ଠାକୁରମୁଣ୍ଡା,୩୧।୫(ଡି.ଏନ.ଏ.): କାର୍ ଭିତରୁ ଲୁଟି ନେଲେ ଟଙ୍କା ବ୍ୟାଗ୍। ଠାକୁରମୁଣ୍ଡା ବଜାରରେ କାର୍ ଛିଡା କରି ଜଳଖିଆ ଖାଉଥିବାବେଳେ କାର୍ ଭିତରେ ବସିଥିବା ମହିଳାଙ୍କ ନିକଟରୁ ଟଙ୍କା ବ୍ୟାଗ ଛଡାଇନେଇ ବାଇକ୍ରେ ଚମ୍ପଟ ମାରିଲେ ଲୁଟେରା। ସୂଚନାଯୋଗ୍ୟ, ବୁଧବାର କରଞ୍ଜିଆ ନିକଟ ରସମତଳାର ସୁଶାନ୍ତ କୁମାର ପଣ୍ଡା ଏବଂ ତାଙ୍କ ସ୍ତ୍ରୀ ସହିତ ଅନ୍ୟ ଜଣେ ମହିଳା କାର୍ ଯୋଗେ ମେଡ଼ିକାଲ କାମରେ କଟକ ଯାଉଥିଲେ। ସକାଳ ପ୍ରାୟ ୮ଟା ସମୟରେ ଠାକୁରମୁଣ୍ଡା ବଜାରରେ ଠାକୁରମୁଣ୍ଡା- ଆନନ୍ଦପୁର ରାସ୍ତାର ମହାନ୍ତି ମାର୍କେଟ କମ୍ପ୍ଲେସ ସମ୍ମୁଖ ଜଳଖିଆ ଦୋକାନ ନିକଟରେ କାର୍ ରଖି ସୁଶାନ୍ତ ଓ ତାଙ୍କ ଡ୍ରାଇଭର କାର୍ରୁ ଓହ୍ଲାଇ ଜଳଖିଆ ଖାଇବାକୁ ଯାଇଥିବା ବେଳେ କାର୍ରେ ୨ ଜଣ ମହିଳା ବସିଥିଲେ। ଏହି ସମୟରେ ୨ ଜଣ ଲୁଟେରା କାର୍ ନିକଟକୁ ଯାଇ କାର୍ରେ ଥିବା ମହିଳାଙ୍କ ନିକଟରୁ ଭ୍ୟାନିଟି ବ୍ୟାଗ୍କୁ ଛଡାଇ ନେଇ ବାଇକ୍ରେ ଦ୍ରୁତ ଗତିରେ କରଞ୍ଜିଆ ରାସ୍ତାରେ ଖସି ପଳାଇ ଯାଇଥିଲେ। ତାଙ୍କ ବ୍ୟାଗ ଭିତରେ ୪୦ ହଜାର ଟଙ୍କା ଓ ସୁନା ହାର, କାନ ଫୁଲ ସହ ଆବଶ୍ୟକ କାଗଜ ପତ୍ର ଥିଲା। ଲୁଟ୍ ପରେ ଏନେଇ ସୁଶାନ୍ତ ଠାକୁରମୁଣ୍ଡା ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପାଇ ଠାକୁରମୁଣ୍ଡା ଥାନା ପୋଲିସ ଘଟଣାର ତଦନ୍ତ କରୁଛି।
