ପାଟଣା/ଢେଙ୍କିକୋଟ, ୨୨।୪(ସ୍ବ.ପ୍ର./ଡି.ଏନ.ଏ.) କେନ୍ଦୁଝର ଜିଲା ପାଟଣା ଓ ଢେଙ୍କିକୋଟ ଅଞ୍ଚଳରେ ଗୁରୁବାର ଅପରାହ୍ନରେ କାଳବୈଶାଖୀ ପ୍ରଭାବ ଦେଖିବାକୁ ମିଳିଛି। ଝଡ଼ବର୍ଷା ସାଙ୍ଗକୁ ପବନରେ ପାଟଣା ବ୍ଲକରେ ବାଉଁଶୁଳି ନୋଡାଲ ଉଚ୍ଚ ବିଦ୍ୟାଳୟ ଛାତ୍ରାବାସର ଆଜବେଷ୍ଟସ ଛପର ଉଡ଼ିଯାଇଛି। ଛାତ୍ରାବାସରେ ଥିବା ୨୨ ଛାତ୍ର ଅଳ୍ପକେ ବର୍ତ୍ତିଯାଇଛନ୍ତି। ସେମାନଙ୍କୁ ଅନ୍ୟ ଏକ କକ୍ଷକୁ ସୁରକ୍ଷିତ ଭାବେ ସ୍ଥାନାନ୍ତର କରାଯାଇଛି।
ପ୍ରକାଶ ଯେ, ୪୦ ସଂଖ୍ୟକ ଛାତ୍ରଙ୍କୁ ନେଇ ଚାଲୁଥିବା ଉକ୍ତ ଛାତ୍ରାବାସର ଛପର ଦୁଇମାସ ତଳେ ବର୍ଷା ପବନରେ ଉଡ଼ିଯାଇଥିଲା। ଆଇଟିଡିଏ ପକ୍ଷରୁ ପୁନଃ ନିର୍ମାଣ କରାଯାଇଥିଲା। ନିମ୍ନମାନର ସରଞ୍ଜାମ ବ୍ୟବହୃତ ହେଉଥିବାରୁ ବାରମ୍ବାର ଛପର ଉଡ଼ିଯାଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସେମାନେ ଏହାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ସେହିପରି ପାଟଣା ବାଉଁଶୁଳି ରାସ୍ତାର ଶରଧାପୁର ନିକଟରେ ଏକ ପୁରୁଣା ଆମ୍ବଗଛ ପଡ଼ି ରାସ୍ତା ଅବରୋଧ ଯୋଗୁ ଯାନବାହନ ଚଳାଚଳ ବାଧାପ୍ରାପ୍ତ ହୋଇଛି। ଗ୍ରାମର ଯୁବକମାନେ ରାସ୍ତା ସଫା କାର୍ଯ୍ୟ ଜାରି ରଖିଛନ୍ତି। ବିଭିନ୍ନ ସ୍ଥାନରେ ଗଛ ଆଉ ବାଉଁଶ ପଡ଼ିଥିବାରୁ ପାଟଣା ଅଞ୍ଚଳରେ ବିଦ୍ୟୁତ୍ ସରବରାହ ବନ୍ଦ ରହିଥିଲା। ପରେ କେତେକ ସ୍ଥାନରେ ବିଦ୍ୟୁତ୍ ସେବା ସ୍ବାଭାବିକ ହୋଇଛି। ତେବେ କାଳବୈଶାଖୀ ପ୍ରଭାବରେ ହୋଇଥିବା ବୃଷ୍ଟିପାତ ଯୋଗୁ ଲୋକେ ଗୁଳୁଗୁଳିରୁ ଆଶ୍ୱସ୍ତି ପାଇଛନ୍ତି। ପବନ ସହ ସ୍ଥାନେ ସ୍ଥାନେ କୁଆପଥର ବର୍ଷା ହୋଇଛି।
ଢେଙ୍କିକୋଟ ଅଞ୍ଚଳରେ ଘୂର୍ଣ୍ଣିଝଡ଼ ତୋଫାନ ସାଙ୍ଗକୁ କୁଆପଥର ବର୍ଷା ହୋଇଛି। ଛତିଆ, ସାନ୍ତରାପୁର, ରାଇବଣ, ଢେଙ୍କିକୋଟ, ଖଣ୍ଟଘର ପ୍ରମୁଖ ଅଞ୍ଚଳରେ ପବନରେ ଘର ଛପର ଉଡ଼ିଯାଇଛି। ବଡ଼ ବଡ଼ ଗଛ ପଡ଼ି ତାର ଛିଣ୍ଡି ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହୋଇଛି। ବର୍ଷା ମାଡ଼ରେ ଲୋକଙ୍କ ବାଡ଼ି ବଗିଚାରେ ଫସଲ ନଷ୍ଟ ହୋଇଯାଇଛି। ସରକାରୀ ସ୍ତରରେ ଏହାର ଉପଯୁକ୍ତ ତଦନ୍ତ କରି ସହାୟତା ପ୍ରଦାନ ପାଇଁ ଢେଙ୍କିକୋଟ ବିକାଶ ମଞ୍ଚ ପକ୍ଷରୁ ଦାବି କରାଯାଇଛି।