ଦାରିଙ୍ଗବାଡ଼ି,୧୮ା୧୦(ଅରୁଣ ସାହୁ) : କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ଅଞ୍ଚଳରେ ଚୋରା ଦେଶୀ ମଦ ଓ ନକଲି ବିଦେଶୀ ମଦ ବିକ୍ରି ଅଭିଯୋଗ ହୋଇଛି। ଉକ୍ତ ଅଞ୍ଚଳର ଜଣେ ଯୁବକ ଏହି ଚୋରାମଦ କାରବାର ରୋକିବାକୁ ଉଭୟ ପୋଲିସ ଓ ଅବକାରୀ ବିଭାଗକୁ ନିବେଦନ କରିଥିବା ଏକ ଭିଡିଓ ସାମାଜିକ ଗଣମାଧ୍ୟମରେ ଘୂରିବୁଲୁଛି। ସେ ଉକ୍ତ ଭିଡିଓରେ କହୁଛନ୍ତି, ସିମନବାଡ଼ି ଅଞ୍ଚଳରେ ଚୋରାମଦ କାରବାର ଦିନକୁ ଦିନ ବୃଦ୍ଧି ପାଇଛି ତାକୁ ଶୀଘ୍ର ବନ୍ଦ କରିବା ଆବଶ୍ୟକ। କେଉଁମାନେ ଏହି ମଦ ବିକ୍ରି କରୁଛନ୍ତି ସେ ସେମାନଙ୍କ ନାମ ପ୍ରକାଶ କରିବାକୁ ମଧ୍ୟ ବିଭାଗକୁ ସହଯୋଗ କରିବେ ବୋଲି କହିଛନ୍ତି। ସେ ଆହୁରି କହିଛନ୍ତି, ସିମନବାଡ଼ିରେ ନକଲି ମଦ ବିକ୍ରି ବୃଦ୍ଧି ପାଇଛି। ଏହାକୁ ରୋକିବା ଆବଶ୍ୟକ ନ ହେଲେ ଲୋକଙ୍କ ଜୀବନପ୍ରତି ବିପଦ ବଢ଼ିବା ଆଶଙ୍କା କରାଯାଇପାରେ ବୋଲି ସେ ଜଣାଇଛନ୍ତି। ଯୁବକ ଜଣକ ମାତ୍ର ୩୧ ସେକେଣ୍ଡର ଏହି ଭିଡିଓରେ ଆହୁରି କହିଛନ୍ତି, ଆମେ ଜାଣିଛୁ କେଉଁଠି ନା କେଉଁଠ ଏହି ଚୋରାମଦ କାରବାର ହେଉଛି। କେମିତି ଅବକାରୀ କିମ୍ବା ପୋଲିସ ଜାଣିପାରୁନି ସେ ନେଇ ସେ ଆଶ୍ଚର୍ଯ୍ୟ ପ୍ରକାଶ କରିଛନ୍ତି।
ସୂଚନାଯୋଗ୍ୟ, ଉକ୍ତ ବ୍ଲକର ସିମନବାଡ଼ି ପଞ୍ଚାୟତର ତେଲିଛକ ସମେତ ଜୁଡ଼ାବାଡି, ରାଇକିଆ ରୋଡ୍, ଶିବମନ୍ଦିର ରୋଡ୍, ଦଡ଼ିବାଡ଼ି ସମେତ କିରିକୁଟି, ଶ୍ରାନିକେତା, ବୁଡ଼ାଗୁଡ଼ା ଆଦି ଅଞ୍ଚଳରେ ବେଧଡ଼କ ଚୋରା ମଦ କାରବାର ହେଉଛି। ବିଶେଷକରି ସିମନବାଡ଼ି ଅଞ୍ଚଳରେ ରାତି ୨ଟାରୁ ଭୋର୍ ୫ଟା ମଧ୍ୟରେ ମଦ୍ୟପଙ୍କ ମଦ ପାଇଁ ବଜାରରେ ଦେଖିବାକୁ ମିଳୁଥିବାବେଳେ ସରକାରୀ ଲାଇସେନ୍ସ ମଧ୍ୟ ଖୁଲମଖୁଲା ଚୋରା ମଦ କାରବାର କରାଯାଉଥିବା ଅଭିଯୋଗ ହେଉଛି। ସିମନବାଡ଼ି ଓ ବୁଡ଼ାଗୁଡ଼ା ପ୍ରମୁଖ ବ୍ୟବସାୟୀ ପେଣ୍ଠ ହୋଇଥିବାବେଳେ ବ୍ୟାଙ୍କ ସମେତ ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟରେ ଲୋକମାନେ ଶହଶହ ମାର୍କେଟ ଉପରେ ନିର୍ଭର କରନ୍ତି। ହେଲେ ମଦ୍ୟପଙ୍କ ଉତ୍ପାତ ଯୋଗୁ ବଜାରକୁ ମହିଳାମାନେ ବିଶେଷକରି ବ୍ୟାଙ୍କକୁ ଆସିବାକୁ ଭୟ କରୁଥିବା ଜଣାପଡ଼ିଛି।
ଏନେଇ ଦାରିଙ୍ଗବାଡ଼ି ଅବକାରୀ ଓଆଇସି ପ୍ରକାଶ ଚନ୍ଦ୍ର ମଲିକଙ୍କୁ ପଚାରିବାରୁ ସେ ଏବେ ନୂଆରେ ଦାରିଙ୍ଗବାଡ଼ିରେ ନିଯୁକ୍ତି ପାଇଛନ୍ତି। କିଛି ମଦ ମାମଲା କରାଯାଇଛି। ଅଭିଯୋଗ ପାଇଲେ ନିଶ୍ଚିତ ଚୋରାମଦ କାରବାର କରୁଥିବା ବ୍ୟବସାୟୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ତେବେ ଅବକାରୀ ବିଭାଗର କାର୍ଯ୍ୟ ଗୁଇନ୍ଦାଗିରି କରି ତଥ୍ୟ ସଂଗ୍ରହ କରିବା ବଦଳରେ ଅଭିଯୋଗର ଅପେକ୍ଷା କରିଥିବାରୁ ଏହାକୁ ବୁଦ୍ଧିଜୀବୀ ମହଲରେ ତୀବ୍ର ନିନ୍ଦା କରାଯାଇଛି। ଆଗାମୀ ଦିନରେ ମହିଳାମାନେ ମଦ ବିରୋଧୀ ଅଭିଯାନ କରିବାକୁ ସଜବାଜ ହେଉଥିବା ଜଣାପଡିଛି। ଏହି ଚୋରାମଦ କାରବାର ବୃଦ୍ଧି ଯୋଗୁ ଅନେକ ପରିବାର ଏବେ ରୋଜଗାର ହରାଇ ଆର୍ଥିକ ଅନଟନ ଭିତରେ ଗତି କରୁଥିବା ଜଣେ ମହିଳା ନିଜ ନାମ ଗୋପନ ରଖି କହିଛନ୍ତି। ଉକ୍ତ ପଞ୍ଚାୟତର ଲାଦାମାଲା ସମେତ ସଲାବାଡ଼ି, ଜୁଡ଼ାବାଡ଼ି ଆଦି ସାହିର ମହିଳାମାନେ ଆଗକୁ ଆନ୍ଦୋଳନ କରିବାକୁ ସଜବାଜ ହେଉଥିବା ଚେତାବନୀ ଦେଇଛନ୍ତି।