କେନ୍ଦ୍ରାପଡ଼ା,୩ା୭ (ଜଗନ୍ନାଥ ଧଳ): କେନ୍ଦ୍ରାପଡ଼ା ଜିଲା ରାଜକନିକା ତହସିଲ ଅଞ୍ଚଳରେ ରବିବାର ଅପରାହ୍ନରେ ଘୂର୍ଣ୍ଣିଝଡ଼ ହୋଇଛି। ଏହି ଝଡ଼ ତହସିଲ ଅନ୍ତର୍ଗତ ପଙ୍କି ଗ୍ରାମର ୧୫ରୁ ଊର୍ଦ୍ଧ୍ୱ ଘରର ଚାଳ ଛପର ଉଡ଼ାଇ ନେଇଛି। ଏଥିସହ ବଡ଼ ଓ ଛୋଟ ଗଛ ଉପୁଡ଼ି ପଡ଼ିଛି। ଏ ସମ୍ପର୍କରେ ସ୍ଥାନୀୟ ଅଞ୍ଚଳର ବନମାଳୀ ସାହୁ କହିଛନ୍ତି, ଏହି ଝଡ଼ ଏକ ହାତୀଶୁଣ୍ଡ ଆକାରରେ ଗୋପାଳପୁର ଅଞ୍ଚଳରୁ ଆସିଥିଲା। ଏହାପୂର୍ବରୁ ପ୍ରବଳ ପବନ ବହିଥିଲା। ଝଡ଼ର ଆକାର ପ୍ରାୟ ୨୦୦ ମିଟର ଥିଲା। ପ୍ରବାହିତ ଅଞ୍ଚଳରେ ଗ୍ରାମର ଘରର ଚାଳ ଛପର ଉଡ଼ାଇ ନେଇଥିବା ବେଳେ ୩ଟି ଘରକୁ ସମ୍ପୂର୍ଣ୍ଣ ଉଜାଡ଼ି ଦେଇଛି। ତେବେ ସୌଭାଗ୍ୟବଶତଃ କୌଣସି ଜୀବନହାନି ହୋଇନାହିଁ। ଝଡ଼ ପ୍ରଭାବିତ ଏହି ଗ୍ରାମର ଅବସ୍ଥା ତଦନ୍ତ ସହ ସରକାରୀ ସହଯୋଗ ନିମନ୍ତେ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି। ରିପୋର୍ଟ ଲେଖା ହେବା ପର୍ଯ୍ୟନ୍ତ କୌଣସି ରାଜସ୍ବ ଅଧିକାରୀ ଏହି ଗ୍ରାମରେ ପହଞ୍ଚତ୍ ନ ଥିବା ସାହୁ ସୂଚନା ଦେଇଛନ୍ତି।