ଖଇରା,୨୪।୪(ଡି.ଏନ.ଏ.)- ବାଲେଶ୍ୱର ଜିଲାର ଅନ୍ୟତମ ପ୍ରସିଦ୍ଧ ଶକ୍ତିପୀଠ ଖଇରା ବ୍ଲକର ଜଳଙ୍ଗ ଚଣ୍ଡୀ ପୀଠ ମୁଖଶାଳା ବଜ୍ରପାତରେ ଭାଙ୍ଗି ପଡ଼ିଛି। ଏନେଇ ଭକ୍ତମାନଙ୍କ ମଧ୍ୟରେ ନୈରାଶ୍ୟ ଭାବ ପ୍ରକାଶ ପାଇଛି। ତୁରନ୍ତ ଏହାକୁ ନୂତନ ଭାବରେ ନିର୍ମାଣ କରିବାକୁ ଟ୍ରଷ୍ଟି ବୋର୍ଡ ତଥା ଭକ୍ତମାନଙ୍କ ତରଫରୁ ଦାବି କରାଯାଇଛି। ୨୨ତାରିଖ ରାତିରେ ବଜ୍ରପାତରେ ୨୦୦୦ ମସିହାରେ ପ୍ରତ୍ନତତ୍ୱ ବିଭାଗ ଦ୍ୱାରା ନିର୍ମିତ ମୁଖଶାଳାର ଗୋଟିଏ ପାର୍ଶ୍ୱ ଭାଙ୍ଗି ପଡ଼ିଥିଲା। ୨୩ତାରିଖରେ ଟ୍ରଷ୍ଟି ପ୍ରଫୁଲ୍ଲ କୁମାର ଦାସଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା। ସଭ୍ୟ ସୁଶାନ୍ତ ମହାପାତ୍ର, ପୂର୍ଣ୍ଣଚନ୍ଦ୍ର ଦାସ, ନାରଣ ଦାସ ତଥା ଅନ୍ୟାନ୍ୟ ଗ୍ରାମବାସୀମାନେ ବୈଠକରେ ଯୋଗଦେଇଥିଲେ। ଦୁର୍ଘଟଣା ଆଶଙ୍କାରେ ବର୍ତ୍ତମାନ ମନ୍ଦିରକୁ ଭକ୍ତଙ୍କ ଯାତାୟାତକୁ ନିଷିଦ୍ଧ କରାଯାଇଥିବାରୁ ତୁରନ୍ତ ଏହାକୁ ନିର୍ମାଣ କରିବାକୁ ପ୍ରତ୍ନତତ୍ୱ ବିଭାଗ ମହାସଚିବଙ୍କ ନିକଟରେ ଦାବି କରାଯାଇଛି ା