ମହାକାଳପଡ଼ା,୧୬ା୫(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ନଦୀନାଳ ଘେରା ଉପକୂଳବର୍ତ୍ତୀ ବରକନ୍ଧା ପଞ୍ଚାୟତ ଦଶରାଜପୁର ଗାଁ ସଂଲଗ୍ନ ଚଉମୁହାଣ ଦେଇ ମହାନଦୀ ପ୍ରବାହିତ ହେଉଛି। ମହାନଦୀ କୂଳ ଲଂଘିବା ଫଳରେ ଅତଡା ଖାଉଥିବାରୁ ବନ୍ଧ ପ୍ରତି ବିପଦ ସୃଷ୍ଟି ହୋଇଛି। ଚାଷୀଙ୍କର ଏକର ଏକର ଚାଷ ଜମି ନଦୀ ଗର୍ଭକୁ ଚାଲିଗଲାଣି। ଫଳରେ ଚଉମୁହାଣ ପ୍ରତି ବିପଦ ଦେଖାଦେଇଛି। ତେଣୁ ବନ୍ଧରେ ପଥର ପ୍ୟାକିଂ ପାଇଁ ଅଞ୍ଚଳବାସୀ ଦାବି କରିଛନ୍ତି।
ମହାକାଳପଡ଼ାଠାରେ ସଡ଼କ ପଥ ସୁବିଧା ନ ଥିବାରୁ ଏହି ଚଉମୁହାଣ ଜଳପଥ ଦେଇ କଟକ, କୁଜଙ୍ଗ ଆଦି ଅଞ୍ଚଳରୁ ମାଲ ପରିବହନ ମୁଖ୍ୟ ପଥ ଥିଲା। ଚିକିତ୍ସା କ୍ଷେତ୍ରରେ ମହାକାଳପଡ଼ା ବ୍ଲକର ଏକ ଚତୁର୍ଥାଂଶ ଲୋକ କୁଜଙ୍ଗ (ଅନନ୍ତପୁର) ଉପରେ ନିର୍ଭର କରି ଏହି ଚଉମୁହାଣ ନଦୀ ପଥ ଦେଇ ଯାତାୟାତ କରୁଥିଲେ। ସମୟ ଥିଲା ନଅଙ୍କ ଦୁର୍ଭିକ୍ଷ (୧୮୬୬) ପରେ ଚାଷୀମାନେ ମହଣ ମହଣ ଲୁଣ ଭାର କାନ୍ଧେଇ ଏହି ନଦୀ ଘାଟରେ ଦୈନଦିନ ମହାକାଳପଡ଼ାର ଲୁଣ ନେଇ ବେପାର ବଣିଜ ପାଇଁ କୁଜଙ୍ଗ ଯାଉଥିଲେ। ହେଲେ ଏବେ ମହାନଦୀ ଗତିପଥ ଦିଗ ବଦଳାଇବା ଦ୍ୱାରା ଦଶରାଜପୁର ଗାଁର ଅନେକ ଚାଷୀଙ୍କର ଏକର ଏକର ଚାଷ ଜମି ଏବେ କରାଳ ଗର୍ଭରେ ଲୀନ ହୋଇ ଗଲାଣି। ମହାନଦୀର ସ୍ରୋତ ପ୍ରଖର ଥିବାରୁ ଅତଡ଼ା ପରେ ଅତଡ଼ା ଖସି ଚାଲିଛି। କିଛିବର୍ଷ ପରେ ଆଖଡ଼ାସାହି-ଦଶରାଜପୁର ମୁଖ୍ୟ ରାସ୍ତା ଖାଇ ନଦୀ ଗର୍ଭକୁ ଚାଲିଯିବାକୁ ଏଡ଼ାଇ ଦିଆ ଯାଇ ନ ପାରେ ବୋଲି ବୁଦ୍ଧିଜୀବୀ ମହଲ ଚିନ୍ତା ପ୍ରକଟ କଲେଣି। ମହାନଦୀର ୮୦ ଭାଗ ଜଳପଥ ମହାକାଳପଡ଼ା ରାଜସ୍ବ ତହସିଲ ଅଧୀନରେ ରହିଥିବାରୁ ଉକ୍ତ ଫେରି ଘାଟକୁ ନେଇ ଏବେ ବିବାଦର ବାଟ ଫିଟୁନି। ଅପରପକ୍ଷେ ମହାନଦୀର ଚଉମୁହାଣ ଫେରି ଘାଟକୁ ନେଇ ଜଗତ୍ସିଂହପୁର ଜିଲା ସହ ବିବାଦ ସମସ୍ୟାର ସମାଧାନ ହୋଇପାରୁନାହିଁ। ଫଳରେ ପାରାଦୀପ ଶିଳ୍ପାଞ୍ଚଳ ଉପରେ ନିର୍ଭର କରୁଥିବା କେନ୍ଦ୍ରାପଡ଼ା ଜିଲାର ରାଜନଗର, ମହାକାଳପଡ଼ା ବ୍ଲକର ବହୁ କୁଶଳୀ, ଅଣକୁଶଳୀ ଓ ଶ୍ରମିକମାନେ ନାନାଦି ପ୍ରକାର ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ଅଞ୍ଚଳବାସୀ ବାରମ୍ବାର ପ୍ରଶାସନ ନିକଟରେ ଅଭିଯୋଗ କଲେ ମଧ୍ୟ କିଛି ସୁଫଳ ମିଳୁନାହିଁ। ମହାନଦୀ କୂଳ ଲଂଘିବା ଯୋଗୁ ଚାଷୀମାନଙ୍କ ଚାଷବାସ ପ୍ରଭାବିତ ହେଉଛି। ନଦୀ ତଟବନ୍ଧ ବିଭାଗ ପକ୍ଷରୁ ମହାନଦୀ ପ୍ରବାହିତ କୂଳ ଖାଉଥିବା ସ୍ଥାନରେ ପଥର ପ୍ୟାକିଂ ପାଇଁ ବରକନ୍ଧା ପଞ୍ଚାୟତର ପ୍ରାକ୍ତନ ସରପଞ୍ଚ ନାଥ କୁମାର ଭୋଳ ଦାବି କରିଛନ୍ତି।