ଝୁମ୍ପୁରୀ,୧୯ା୭(ଡି.ଏନ୍.ଏ.):ଦଶରଥପୁର ବ୍ଲକ୍ ଖଣ୍ଡରା ପଞ୍ଚାୟତସ୍ଥ ଧମଧଡ଼ା ପ୍ରାଥମିକ ବିଦ୍ୟାଳୟକୁ ସଂଯୋଗ କରୁଥିବା ରାସ୍ତାଟି ଏବେ ମରଣଯନ୍ତା ସାଜିଥିବା ଦେଖିବାକୁ ମିଳିଛି। ସରକାର ଗମନାଗମନର ସୁବିଧା ପାଇଁ ବିପୁଳ ଟଙ୍କା ଖର୍ଚ୍ଚ କରିବା ସହ ବିଦ୍ୟାଳୟ, ଅଙ୍ଗନୱାଡି ଓ କଲେଜ ଆଦି ରାସ୍ତାଗୁଡ଼ିକୁ ପ୍ରାଥମିକତା ଦେଉଛନ୍ତି। ମାତ୍ର ଧମଧଡ଼ା ବିଦ୍ୟାଳୟ ରାସ୍ତା କ୍ଷେତ୍ରରେ ଏହାର ବ୍ୟତିକ୍ରମ ଦେଖାଦେଇଛି। ବର୍ଷାହେଲେ ଉକ୍ତ ରାସ୍ତା ବୁଡ଼ିଯାଉଥିବାରୁ ଛାତ୍ରୀଛାତ୍ର ଅଧିକାଂଶ ସମୟରେ ବିଦ୍ୟାଳୟକୁ ଆସିପାରୁନାହାନ୍ତି। ବିକାଶର ଶୀର୍ଷରେ ଯାଜପୁର ଜିଲା ଆଗେଇ ଚାଲିଛି। ତେବେ ଜିଲା ସଦରମହକୁମାରୁ ଏହି ରାସ୍ତାଟି ମାତ୍ର ୪ କି.ମି. ଦୂରତାରେ ହୋଇଥିବାବେଳେ ଜିଲା ପ୍ରଶାସନ କିମ୍ବା ବ୍ଲକ୍ ପ୍ରଶାସନର ଦୃଷ୍ଟି ପଡୁ ନ ଥିବାରୁ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଉକ୍ତ ରାସ୍ତାଦେଇ ଧମଧଡ଼ା ଗ୍ରାମବାସୀ ମୁଖ୍ୟ ରାସ୍ତାକୁ ଆସୁଛନ୍ତି। ମାତ୍ର ରାସ୍ତାର ଏପରି ଅବସ୍ଥା ନେଇ ସେମାନେ ଉଦ୍ବେଗ ପ୍ରକାଶ କରିଛନ୍ତି। ତେଣୁ ତୁରନ୍ତ ଉକ୍ତ ରାସ୍ତା ମରାମତି ଦିଗରେ ପଦକ୍ଷେପ ନେବାକୁ ଗ୍ରାମବାସୀଙ୍କ ପକ୍ଷରୁ ଜିଲାପାଳଙ୍କ ନିକଟରେ ଦାବି କରାଯାଇଛି।