ରାଉରକେଲା,୨୯।୧୨(ଦିନେଶ ମିଶ୍ର): ରାଉରକେଲାରେ ପୁରୁଷ ହକି ବିଶ୍ୱକପ୍ ସମୟରେ ସ୍ଥାନୀୟ ପ୍ରଶାସନ ପକ୍ଷରୁ ସହରର ସୌନ୍ଦର୍ଯ୍ୟକରଣ କରାଯାଇଥିଲା। ଏହି କ୍ରମରେ ରିଂରୋଡ୍ରେ ଆଲୋକୀକରଣ ବ୍ୟବସ୍ଥା ସାଙ୍ଗକୁ ବିଭିନ୍ନ ଛକରେ ଷ୍ଟାଚ୍ୟୁମାନ ନିର୍ମାଣ କରାଯାଇଥଲା। ତେବେ ରକ୍ଷଣାବେକ୍ଷଣ ଅଭାବରୁ ବର୍ଷେ ନ ପୁରୁଣୁ ଏହି ଷ୍ଟାଚ୍ୟୁଗୁଡିକ ଭାଙ୍ଗିଗଲାଣି। ଏହା ରାଉରକେଲା ପାୱାରହାଉସ୍ ରିଂରୋଡ୍ ଓ ହନୁମାନ ବାଟିକା ଛକରେ ଦେଖିବାକୁ ମିଳିଛି। ଫଳରେ ଏହିସବୁ କାମର ମାନକୁ ନେଇ ନାନା ପ୍ରଶ୍ନ ଉଠିଛି।
ସୂଚନା ଅନୁସାରେ, ପାୱାରହାଉସ୍ ରିଂରୋଡ୍ ଛକ ରାସ୍ତାକଡ଼ରେ ଦର୍ଶକ ଓ ଖେଳାଳିମାନଙ୍କୁ ଆକୃଷ୍ଟ କରିବା ପାଇଁ ଏକ ଚିତାବାଘ, ହରିଣ, ମାଙ୍କଡର ସିମେଣ୍ଟ ଷ୍ଟାଚ୍ୟୁ କରାଯାଇଥିଲା। ଉକ୍ତ ଷ୍ଟାଚ୍ୟୁତଳେ ସ୍ବତନ୍ତ୍ର ଆଲୋକୀକରଣ ହୋଇଥିଲା। ଏହି ବାଟ ଦେଇ ବାଟୋଇମାନେ ଉକ୍ତ ସ୍ଥାନରେ ଅଟକି କିଛି ସମୟ ସେଲ୍ଫି ଉଠାଇବାର ମଜା ନେଉଥିଲେ। ସ୍ଥାନୀୟ ପ୍ରଶାସନ ପକ୍ଷରୁ ହକି ବିଶ୍ୱକପ୍କୁ ନେଇ ବିଭିନ୍ନ ଉନ୍ନତିମୂଳକ କାମ ଯୋଗୁ ସହରବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା। ମାତ୍ର ହକି ବିଶ୍ୱକପ୍ ସରିବା ପରେ ରକ୍ଷଣାବେକ୍ଷଣ ଅଭାବ ଯୋଗୁ ବର୍ତ୍ତମାନ ସେଗୁଡିକ ଅବ୍ୟବସ୍ଥାରେ ପଡି ରହିଛି। ଏହି ଛକରେ ଷ୍ଟାଚ୍ୟୁ ତଳେ ଲାଗିଥିବା ବହୁ ଲାଇଟ୍ ଜଳୁନାହିଁ। ମାଙ୍କଡ ଷ୍ଟାଚ୍ୟୁର ହାତ ଭାଙ୍ଗିଯାଇଛି। ସେହିଭଳି ହରିଣର ସିଙ୍ଗ ଓ ଲାଞ୍ଜ ଖସି ଯାଇଥିବାବେଳେ ବାଘ ଷ୍ଟାଚ୍ୟୁ ଭଗ୍ନ ଅବସ୍ଥାରେ ରହିଛି। ଅବହେଳିତ ହୋଇ ପଡି ରହିଥିବା ଷ୍ଟାଚ୍ୟୁ ପଛପଟେ ବିଭିନ୍ନ ସମୟରେ ଅସାମାଜିକଙ୍କ ଆଡ୍ଡା ଜମୁଛି।
ହନୁମାନ ବାଟିକା ଛକରେ ଥିବା ସେଲ୍ପି ପଏଣ୍ଟ ଷ୍ଟାଚ୍ୟୁ ଅଚଳ ହୋଇପଡିଛି। ସେଠାରେ ଥିବା ୱାଟର ଫାଉଣ୍ଟେନ ମଧ୍ୟ କାର୍ଯ୍ୟ କରୁନାହିଁ। ବୁଲାପ୍ରାଣୀ ପଶି ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛନ୍ତି। ସେହିପରି ଛେଣ୍ଡ ସ୍ଥିତ ବିର୍ସା ମୁଣ୍ଡା ଅନ୍ତର୍ଜାତୀୟ ଷ୍ଟାଡିୟମ ନିକଟରେ ଫୁଟ୍ପାଥରେ ସୌନ୍ଦର୍ଯ୍ୟକରଣ ପାଇଁ ଲାଗିଥିବା ପଭେର ବ୍ଲକ୍ଗୁଡିକ ଅଧାରୁ ଅଧିକ ଉଠିଯାଇଛି। ନିମ୍ନମାନର ତରବରିଆ କାମ ପାଇଁ ଏଭଳି ପରିସ୍ଥିତି ଉପୁଜୁଥିବା ସାଧାରଣରେ ଚର୍ଚ୍ଚା ହେଉଛି। ତେଣଉ ଏହାର ପୁନରୁଦ୍ଧାର କରିବାକୁ ଦାବି ହୋଇଛି। ଏ ନେଇ ଆରଏମ୍ସି କମିଶନର ଡ. ଶୁଭଙ୍କର ମହାପାତ୍ରଙ୍କୁ ପଚାରିବାରୁ ସେ କହିଥିଲେ, ହକି ବିଶ୍ୱକପ୍ ସମୟରେ ସହରର ରାସ୍ତାକଡ ଓ ଛକମାନଙ୍କରେ ତିଆରି ହୋଇଥିବା ଷ୍ଟାଚ୍ୟୁର ରକ୍ଷଣାବେକ୍ଷଣ ପାଇଁ ଆମେ ସଜାଗ ରହିଛୁ। ପ୍ରଥମ ପର୍ଯ୍ୟାୟରେ ୬ ମାସ ତଳେ ଛେଣ୍ଡ ଓ ଷ୍ଟାଡିୟମ ପାଖ ଅଞ୍ଚଳ ସହ ଏୟାରପୋର୍ଟକୁ ସଂଯୋଗ କରୁଥିବା ରିଂରୋଡ୍ର ଷ୍ଟାଚ୍ୟୁକୁ ପୁନରୁଦ୍ଧାର କରାଯାଇଛି। ଦ୍ୱିତୀୟ ପର୍ଯ୍ୟାୟରେ ଆସନ୍ତା ଫେବୃଆରୀ ମାସରେ ଏହିସବୁ ଷ୍ଟାଚ୍ୟୁ କାର୍ଯ୍ୟ ଶେଷ କରାଯିବ ବୋଲି ମହାପାତ୍ର କହିଥିଲେ।