ ଦୀର୍ଘ ଏକ ମାସ ହେଲା ମଣ୍ଡିରେ ପଡିରହିଛି। କେସିଙ୍ଗା ବ୍ଲକର ୧୭ଟି ରାଇସ ମିଲର୍ସଙ୍କୁ ଧାନ କିଣିବା ପାଇଁ ଯୋଗାଣ ବିଭାଗ ତଥା ଜିଲାପାଳଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି। ବହୁ ଚାଷୀଙ୍କ ଧାନ ମଣ୍ଡିରେ ପଡିରହିଛି। କାହାର ବାହାଘର ଅଛି ତ, କାହାର ବ୍ରତ ଅଛି । କିଏ ରୋଗ ଚିକିତ୍ସା ପାଇଁ ଅର୍ଥର ବାଧକ ସାଜିଛି। କିନ୍ତୁ ଜିଲା ପ୍ରଶାସନ ତଥା ରାଜ୍ୟ ସରକାର ବି ଚାଷୀଙ୍କ ସମସ୍ୟାକୁ କର୍ଣ୍ଣପାତ କରୁ ନ ଥିବାରୁ ହାଡଭଙ୍ଗା ଶୀତରେ ଚାଷୀମାନେ ଦିନ ରାତ୍ରି ଧାନ ମଣ୍ଡିରେ ଜଗି ରହିଛନ୍ତି। ଗତ ଜାନୁୟାରୀ ୨୦ ତାରିଖ ସୁଦ୍ଧା କେସିଙ୍ଗା ବ୍ଲକରେ ୩ ହଜାର ୯୬୬ ଜଣ ଚାଷୀଙ୍କଠାରୁ ୨ ଲକ୍ଷ ୨୫ ହଜାର ୪୫ କୁଇଣ୍ଟାଲ ୪୪ କେଜି ଧାନ ବିଭିନ୍ନ ପ୍ୟାକ୍ସ ଦ୍ୱାରା କିଣାଯାଇଛି। କିନ୍ତୁ ବହୁ ଚାଷୀଙ୍କ ଟଙ୍କା ମଧ୍ୟ ଆଜି ଯାଏ ମିଳିନାହିଁ। ଏପଟେ ଚାଷୀଙ୍କୁ ଅର୍ଥ ଦେବାରେ ବିଳମ୍ବ ସେପଟେ ମଣ୍ଡିରୁ ଧାନ ଉଠୁ ନାହିଁ। ଫଳରେ ଚାଷୀମାନେ ମୁଣ୍ଡରେ ହାତଦେଇ ଚିନ୍ତାରେ ରହିଛନ୍ତି। ନର୍ଲା ବିଧାୟକ ଭୂପିନ୍ଦର ସିଂହ କେସିଙ୍ଗା ଓ ନର୍ଲା ବ୍ଲକର ବିଭିନ୍ନ ମଣ୍ଡି ପରିଦର୍ଶନ କରି ଜିଲାପାଳଙ୍କ କାର୍ଯ୍ୟାଳୟରେ ବିଭାଗୀୟ ଅଧିକାରୀଙ୍କ ସହିତ ସମୀକ୍ଷା ମଧ୍ୟ କରିଥିଲେ। ଏ ସଂକ୍ରାନ୍ତରେ କେସିଙ୍ଗା ଯୋଗାଣ ସହାୟକ ଅଧିକାରୀ ସୁଶାନ୍ତ କୁମାର ସ୍ବାଇଁଙ୍କୁ ପଚାରିବାରୁ ଧାନର ଆଲଟମେଣ୍ଟ ଆସିନାହିଁ । କେବେ ଆସିବ ମୁଁ କହିପାରିବି ନାହିଁ ବୋଲି ପ୍ରକାଶ କରିଥିଲେ ।