ସାଲେପୁର,୪।୪ (ଅରବିନ୍ଦ ଭୂୟଁା)ସାଲେପୁର ବିଧାନସଭା ନିର୍ବାଚନ ମଣ୍ଡଳୀରେ ଜୁନ୍ ୧ ତାରିଖରେ ଭୋଟ ଗ୍ରହଣ ହେବ। ଏହି ନିର୍ବାଚନରେ ସାଲେପୁର ବ୍ଲକ୍ର ବଲ୍ଲଭପୁର ପ୍ରାଥମିକ ବିଦ୍ୟାଳୟ ବୁଥ୍ ନଂ. ୨୨୩ରେ ବଲ୍ଲଭପୁର, ନଈଗୁଅଁା ଓ ବାଲିଆ ରାଜସ୍ବ ଗ୍ରାମର ପ୍ରାୟ ୧୨ଶହରୁ ଊର୍ଦ୍ଧ୍ୱ ଭୋଟର ମତଦାନ କରିବାକୁ ଆସିବେ। ଏହି ଭୋଟଗ୍ରହଣ କେନ୍ଦ୍ରକୁ ଯିବାପାଇଁ ୫ନଂ. କେନାଲ ବନ୍ଧ ରାସ୍ତା ଯାହାକି ଶିଶୁଆ-ମଢ଼ଙ୍ଗା ଭାୟା ଛାଣିପୁରକୁ ଅନ୍ତର୍ଭୁକ୍ତ କରାଯାଇ ୧୯।୯।୨୦୨୨ରୁ କାର୍ଯ୍ୟ ଆରମ୍ଭ ହୋଇଥିଲା। ଏଥି ନିମନ୍ତେ ଠିକାଦାର ରୂପେ ଡିପିଏସ୍ କନ୍ଷ୍ଟ୍ରକ୍ସନ୍ ପ୍ରାଇଭେଟ୍ ଲିମିଟେଡ୍ କାର୍ଯ୍ୟ ଆରମ୍ଭ କରିଥିଲା। ଗ୍ରାମ୍ୟ ନିର୍ମାଣ ବିଭାଜନ-୧ ଅଧୀନରେ ହେଉଥିବା ଏହି କାର୍ଯ୍ୟର ଶେଷ ଅବଧି ୧୮ା୮ା୨୦୨୩ ରହିଥିବାବେଳେ ଉକ୍ତ ଠିକାଦାର ଫେବୃଆରୀ ୨୦୨୪ରୁ କାର୍ଯ୍ୟ ଅଧାପନ୍ତରିଆ ଭାବେ ପକାଇ ଛାଡି ପଳାଇ ଯାଇଛନ୍ତି। ବିଶେଷକରି ବଲ୍ଲଭପୁର ରାଜସ୍ବ ଗ୍ରାମ ନିକଟରେ ରାସ୍ତାଟିକୁ ବନ୍ଧର ମାଟି ତାଡ଼ି ଦିଆଯାଇଥିବାରୁ ଖାଲଖମା ସୃଷ୍ଟି ହୋଇଛି। ଫଳରେ ସମ୍ପୃକ୍ତ ରାସ୍ତାରେ ପାଦରେ ଚାଲି କରି ଯିବା ଅସମ୍ଭବ। ଏଥିପ୍ରତି ଗ୍ରାମ୍ୟ ନିର୍ମାଣ ବିଭାଜନ-୧ ଏଥିପ୍ରତି ଆଦୌ ଦୃଷ୍ଟି ଦେଉନାହିଁ ବୋଲି ଅଭିଯୋଗ ହେଉଛି। ୨୦୨୪ ସାଧାରଣ ନିର୍ବାଚନ ପୂର୍ବରୁ ବଲ୍ଲଭପୁର ଭୋଟ ଗ୍ରହଣ କେନ୍ଦ୍ର ଭୋଟରଙ୍କ ବୃହତର ସ୍ବାର୍ଥକୁ ଦୃଷ୍ଟି ଦେବାର ଆବଶ୍ୟକତା ରହିଛି। ଏ ଦିଗରେ ଜିଲା ପ୍ରଶାସନ ବିଭାଗୀୟ ଅଧିକାରୀମାନେ ଦୃଷ୍ଟି ଦେଇ ଯୁଦ୍ଧକାଳୀନ ଭିତ୍ତିରେ ରାସ୍ତା କାର୍ଯ୍ୟ ସମ୍ପାଦନ କରିବାକୁ ପୂର୍ବତନ ଜିଲାପରିଷଦ ସଭ୍ୟ ଚିରଞ୍ଜନ ମହାନ୍ତି ଦାବି କରିଛନ୍ତି।