ରଣପୁର,୧୦ା୧୧(ସ୍ବ.ପ୍ର.): ନୟାଗଡ଼ ଜିଲା ରଣପୁରରେ ରହିଛି ମା’ମଣିନାଗଙ୍କ ପୀଠ। ସେହି ପୀଠକୁ ଆସୁଥିବା ପର୍ଯ୍ୟଟକଙ୍କ ସୁରକ୍ଷା ପାଇଁ ପାହାଡ଼ କାଟି ୪ କୋଟି ଟଙ୍କା ବ୍ୟୟରେ ତଳ ମଣିନାଗରୁ ଉପର ମଣିନାଗକୁ ନିର୍ମିତ ହୋଇଥିବା ୫ କିଲୋମିଟର ପିଚୁ ରାସ୍ତା ପାହାଡ଼ ପାଣିରେ ଧୋଇ ହୋଇଯାଇଛି । ନିମ୍ନମାନର କାମ ତଥା ବିନା ପ୍ଲାନ୍ରେ ରାସ୍ତା ନିର୍ମାଣ ହୋଇଥିବାରୁ ଏପରି ପରିସ୍ଥିତି ସୃଷ୍ଟି ହୋଇଛି ବୋଲି ଅଭିଯୋଗ ହୋଇଛି । ଏବେ ରାସ୍ତାଟି ମରଣଯନ୍ତା ପାଲଟିଛି । ଏଥିପାଇଁ ସ୍ଥାନୀୟ ଲୋକେ ପ୍ରଶାସନକୁ ଦାୟୀ କରିଛନ୍ତି । ଉକ୍ତ କେନ୍ଦ୍ରକୁ ପର୍ଯ୍ୟଟନ ସ୍ଥଳୀର ମାନ୍ୟତା ଦେବା ସହିତ ମଣିନାଗ ପୀଠର ବିକାଶ ପାଇଁ ଦାବି ହୋଇଛି । ଅନ୍ୟପକ୍ଷେ ଗାର୍ଡୱାଲ ନ ଥିବାରୁ ବର୍ଷାଦିନେ ପାହାଡ଼ କ୍ଷୟ ହେବାରେ ଲାଗିଛି । ଏମିତି କିଛିଦିନ ଚାଲିଲେ ପାହାଡ଼ ଧସିବାର ଆଶଙ୍କା ବଢ଼ିଛି ।
ସୂଚନା ଅନୁଯାୟୀ, ୨୦୧୩ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭିତ୍ତିପ୍ରସ୍ତର ସ୍ଥାପନ ପରେ ରଣପୁର ଗ୍ରାମ୍ୟ ଉନ୍ନୟନ ବିଭାଗ ଉକ୍ତ ରାସ୍ତା ନିର୍ମାଣ କରିଥିଲା । ନିମ୍ନମାନର କାମ ତଥା ଆବଶ୍ୟକ ରକ୍ଷଣାବେକ୍ଷଣ ଅଭାବରୁ ତାହା କିଛି ମାସ ବି ତିଷ୍ଠି ରହି ପାରି ନ ଥିଲା । ପ୍ରଥମେ ଉକ୍ତ ରାସ୍ତାରୁ ପିଚୁ ଉଠି ମେଣ୍ଟାଲ ଦିଶିଲା । ରାସ୍ତାରେ ବଡ ବଡ ଗାତ ସୃଷ୍ଟି ହୋଇଥିଲା । ଏହାପରେ ଗ୍ରାମ୍ୟ ଉନ୍ନୟନ ବିଭାଗ ୨୦୨୧ରେ ରଣପୁର ଏନ୍ଏସିକୁ ଉକ୍ତ ରାସ୍ତାକୁ ହସ୍ତାନ୍ତର କରି ନିଜ ଦାୟିତ୍ୱରୁ ମୁକ୍ତ ହେଲା । ସେହିପରି ରଣପୁର ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ତରଫରୁ ସେହି ପୀଠରେ ପାନୀୟ ଜଳ ଯୋଗାଣ ଲାଗି କାମ ଆରମ୍ଭ ହୋଇଥିଲା । ସରକାର ଏଥିପାଇଁ ୧କୋଟି ଟଙ୍କା ମଞ୍ଜୁର କରିଥିଲେ । ହେଲେ ସେହି କାମ ଅଧାରୁ ବନ୍ଦ ରହିଛି ।
ସମୁଦ୍ର ପତ୍ତନରୁ ପ୍ରାୟ ସାଢ଼େ ୩ ହଜାର ଫୁଟ ଉଚ୍ଚରେ ରହିଥିବା ଏହି ମନ୍ଦିରର ବିକାଶ ପ୍ରତି ଗୁରୁତ୍ୱ ଦିଆଯାଇନାହିଁ । ଏ ନେଇ ରଣପୁର ମା’ମଣିନାଗ ସେନାର ସମ୍ପାଦକ ଜାନକୀ ବଲ୍ଲଭ ମହାପାତ୍ର କୁହନ୍ତି, ଉପର ମଣିନାଗକୁ ନିର୍ମାଣ କରାଯାଇଥିବା ରାସ୍ତା ଅତିନିମ୍ନମାନର ହୋଇଥିଲା । ୪ କୋଟି ଟଙ୍କା ପାଣିରେ ପଡିଲା । ଠିକାଦାର ବିଭାଗୀୟ ଅଧିକାରୀଙ୍କ ମଧୁଚନ୍ଦ୍ରିକା ଯୋଗୁ ଏପରି ପରିସ୍ଥିତି ସୃଷ୍ଟି ହୋଇଛି । ବିଜ୍ଞାପିତ ଅଞ୍ଚଳ ପରିଷଦର ପୂର୍ବତନ ଉପାଧ୍ୟକ୍ଷ ପ୍ରିୟବ୍ରତ ପ୍ରହରାଜ କୁହନ୍ତି, ୧ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟ ଅଟ୍ଟକଳରେ ଉପର ମଣିନାଗକୁ ଜଳ ଯୋଗାଣ ପାଇ କାମ ଆରମ୍ଭ ହୋଇଥିଲା ା ଅଳ୍ପଦିନ କାମ ଚାଲିବା ପରେ ବନ୍ଦ ପଡିଛି । ସେ ଟଙ୍କା କୁଆଡେ ଗଲା ତାହାର ଭିଜିଲାନ୍ସ ତଦନ୍ତ କରାଗଲେ ସତ ପଦାକୁ ଆସିବ ା ରଣପୁରର ସନ୍ତୋଷ ମହାରଣା କୁହନ୍ତି, ରାସ୍ତା ଖରାପ ହୋଇଯିବାରୁ ବିଭିନ୍ନ ସମୟରେ ଛୋଟବଡ ଦୁର୍ଘଟଣା ଘଟୁଛି ା ସରକାର ତୁରନ୍ତ ରାସ୍ତା କାମ କରନ୍ତୁ । ମା’ମଣିନାଗ ମନ୍ଦିରର ପୂଜକ ଲଳିତ ରଥ କୁହନ୍ତି, ରାଜ୍ୟ ସରକାର ବିଭିନ୍ନ ମନ୍ଦିର ବିକାଶ କରୁଛନ୍ତି, କିନ୍ତୁ ରଣପୁର ମା’ଙ୍କ ମନ୍ଦିରର ବିକାଶ ନୁହେଁ ବିନାଶ କରାଯାଉଛି । ଏଥିପାଇଁ ସରକାର ତୁରନ୍ତ ପଦକ୍ଷେପ ନେବାକୁ ସେ ଦାବି କରିଛନ୍ତି ।