ଭଞ୍ଜନଗର,୧୨।୧୦(ଡି.ଏନ.ଏ): ଭଞ୍ଜନଗର ଅଞ୍ଚଳରେ ଗତ ୫ଦିନ ହେବ ତୁହାକୁ ତୁହା ବର୍ଷା ହେଉଛି। ଏହାଦ୍ୱାରା ଲୋକେ ବିଶେଷ ଅସୁବିଧାର ସମ୍ମୁଖୀନ ହେଉଛନ୍ତି। ମଙ୍ଗଳବାର ଅପରାହ୍ନରେ ଭଞ୍ଜନଗର ଅଞ୍ଚଳରେ ଘଡ଼ଘଡ଼ି ସହ ପ୍ରବଳ ବର୍ଷା ହୋଇଥିଲା। ବର୍ଷା ଯୋଗୁ ବିଜୁଳି ଲୁଚକାଳି ଖେଳୁଛି। ଅନ୍ୟପଟେ ମାଟି ରାସ୍ତାରେ ଲୋକେ ଯାତାୟତ କରିବା ସମୟରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି। ବ୍ଲକ ଅଧ୍ୟକ୍ଷ ନରୀସଭା ନାୟକଙ୍କ ବାଇବାଲି ପଞ୍ଚାୟତର ବରଗଁା ମହୁଲପଲ୍ଲୀ,କୋଳିସାହି, ସଲପଗୁଡ଼ା, ବରଗଁା, ବେଣିଆପଲ୍ଲୀ, ଚାଞ୍ଚରାଗଡ଼ ସମେତ ଅନେକ ଗ୍ରାମ ରାସ୍ତା ଶୋଚନୀୟ ହୋଇ ପଡ଼ିଛି। ବର୍ଷା ସମୟରେ ଉକ୍ତ ଅଞ୍ଚଳବାସୀ ଗମନାଗମନରେ ବହୁ ଅସୁବିଧା ଭୋଗୁଛନ୍ତି। ପ୍ରଶାସନ ଉକ୍ତ ରାସ୍ତାର ବିକାଶ ପ୍ରତି ବିଶେଷ ଧ୍ୟାନ ଦେଉ ନ ଥିବା ସମ୍ପୃକ୍ତ ପଞ୍ଚାୟତବାସୀ ଅଭିଯୋଗ କରିଛନ୍ତି । ଗତ ପଞ୍ଚାୟତ ନିର୍ବାଚନରେ ବିଜେଡି ଏଠାରୁ ଅଧ୍ୟକ୍ଷ ପଦବୀ ଦେଇଥିଲା । କିନ୍ତୁ ପ୍ରଶାସନ ପଞ୍ଚାୟତର ବିକାଶ ପ୍ରତି ଯେତିକି ଦୃଷ୍ଟି ଦେବାକଥା ଦେଉନାହିଁ। ବରଗଁାରେ ୫୦ରୁ ଉର୍ଦ୍ଧ୍ୱ ପରିବାର ବସବାସ କରୁଛନ୍ତି । ବର୍ଷା ଦିନେ ଛାତ୍ରୀଛାତ୍ରମାନେ ବିଦ୍ୟାଳୟକୁ ଯିବା ସମୟରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ପ୍ରଶାସନ ଲୋକଙ୍କ ସମସ୍ୟା ପ୍ରତି ଦୃଷ୍ଟିଦେଇ ତୁରନ୍ତ ଆବଶ୍ୟକ ପଦକ୍ଷେପ ନେବାପାଇଁ ଗ୍ରାମବାସୀ ଦାବି କରିଛନ୍ତି । ଏ ନେଇ ବ୍ଲକ ସହକାରୀ ନିର୍ବାହୀଯନ୍ତ୍ରୀ ଶ୍ୟାମଘନ ପ୍ରଧାନଙ୍କୁ ପଚାରିବାରେ ସେ କହିଛନ୍ତି, ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପକ୍ଷର ଏମ୍ଜିଏନ୍ଆର୍ଇଜିଏସ୍ରେ କିଛି ମାଟି ରାସ୍ତାର ଉନ୍ନତୀକରଣ ପାଇଁ ଗତ ସପ୍ତାହରେ ଅନୁମୋଦନ ମିଳିଛି । ସେଥିରେ ଉକ୍ତ ପଞ୍ଚାୟତର ରାସ୍ତା ଥିଲେ ମରାମତି ହେବ । ୧୦ମାସ ହେଲା କଂକ୍ରିଟ୍ ରୋଡ଼ ପାଇଁ ଅନୁଦାନ ଆସିନାହିଁ । ପୁରୁଣା ଟଙ୍କା ଯେଉଁ ପଞ୍ଚାୟତରେ ଥିଲା ତାହାର କାମ କରାଯାଉଛି। ଲୋକଙ୍କ ଗମନାଗମନ ସୁବିଧା ପାଇଁ ସବୁ ପ୍ରକାର ପଦକ୍ଷେପ ନିଆଯାଉଛି ବୋଲି ପ୍ରଧାନ କହିଛନ୍ତି ।
