ପ୍ରୀତିପୁର,୧୪ା୪(ଡି.ଏନ.ଏ.): ବିଞ୍ଝାରପୁର ବ୍ଲକ ଅଧୀନ ଫଳପୁର ଆର୍ଡି ରାସ୍ତାଠାରୁ ଅଣ୍ଡାଳୋ ଓ ବଳଭଦ୍ରପୁର ପର୍ଯ୍ୟନ୍ତ ଗ୍ରାମ୍ୟ ଉନ୍ନୟନ ବିଭାଗ ରାସ୍ତା ମରଣଯନ୍ତା ପାଲଟିଛି। ଏହି ରାସ୍ତାର ଦୂରବସ୍ଥା ଜଣେ ନ ଦେଖିଲେ ବିଶ୍ୱାସ କରିପାରିବେନାହିଁ। ରାସ୍ତା ଏଭଳି ଜରାଜୀର୍ଣ୍ଣ ହୋଇପଡିଛି ଯେ, ଲୋକେ ଚାଲିକି ଗଲେ ବି ଖଣ୍ଡିଆ ଖାବରା ହେଉଛନ୍ତି। ପ୍ରତିଦିନ ଗାଡ଼ିମୋଟର ଦୁର୍ଘଟଣା ହେଉଛି। ଏହା ଏକ ଅଣଚଉଡ଼ା ରାସ୍ତା। ଏବେ ଗଁାକୁ ପାନୀୟ ଜଳ ପ୍ରକଳ୍ପ ପାଇଁ ପାଇପ୍ ବିଛା ଯାଉଥିବାରୁ କଂକ୍ରିଟ ରାସ୍ତାକୁ ଠିକାଦାର ଭାଙ୍ଗି ନଷ୍ଟ କରିଦେଇଛନ୍ତି। ଫଳରେ ଏହି ଗ୍ରାମରେ ବସବାସ କରୁଥିବା ଦୁଇ ଶହରୁ ଅଧିକ ପରିବାର ଗମନାଗମନ କ୍ଷେତ୍ରରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଛୋଟ ପିଲାମାନେ ଦୁର୍ଘଟଣା ଭୟରେ ସ୍କୁଲକୁ ଯିବା ବନ୍ଦ କରିଦେଇଛନ୍ତି। ଗମନାଗମନ ବିକଳ୍ପ ରାସ୍ତା ନ ଥିବାରୁ ଏହି ଜରାଜୀର୍ଣ୍ଣ କଂକ୍ରିଟ ରାସ୍ତାରେ ଚାଲିବା ଲୋକଙ୍କ ପାଇଁ ବହୁତ କଷ୍ଟକର ହେଉଛି। ଠିକାଦାର ଅତି ନିମ୍ନମାନର କାର୍ଯ୍ୟ କରିବା ଯୋଗୁ ରାସ୍ତାର ସ୍ଥାୟିତ୍ୱ ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ରାସ୍ତାର ପୁନଃ ନିର୍ମାଣ ନିମନ୍ତେ ଜିଲାପାଳ ଓ ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀଙ୍କୁ ଗ୍ରାମର କୈଳାସ ମଳିକ, ପ୍ରତାପ ମଳିକ, ରବୀନ୍ଦ୍ର ପଣ୍ଡା, ବିଜୟ ମଳିକ, ଅମୂଲ୍ୟ ବଳ, ତପନ ପଣ୍ଡା, ସୁଧାକର ମଳିକ, ଇନ୍ଦ୍ରମଣି ମଳିକ, ମଳୟ ପଣ୍ଡା, ଘନଶ୍ୟାମ ମଳିକ ଓ କାହ୍ନୁ ମଳିକ ପ୍ରମୁଖ ଦାବିପତ୍ର ପ୍ରଦାନ କରିଛନ୍ତି। ଯଦି ରାସ୍ତା ପୁନଃ ନିର୍ମାଣ କାର୍ଯ୍ୟ ଆରମ୍ଭ ନ ହୁଏ, ତେବେ ଗ୍ରାମବାସୀ ରାଜରାସ୍ତାକୁ ଓଲ୍ଲାଇବେ ବୋଲି ଚେତାବନୀ ଦେଇଛନ୍ତି।
