ଲୋଇସିଂହା୨୭।୩(ଡି.ଏନ.ଏ):ବଲାଙ୍ଗୀର-ବରଗଡ ୨୬ ନଂ ଜାତୀୟ ରାଜପଥ ପ୍ରଶସ୍ତିକରଣ କାମ ଚାଲିଛି। ଏଥିଯୋଗୁ ଲୋଇସିଂହା ବାଳିକା ଉଚ୍ଚ ବିଦ୍ୟାଳୟ ସମ୍ମୁଖ ପାଚେରିକୁ ଭାଙ୍ଗି ଦିଆଯାଇଛି। ସରକାରୀ ଅନୁଷ୍ଠାନ ହୋଇଥିବାରୁ ଏନ୍ଏଚ୍ ଡିଭିଜନ ପାଚେରି ନିର୍ମାଣ ଦାୟିତ୍ୱ ନେଇଛି। ହେଲେ ମାସାଧିକ ସମୟ ବିତି ଯାଇଥିଲେ ମଧ୍ୟ ପାଚେରି ନିର୍ମାଣ ହୋଇପାରିନାହିଁ। ଅପରପକ୍ଷେ ଜିଲାପାଳ ଏବଂ ସ୍କୁଲ କର୍ତ୍ତୃପକ୍ଷଙ୍କ ବାରମ୍ବାର ଅନୁରୋଧ ପରେ ବଲାଙ୍ଗୀରସ୍ଥିତ ଜାତୀୟ ରାଜପଥ କର୍ତ୍ତୃପକ୍ଷ ସମୟ ଗଡାଇ ଚାଲିଛନ୍ତି। ଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ସ୍କୁଲ କର୍ତ୍ତୃପକ୍ଷ ଅସ୍ଥାୟୀ ପାଚାରେ ନିର୍ମାଣ କରିବାକୁ ବାଧ୍ୟ ହୋଇଛନ୍ତି। ରବିବାର କେତେକ ଶ୍ରମିକ ଟିଣଚଦର ଆଜବେଷ୍ଟସକୁ ପାଚାରି ଦେଇଥିବା ପ୍ରଧାନଶିକ୍ଷକ ସଦାନନ୍ଦ ଭୋଇ କହିଛନ୍ତି।
୧୯୮୨ ମସିହାରେ ପ୍ରତିଷ୍ଠିତ ଲୋଇସିଂହା ବାଳିକା ଉଚ୍ଚ ବିଦ୍ୟାଳୟ ସମ୍ମୁଖ ଦେଇ ୨୬ ନଂ ଜାତୀୟ ରାଜପଥ ଯାଇଛି ା ଏବେ ଉକ୍ତ ରାଜପଥ ପ୍ରଶସ୍ତିକରଣ କାମ ଚାଲିଛ। ସ୍କୁଲପାର୍ଶ୍ୱରେ ଥିବା ଦୋକାନ, ବଜାରକୁ ଏନଏଚ ବିଭାଗ ପକ୍ଷରୁ ଭାଙ୍ଗାଯାଇଥିଲା। ଏହାବ୍ୟତୀତ ସ୍କୁଲ ପୁରୁଣା ଗେଟ ଓ ପାଚେରିକୁ ଭାଙ୍ଗି ଦିଆ ଯାଇଥିଲା ା ସେବେଠୁ ସ୍କୁଲ ସମ୍ମୁଖ ଭାଗ ମୁକୁଳା ପଡିଛି ା ଏଥିପ୍ରତି ଚିନ୍ତାବ୍ୟକ୍ତ କରି ପରିଚାଳନା କମିଟି ଓ ସ୍କୁଲ କର୍ତ୍ତୃପକ୍ଷ ୨୦୨୨ ଡିସେମ୍ବରରେ ୫ଟି ରୂପାନ୍ତରଣ କାମ ପରିଦର୍ଶନ ବେଳେ ଜିଲାପାଳ ଚଞ୍ଚଳ ରାଣାଙ୍କ ଦୃଷ୍ଟି ଆକର୍ଷଣ କରିଥିଲେ। ସେତେବେଳେ ଏନଏଚ ବିଭାଗୀୟ ଯନ୍ତ୍ରୀ ଖୁବଶୀଘ୍ର ପାଚେରି ନିର୍ମାଣ କରି ଦିଆଯିବ ବୋଲି ଜିଲାପାଳଙ୍କ ଆଗରେ କହିଥିଲେ। ମାଟ୍ରିକ ପରୀକ୍ଷା କେନ୍ଦ୍ର ଏବଂ ହବକେନ୍ଦ୍ର କରାଯାଇ ପ୍ରଶ୍ନପତ୍ର ରଖାଯାଇଥାଏ ା ମାର୍ଚ୍ଚ ମାଟ୍ରିକ ପରୀକ୍ଷା ପୂର୍ବରୁ ପ୍ରଧାନଶିକ୍ଷକ ଭୋଇ ବିଭାଗୀୟ ଯନ୍ତ୍ରୀଙ୍କୁ ପଚାରିବାରୁ ଆଉ ଗୋଟିଏ ମାସ ଲାଗିଯିବ ବୋଲି ସେ କହିଥିଲେ ା ୨୩ ମାର୍ଚ୍ଚରେ ୫ଟି ସ୍କୁଲ ସମୀକ୍ଷା ବେଳେ ସ୍କୁଲର ମୁକୁଳା ପଚାରି ପ୍ରସଙ୍ଗ ଦୋହରାଇଥିଲେ ପ୍ରଧାନଶିକ୍ଷକ। ଏହାପରେ ପାଚେରି ନିର୍ମାଣ ପାଇଁ ପୁଣି ୧୫ଦିନର ମହଲତ ନେଇଛନ୍ତି ଏନଏଚ ଯନ୍ତ୍ରୀ। ପାଠପଢା ସମୟରେ ଶ୍ରେଣୀକକ୍ଷରୁ ରାଜପଥ ସିଧାସଳଖ ଦେଖାଯାଉଛି। ଏଥିଯୋଗୁ ଛାତ୍ରୀଙ୍କ ପାଠପଢାରେ ବ୍ୟାଘାତ ସୃଷ୍ଟି ହେଉଛି ା ଅପରପକ୍ଷେ ପଥଚାରୀମାନେ ସ୍କୁଲ କ୍ୟାମ୍ପସକୁ ଯାଇ ପରିଶ୍ରା କରୁଛନ୍ତି। ଏଥିପାଇଁ ସ୍କୁଲ ଶିକ୍ଷୟିତ୍ରୀ ଓ ଛାତ୍ରୀଙ୍କୁ ଲଜ୍ଜିତ ହେବାକୁ ପଡୁଛି ା ଏହାକୁ ଏଡାଇବା ସହ ପିଲାଙ୍କ ସୁରକ୍ଷା ଦୃଷ୍ଟିକୋଣରୁ ସ୍କୁଲ କର୍ତ୍ତୃପକ୍ଷ ଅସ୍ଥାୟୀ ପାଚେରି ନିର୍ମାଣ କରିଛନ୍ତି।