ରାଉରକେଲା ଅଫିସ, ୨୩।୪: ରାଉରକେଲା ପାନପୋଷ ହନୁମାନ ମନ୍ଦିର ନିକଟ ବ୍ରାହ୍ମଣୀ ନଦୀଘାଟ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳ ପାଲଟିଛି। ନଦୀଘାଟରେ ଅସାମାଜିକ ତତ୍ତ୍ୱ ଅଳିଆ ଆବର୍ଜନା କରିବା ସହ ମଦ ପିଇ ଖାଲି ବୋତଲ ଫିଙ୍ଗି ଦେଉଛନ୍ତି। ଫଳରେ ଯାତ୍ରୀମାନେ ସେଠାରେ ନାନା ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନା ଅନୁସାରେ, ବ୍ରାହ୍ମଣୀ ନଦୀଘାଟରେ ଆବହମାନ କାଳରୁ ଲୋକମାନେ ପିଣ୍ଡଦାନ ତଥା ଶ୍ରାଦ୍ଧକର୍ମ ସହିତ ଧାର୍ମିକ କାର୍ଯ୍ୟ କରିଆସୁଥିଲେ। ମହାନଗର ନିଗମ ପକ୍ଷରୁ ଲକ୍ଷାଧିକ ଟଙ୍କା ବ୍ୟୟବରାଦ କରାଯାଇ ଘାଟର ଉନ୍ନତୀକରଣ କରାଯାଇଛି। ୬ମାସ ତଳେ ନଦୀଘାଟରେ ରାତ୍ରିକାଳୀନ ପୋଲିସ ପାଟ୍ରୋଲିଂ କରାଗଲା। ବର୍ତ୍ତମାନ ଏହା ବନ୍ଦ ରହିଥିବାରୁ ଅସାମାଜିକ ଲୋକେ ଏହାର ସୁଯୋଗ ନେଇ ସେଠାରେ ଆଡ୍ଡା ଜମାଇଲେଣି। ଅସାମାଜିକ ଲୋକେ ଝୁଲାପୋଲରେ ବସି ମଦ୍ୟପାନ କରୁଥିବା ବେଳେ ମଦ ବୋତଲ ଏଣେତେଣେ ଫିଙ୍ଗି ଦେଉଛନ୍ତି। ସେମାନେ ମନ୍ଦିର ବାଉଣ୍ଡାରି ଭାଙ୍ଗି ଦେଇଥିବା ଦେଖିବାକୁ ମିଳିଛି। ଜଣେ ସ୍ଥାନୀୟ ବାସିନ୍ଦା ନିଜ ନାଁ ଗୋପନ ରଖି କହିଛନ୍ତି, ରାତି ହେଲେ ଏଠାରେ ଅସାମାଜିକ ବ୍ୟକ୍ତିମାନଙ୍କ ଆଡ୍ଡା ଜମୁଛି। ପୂର୍ବରୁ ପାଟ୍ରୋଲିଂ ହେଉଥିଲା। ବର୍ତ୍ତମାନ ବନ୍ଦ ରହିଛି। ପେଟ୍ରୋଲିଂ କରାଗଲେ ଏଥିରେ ଅଙ୍କୁଶ ଲାଗିପାରନ୍ତା ବୋଲି ସେ କହିଥିଲେ। ଏ ନେଇ ରଘୁନାଥପାଲ୍ଲୀ ଥାନା ଏସ୍ଆଇ ସରୋଜ କୁମାର ବେହେରାଙ୍କୁ ପଚାରିବାରୁ ସେ କହିଲେ, ପାଟ୍ରୋଲିଂ ନିୟମିତ କରାଯାଉଛି। ଏଭଳି କାର୍ଯ୍ୟ କରୁଥିବା ବ୍ୟକ୍ତିଙ୍କୁ ଧରିବା ପାଇଁ ପ୍ରୟାସ ହେଉଛି। ଆଗକୁ ପାଟ୍ରୋଲିଂ ଜୋରଦାର କରାଯିବ ବୋଲି ସେ କହିଥିଲେ।