କଟକ ଅଫିସ,୧୪ା୧୦:କଟକ ସହରର ୫୯ନଂ. ଓ୍ବାର୍ଡରେ ପରିମଳ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଅଳିଆ ଆବର୍ଜନା ପଡ଼ି ରହୁଥିଲେ ମଧ୍ୟ କେହି ଉଠାଇବାକୁ ଆସୁନାହାନ୍ତି। ଆଲୋକୀକରଣ କରାଯାଇଥିଲେ ବି ଅନେକ ଲାଇଟ୍ ଜଳୁ ନ ଥିବା ଦେଖିବାକୁ ମିଳିଛି। ଡ୍ରେନ ସଫା ନ ହେବାରୁ ବର୍ଷାଜଳ ନିଷ୍କାସନ ହୋଇପାରୁନାହିଁ। କଟକ ମହାନଗର ନିଗମ(ସିଏମସି) ପକ୍ଷରୁ ନିଷ୍କାସନ ପାଇଁ କୌଣସି ପଦକ୍ଷେପ ନିଆଯାଉ ନ ଥିବାରୁ ବର୍ଷାରେ ନର୍ଦ୍ଦମା ପାଣି ଘରେ ପଶିବା ସହ ରାସ୍ତାରେ ଜମା ହୋଇ ରହୁଛି। ସାନିଟାରୀ ଇନସ୍ପେକ୍ଟରମାନେ ମଧ୍ୟ ସେମାନଙ୍କ ଦାୟିତ୍ୱ ଠିକ୍ ଭାବେ କରୁନାହାନ୍ତି। ନୂଆ କାଚରାମାଳ ମୁଖ୍ୟରାସ୍ତା ଢଳେଇ ଉପରେ ନାଳନର୍ଦ୍ଦମା ପଙ୍କ ବସି ରହିଛି। ଫଳରେ ସର୍ବସାଧାରଣ ଯିବା ଆସିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ଏହି ରାସ୍ତାର ମୁଖ୍ୟ ନାଳ ଦୀର୍ଘଦିନ ହେବ ସଫା ହୋଇ ନ ଥିବାରୁ ଦୁର୍ଗନ୍ଧ ହେଉଛି। ଏନେଇ ଓ୍ବାର୍ଡବାସିନ୍ଦା ଓ୍ବାର୍ଡ ଅଫିସର ଓ ସିଏମ୍ସି ଅଧିକାରୀଙ୍କୁ ଜଣାଥଲେ ମଧ୍ୟ କୌଣସି ପଦକ୍ଷେପ ନିଆଯାଉନାହିଁ। ମଙ୍ଗଳବାର କେତେଜଣ ଓ୍ବାର୍ଡବାସିନ୍ଦା ସିଏମ୍ସି କମିଶନର ଅନନ୍ୟା ଦାସଙ୍କୁ ଭେଟିବା ସହ ଏକ ଅଭିଯୋଗପତ୍ର ପ୍ରଦାନ କରିଛନ୍ତି। ୭ଦିନ ମଧ୍ୟରେ ପଦକ୍ଷେପ ନିଆ ନ ଗଲେ ସିଏମ୍ସି କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ଓ୍ବାର୍ଡବାସୀ ଚେତାବନୀ ଦେଇଛନ୍ତି। ଅନ୍ୟପଟେ ସ୍ଥିତି ଅନୁଧ୍ୟାନ କରି ପଦକ୍ଷେପ ନିଆଯିବ ବୋଲି ସିଏମ୍ସି କମିଶନର ଦାସ କହିଛନ୍ତି।