କେନ୍ଦ୍ରାପଡ଼ା ଅଫିସ,୧୩।୭: କରୋନା ସଂକ୍ରମଣ ଭୟ କେନ୍ଦ୍ରାପଡ଼ା ଜିଲାର ଗ୍ରାମାଞ୍ଚଳ ଅର୍ଥନୀତିକୁ ପ୍ରଭାବିତ କରୁଛି। ଜିଲାକୁ ୭୮ ହଜାରରୁ ଊର୍ଦ୍ଧ୍ୱ ପ୍ରବାସୀ ଫେରିଥିବା ବେଳେ ରୋଜଗାର ପାଇଁ ପନିପରିବା ଚାଷଠାରୁ ଆରମ୍ଭ କରି ହସ୍ତକଳା ଉତ୍ପାଦକୁ ଗୁରୁତ୍ୱ ଦେଇଛନ୍ତି। ତେବେ ଉପଯୁକ୍ତ ବଜାର ଅଭାବରୁ ଗ୍ରାମାଞ୍ଚଳରେ ଉତ୍ପାଦନ ହେଉଥିବା ସାମଗ୍ରୀ ଲୋକଙ୍କ ନିକଟରେ ପହଞ୍ଚତ୍ପାରୁ ନାହିଁ।
ବୁଦ୍ଧିଜୀବୀ ଅମରବର ବିଶ୍ୱାଳ କୁହନ୍ତି, ପନିପରିବା, ହସ୍ତକଳା ସାମଗ୍ରୀ ପରିବାରର ସମସ୍ତ ସଦସ୍ୟଙ୍କ ସହଯୋଗରେ ଅର୍ଥ ରୋଜଗାର ଦେଇଥାଏ। ବିଶେଷ କରି ମହିଳାଙ୍କ ହସ୍ତକର୍ମ ବା ଉତ୍ପାଦ ଘରର ଆର୍ଥିକ ସ୍ଥିତିକୁ ଦୃଢ଼ କରିଥାଏ। ଅର୍ଥନୀତି ପରିଚାଳନାକୁ ସୁଦୃଢ଼ କରିବା ଓ ମହିଳା ସଶକ୍ତୀକରଣ ପାଇଁ ରାଜ୍ୟ ଓ କେନ୍ଦ୍ର ସରକାର ପ୍ରତି ଗ୍ରାମରେ ସ୍ବୟଂଶାସିତ ଗୋଷ୍ଠୀ ଗଠନ ପ୍ରତି ଗୁରୁତ୍ୱ ଦେଇଛନ୍ତି। ପ୍ରତ୍ୟେକ ଗୋଷ୍ଠୀକୁ ସିଡମନି ଦେବା ସହିତ ଜୀବିକା ମିଶନ ମାଧ୍ୟମରେ ପ୍ରୋତ୍ସାହିତ କରୁଛନ୍ତି। ଏହା ସତ୍ତ୍ୱେ ବିଭିନ୍ନ ସ୍ବୟଂ ସହାୟିକା ଗୋଷ୍ଠୀର ଗ୍ରାମୀଣ ସାମଗ୍ରୀର ଉତ୍ପାଦ ଏବେ ଉପଯୁକ୍ତ ବଜାର ଖୋଜୁଛି। ସୂଚନା ଅଧିକାର ଅଭିଯାନ କର୍ମୀ ପ୍ରମୋଦ ସ୍ବାଇଁ କହିଛନ୍ତି, ଏହି ଜିଲାରେ ୨୨,୮୦୯ଟି ଗୋଷ୍ଠୀ ତିଆରି ହୋଇଛି। ପୂର୍ବରୁ ଆଇସିଡିଏସ ପକ୍ଷରୁ ଗୋଷ୍ଠୀ ପରିଚାଳନାକୁ ଗୁରୁତ୍ୱ ଦିଆଯାଇଥିବା ବେଳେ ୨୦୧୭ ଏପ୍ରିଲ ମାସରୁ ରାଜ୍ୟରେ ଆରମ୍ଭ ହୋଇଥିବା ମିଶନ ଶକ୍ତି ମାଧ୍ୟମରେ ପ୍ରତି ଗୋଷ୍ଠୀକୁ ୧୫ହଜାର ଟଙ୍କା ଲେଖାଏ ଅଦ୍ୟାବଧି ୧୦,୪୭୮ ଗୋଷ୍ଠୀକୁ ସିଡମନି ଦିଆଯାଇଛି। ଅବଶିଷ୍ଟ ସ୍ବୟଂ ସହାୟିକା ଗୋଷ୍ଠିଙ୍କୁ ୫ରୁ ୧୦ ହଜାର ଟଙ୍କା ସିଡମନି ଦିଆଯାଇଥିବା ବେଳେ ଓଡିଶା ଜୀବିକା ମିଶନ ପକ୍ଷରୁ ସିଆଇଏଫରେ ୩୧ କୋଟିରୁ ଅଧିକ ଟଙ୍କା ପ୍ରଦାନ କରି ଜୀବନ ଜିବୀକାକୁ ଉନ୍ନତ ପାଇଁ ଚେଷ୍ଟା କରାଯାଇଛି। ଗୋଷ୍ଠୀ ନିର୍ମାଣ ପରେ ଏହି ଜିଲାର ମହିଳାମାନେ ଛତୁ, ମାଛ, ଟେରାକୋଟା, ବାଉଁଶ, କାଇଁଛ ହସ୍ତଶିଳ୍ପରେ ମନୋନିବେଶ କରି ନିଜର ପାରଦର୍ଶିତା ଦେଖାଉଛନ୍ତି। ତେବେ ଗତ ୩ ମାସ ଧରି ଗୋଷ୍ଠୀ ଦ୍ୱାରା ଉତ୍ପାଦିତ ସାମଗ୍ରୀ ବଜାରରୁ ଉଭାନ ହୋଇଯାଇଛି। ବୁଦ୍ଧିଜୀବୀ ବାନାମ୍ବର ସାହୁ କହିଛନ୍ତି, କରୋନା ସଂକ୍ରମଣ ଭୟ ଯୋଗୁ ଉତ୍ପାଦ ହାଟ ବଜାରରେ ପହଞ୍ଚି ପାରୁନାହିଁ। ଜିଲାର ବିଭିନ୍ନ ପଞ୍ଚାୟତ ଓ ଦୁଇଟି ମୁନିସିପାଲିଟିରେ ଭେଣ୍ଡିଂ ଜୋନ ନିର୍ମାଣ ହୋଇ ବ୍ୟବସାୟୀଙ୍କୁ ଗୃହ ଆବଣ୍ଟନ କରାଯାଉଛି। ଏଥିରୁ ଏସ୍ଏସ୍ଜିଙ୍କ ପାଇଁ ଏକାଧିକ ଘର ସଂରକ୍ଷିତ କରାଗଲେ ଗୋଷ୍ଠୀ ଉତ୍ପାଦନ ବିକ୍ରି ହେବା ସହିତ ମହିଳାମାନେ ଘରୋଇ ଉତ୍ପାଦକୁ ବଜାରକୁ ଆଣିପାରିବେ। ଏଠାରେ ସାମାଜିକ ଦୂରତ୍ୱ ଓ କୋଭିଡ୍ ୧୯ର ନିୟମାବଳୀ ସହ ମହିଳାମାନେ ନିଜସ୍ବ ଉତ୍ପାଦନକୁ ବିକ୍ରି କରିପାରିବେ। ସେହିପରି ଓର୍ମାସ ପକ୍ଷରୁ ଗ୍ରାମ୍ୟ ଉତ୍ପାଦକୁ ମୋବାଇଲ ଭ୍ୟାନ ମାଧ୍ୟମରେ ବିକ୍ରି ବ୍ୟବସ୍ଥା କଲେ ମହିଳା ସଶକ୍ତୀକରଣ ପାଇଁ ନୂତନ ପଦକ୍ଷେପ ହେବ। ଏ ସମ୍ପର୍କରେ ଉପଜିଲାପାଳ ଜ୍ୟୋତିଶଙ୍କର ମହାପାତ୍ର କୁହନ୍ତି, ଆର୍ଏମ୍ସି ପକ୍ଷରୁ ବିଭିନ୍ନ ସ୍ଥାନରେ ବଜାର ମଣ୍ଡି ନିର୍ମାଣ ହୋଇଛି। ପ୍ରତି ପଞ୍ଚାୟତରେ ମଣ୍ଡି ଖୋଲାଯିବା ପାଇଁ ରାଜ୍ୟ ସରକାର ଯୋଜନା କରିଛନ୍ତି। ଏଥିସହିତ ଓର୍ମାସ ପକ୍ଷରୁ ଘରୋଇ ଓ ହସ୍ତକଳା ଉତ୍ପାଦ ବିକ୍ରି ପାଇଁ ପ୍ରୟାସ ଜାରି ରହିଛି।