ଆଳି,୬।୫(ଡି.ଏନ.ଏ.): ଆଜିର ସଭ୍ୟ ସମାଜରେ ସମସ୍ତଙ୍କର ଜୀବନ ଜିଇବା ନିମନ୍ତେ ମୌଳିକ ଅଧିକାର ଥିବାବେଳେ କେନ୍ଦ୍ରାପଡ଼ା ଜିଲା ଆଳି ତହସିଲ ଅନ୍ତର୍ଗତ ବିଲିକଣା ଗଁାର ଜଣେ ଦଳିତ ପରିବାରକୁ ଏସବୁ ସୁବିଧାରୁ କେତେଜଣ ଯୁବକ ବଞ୍ଚତ୍ତ କରିଥିବା ଅଭିଯୋଗ ହୋଇଛି। ଗ୍ରାମର ଖଗେଶ୍ୱର ମଳିକଙ୍କ ପୁଅ ଗୋଲେଖଙ୍କ ଅଭିଯୋଗ ଅନୁଯାୟୀ, ସେ ବିଲିକଣା ଗ୍ରାମ ମୁଖ୍ୟରାସ୍ତା କଡ଼ରେ ନିଜ କିଣା ଜମି ଉପରେ ଦୀର୍ଘଦିନ ହେବା ଘରକରି ରହୁଛନ୍ତି। ଘର ସମ୍ମୁଖ ସରକାରୀ ରାସ୍ତାରେ ଯାତାୟାତ କରୁଥିଲେ। କିନ୍ତୁ ଗ୍ରାମର କେତେଜଣ ଯୁବକ ତାଙ୍କୁ ଏହି ରାସ୍ତାରେ ଯାତାୟାତ କରିବାକୁ ହେଲେ ଲକ୍ଷାଧିକ ଟଙ୍କା ଦେବାକୁ ପଡ଼ିବ ବୋଲି ଦାବି କରିଥିଲେ। ଗୋଲେଖଙ୍କ ପରିବାର ଲୋକ ଏତେ ପରିମାଣର ଅର୍ଥ ଦେବାକୁ ଅସମର୍ଥ ହେବାରୁ ଯୁବକମାନେ ଜେସିବି ଲଗାଇ ଯାତାୟାତ କରୁଥିବା ସରକାରୀ ରାସ୍ତାକୁ ଖୋଳି ଦେଇଛନ୍ତି। ଏଥିସହ ସେମାନଙ୍କ ଘରକୁ ଯାଇଥିବା ପାଣି ପାଇପ୍ ଲାଇନ୍ ମଧ୍ୟ କାଟି ଦିଆଯାଇଛି। ଫଳରେ ପରିବାର ଲୋକେ ଘରୁ ବାହାରିବା ନିମନ୍ତେ ଅସୁବିଧାର ସମ୍ମୁଖୀନ ହେଉଥିବା ବେଳେ ପାଣି ପାଇଁ ହନ୍ତସନ୍ତ ହେଉଛନ୍ତି। ପାଣି ଲାଗି ସେମାନଙ୍କୁ ଅନ୍ୟ ଗଁାକୁ ଯିବାକୁ ପଡୁଛି। ଏପ୍ରିଲ ୧୦ରେ ଏହି ଘଟଣା ଘଟିବା ପରେ ଗୋଲେଖ ଆଳି ଥାନାରେ ଗ୍ରାମର ୫ ଯୁବକଙ୍କ ନାମରେ ଅଭିଯୋଗ କରିଥିଲେ। ଏଥିସହ ନ୍ୟାୟ ଭିକ୍ଷା କରି ଆଳି ତହସିଲଦାର, ଏସ୍ପି ଓ ଜିଲାପାଳଙ୍କ ନିକଟକୁ ଅଭିଯୋଗପତ୍ର ପ୍ରେରଣ କରିଥିଲେ। ମାତ୍ର ଆଜିପର୍ଯ୍ୟନ୍ତ କୌଣସି ପ୍ରଶାସନିକ ଅଧିକାରୀ ତାଙ୍କ ନିକଟରେ ପହଞ୍ଚତ୍ ନ ଥିବା ସେ କ୍ଷୋଭର ସହ କହିଛନ୍ତି। ସେହି ଯୁବକମାନେ ସେମାନଙ୍କୁ ବିଭିନ୍ନ ସମୟରେ ଜୀବନରୁ ମାରିଦେବାକୁ ଧମକ ଦେଉଥିବା ମଧ୍ୟ ସେମାନେ ଅଭିଯୋଗ କରିଛନ୍ତି। ଏ ନେଇ ଉକ୍ତ ପଞ୍ଚାୟତ ସରପଞ୍ଚ କାନନ ବିହାରୀ ପରିଡ଼ାଙ୍କୁ ପଚାରିବାରୁ ସେ ଘଟଣା ସମ୍ପର୍କରେ ଶୁଣିଛନ୍ତି, ଘଟଣାସ୍ଥଳ ପରିଦର୍ଶନ କରି ବାସ୍ତବ ଘଟଣା କ’ଣ ଜାଣିବା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି। ଏ ନେଇ ତହସିଲଦାର ଦେବୀ ପ୍ରସାଦ ଆଚାର୍ଯ୍ୟଙ୍କୁ ପଚାରିବାର ଏଭଳି ଅଭିଯୋଗ ପାଇନାହିଁ, ଆପଣଙ୍କ ନିକଟରୁ ଜାଣିବା ପରେ ଶନିବାର ସକାଳେ ଘଟଣାସ୍ଥଳରେ ପହଞ୍ଚତ୍ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବି ବୋଲି ପ୍ରତିଶ୍ରୁତି ଦେଇଛନ୍ତି। ଏଠାରେ ପ୍ରଶ୍ନ ଉଠୁଛି ଯେ, ସରକାରୀ ଜମି ଉପରେ ସରକାରଙ୍କର ଯେତିକି ଅଧିକାର ସାଧାରଣ ଲୋକଙ୍କ ମଧ୍ୟ ସେତିକି ଅଧିକାର ରହିଛି। କେଉଁ ଅଧିକାର ବଳରେ ଗୋଲେଖଙ୍କ ନିକଟରୁ ଗ୍ରାମର କେତେଜଣ ଯୁବକ ଟଙ୍କା ମାଗିଥିଲେ, ସେ ଟଙ୍କା ନ ଦେବାରୁ ତାଙ୍କୁ ଏଭଳି ଅସୁବିଧାରେ ପକାଇଥିଲେ। ଏହି ଘଟଣାକୁ ନେଇ ବିଲିକଣା ଗ୍ରାମର ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି।