ସମ୍ବଲପୁର, ୧୫।୬ (ଶୁଭାଶିଷ ପାଢୀ) ଘରେ ଘରେ ଜଳ ପହଞ୍ଚାଇବା ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ଯୋଜନା ସମ୍ବଲପୁର ମହାନଗର ନିଗମ ୪୦ ନମ୍ବର ୱାର୍ଡ ମାନେଶ୍ୱର ବାସୀଙ୍କ ପାଇଁ ଅପହଞ୍ଚ ହୋଇରହିଛି। ପ୍ରାୟ ୧୫ବର୍ଷ ଧରି ମାନେଶ୍ୱର ମାଳତୀ ନଦୀରେ ଏକ ବ୍ୟାରେଜ ନିର୍ମାଣ କରି ମାନେଶ୍ୱର ସମେତ ସହରକୁ ଜଳ ଯୋଗାଣ କରିବାକୁ ଯୋଜନା କରଯାଇଥିଲା। ହେଲେ ଏହା ଶୀତଳ ଭଣ୍ଡାରରେ ରହିଛି।
ୱାର୍ଡବାସୀଙ୍କ ଅଭିଯୋଗ କ୍ରମେ ମାନେଶ୍ୱର ପଞ୍ଚାୟତରେ ପାନୀୟ ଜଳ ସମସ୍ୟା ଲାଗିରହିଛି। ଭୂତଳଜଳ ହ୍ରାସ ଯୋଗୁ ବୋରୱେଲ ଖୋଳିଲେ ସଫଳ ହେଉ ନାହିଁ। ତେଣୁ ପିଏଚ୍ଡି ପାଣି ଉପରେ ଲୋକଙ୍କ ଭରସା। ମାନେଶ୍ୱର, ହାଲିପାଲି, ବ୍ରାହ୍ମଣିପାଲି, ମିର୍ଗାମୁଣ୍ଡା, ମାନେଶ୍ୱର ହରିଜନପଡା, ପୂଜାରୀପଡା, ସୁଡୁଙ୍ଗା ଭଳି ଗ୍ରାମ ଗୁଡିକରେ ପାଣି ସମସ୍ୟା ସଙ୍ଗିନ। ମାଳତୀ ନଦୀରେ ଇନ୍ଟେକ୍ ୱେଲ କରାଯାଇ ପିଏଚ୍ଡି ବିଭାଗ ପକ୍ଷରୁ କେତେକ ଗ୍ରାମକୁ ପାଣି ଦିଆଯାଉଥିଲା। ବୃହତ ପାନୀୟ ଜଳ ପ୍ରକଳ୍ପ ସମ୍ପୂର୍ଣ୍ଣ ହୋଇ ନାହିଁ। ହେଲେ ମଧ୍ୟ ଲୋକମାନଙ୍କ ସୁବିଧା ପାଇଁ ପାଣି ଛଡାଯାଉଥିଲା। ଏବେ ମାଳତୀ ନଦୀ ଶୁଖିଲା ପଡିଥିବାରୁ ପାଣି ଯୋଗାଣ ବନ୍ଦ ହୋଇଯାଇଛି। କେବଳ ମାନେଶ୍ୱର ନୁହେଁ, ଏହି ଇନ୍ଟେକ ୱେଲରୁ ନକ୍ସାପାଲି, ଭତରା, ମଠପାଲି ପର୍ଯ୍ୟନ୍ତ ପାଣି ଯୋଗାଣ ହେଉଥିଲା। ଏବେ ନିର୍ଭର କରୁଥିବା ସମସ୍ତ ଅଞ୍ଚଳରେ ଜଳକଷ୍ଟ ଦେଖାଦେଇଛି। ଏହି ପ୍ରକଳ୍ପ ଆରମ୍ଭ ସମୟରେ ପିଏଚ୍ଡି ପକ୍ଷରୁ ଗୋଟିଏ ପମ୍ପ୍ ହାଉସ ଖରାପ ହେଲେ କିମ୍ବା ପାଣି ସମସ୍ୟା ହେଲେ ନିକଟସ୍ଥ ପମ୍ପ ହାଉସରୁ ପାଣି ପମ୍ପିଂ କରି ଯୋଗାଣ କରାଯିବ ବୋଲି କୁହାଯାଇଥିଲା। ହେଲେ ନଦୀ ଶୁଖିଲା ଯୋଗୁ ଏବେ ମାନେଶ୍ୱର ଇନ୍ଟେକ ୱେଲରୁ ପାଣି ଯୋଗାଣ ବନ୍ଦ ହୋଇଛି। ଏପରି ସମୟରେ ନିକଟସ୍ଥ ପମ୍ପହାଉସରୁ କିଭଳି ପାଣି ଯୋଗାଇ ଦିଆଯାଉ ନାହିଁ ବୋଲି ପ୍ରଶ୍ନ ଉଠୁଛି। ଏସବୁକୁ ଦୃଷ୍ଟିରେ ରଖି ଚଳିତ ବର୍ଷ ସରକାର ଅନୁଦାନ ଦେଇ ମାଳତୀ ନନୀରେ ଏକ ବ୍ୟାରେଜ ନିର୍ମାଣ କରି ପାନୀୟ ଜଳ ସମସ୍ୟା ଦୂର କରିବାକୁ ଅଞ୍ଚଳବାସୀ ଦାବି କରିଛନ୍ତି। ଏ ସମ୍ପର୍କରେ ପିଏଚ୍ଡି ନିର୍ବାହୀଯନ୍ତ୍ରୀ ପରମେଶ୍ୱର ଦାସ କହିଛନ୍ତି, ନଦୀ ଶୁଖିଲା ଥିବାରୁ ଜଳ ଯୋଗାଣ ବନ୍ଦ ହୋଇଛି। ଏବେ ଗାଡି ଯୋଗେ ପାନୀୟ ଜଳ ଦିଆଯାଉଛି। ୨ଦିନ ଭିତରେ ଅନ୍ୟ ପମ୍ପହାଉସରୁ ପମ୍ପିଂ କରି ପାଣି ଦିଆଯିବାକୁ ଯୋଜନା ରହିଛି ବୋଲି ସେ କହିଥିଲେ ା