ଆରଡ଼ି, ୩।୬(ଡି.ଏନ.ଏ.) ଗଁାରେ ଶିକ୍ଷାରେ ବିକାଶ ହେବ। ଏହି ଲକ୍ଷ୍ୟ ନେଇ ଗ୍ରାମବାସୀ ୧୯୮୧ରେ ଖୋଲିଥିଲେ ଏକ ଉଚ୍ଚ ବିଦ୍ୟାଳୟ। ସ୍ଥାନୀୟ ଅଞ୍ଚଳ ତଥା ଜିଲାର ବାସୁଦେବପୁର ଅଞ୍ଚଳର ଶିକ୍ଷିତ ଯୁବକମାନେ ଏଠାରେ ନିଯୁକ୍ତି ପାଇ ଶିକ୍ଷାଦାନ କରୁଥିଲେ। ବହୁ ମେଧାବୀ ଛାତ୍ରୀଛାତ୍ର ଏଠାରୁ ଉତ୍ତୀର୍ଣ୍ଣ ହୋଇଛନ୍ତି। ସମୟାନୁସାରେ ନିଯୁକ୍ତ ହୋଇଥିବା ଶିକ୍ଷକମାନେ ଅବସର ନେଇ ଗଲେଣି। ସରକାରୀ କଟକଣା ଯୋଗୁ ବିଦ୍ୟାଳୟରେ ନୂତନ ଶିକ୍ଷକ ନିଯୁକ୍ତି ହୋଇପାରୁନାହିଁ। ପୂର୍ଣ୍ଣ ଅନୁଦାନ ବିଦ୍ୟାଳୟର ମାନ୍ୟତା ପାଇଥିବା ଏହି ବିଦ୍ୟାଳୟ ହେଉଛି ଭଦ୍ରକ ଜିଲା ଧାମନଗର ବ୍ଲକର ପାଳସାହି ପଞ୍ଚାୟତ ସାହୁସାହି ଶ୍ରୀଜଗନ୍ନାଥ ଉଚ୍ଚବିଦ୍ୟାଳୟ। ବିଦ୍ୟାଳୟ ନିର୍ମିତ ହେବାକୁ ୪୧ ବର୍ଷ ବିତିଲାଣି। ହେଲେ ଏଯାଏ ମିଳିନି ସରକାରୀ ମାନ୍ୟତା। ବିଦ୍ୟାଳୟର ନବମ ଓ ଦଶମ ଶ୍ରେଣୀରେ ଛାତ୍ରୀଛାତ୍ରଙ୍କ ସଂଖ୍ୟା ପ୍ରାୟ ୫୦। କ୍ରୀଡ଼ା ଶିକ୍ଷକ ଅଜୟ କୁମାର ସାହୁ ଭାରପ୍ରାପ୍ତ ପ୍ରଧାନଶିକ୍ଷକ ଭାବେ କାର୍ଯ୍ୟ ତୁଲାଉଛନ୍ତି। ତାଙ୍କୁ ଛାଡ଼ିଦେଲେ ଜଣେ କିରାଣି ଓ ୨ଜଣ ପିଅନ ଥିଲେ। ଗତମାସ ୩୧ତାରିଖରେ ଜଣେ ପିଅନ ଅବସର ନେଇଛନ୍ତି। ବିଦ୍ୟାଳୟ ବନ୍ଦ ହୋଇଯିବା ଆଶଙ୍କା କରି ଅଭିଭାବକମାନେ ୩ ଘରୋଇ ଶିକ୍ଷକଙ୍କୁ ପାରିଶ୍ରମିକ ଦେଇ ବିଦ୍ୟାଳୟ ଚଳାଉଛନ୍ତି। କରୋନା ମହାମାରୀ ପୂର୍ବରୁ ବିଦ୍ୟାଳୟରେ ଗେଷ୍ଟ ଟିଚରମାନଙ୍କୁ ଏଠାରେ ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟରୁ ନିଯୁକ୍ତି ଦିଆଯାଇଥିଲା। ହେଲେ ଦୁଇବର୍ଷ ହେଲା ଏପରି ବ୍ୟବସ୍ଥା ବି ବନ୍ଦ ହୋଇଯାଇଛି। ଅଭିଭାବକମାନଙ୍କ ଆର୍ଥିକ ସ୍ଥିତି ସ୍ବଚ୍ଛଳ ନୁହେଁ। ଏଣୁ ଘରୋଇ ଶିକ୍ଷକମାନଙ୍କୁ ମାସିକ ପାରିଶ୍ରମିକ ଦେବା ସମ୍ଭବ ନୁହେଁ ବୋଲି ସେମାନେ କହିଛନ୍ତି। କେଉଁ ମୁହୂର୍ତ୍ତରେ ବି ବିଦ୍ୟାଳୟ ବନ୍ଦ ହୋଇଯିବାର ଅଶଙ୍କା ରହିଛି। ସ୍ଥାୟୀ ସମାଧାନ ନିମନ୍ତେ ବିଦ୍ୟାଳୟକୁ ସରକାରୀ ମାନ୍ୟତା ପ୍ରଦାନ ଏବଂ ସାମୟିକ ଭାବେ ଗେଷ୍ଟ ଟିଚର ନିଯୁକ୍ତି ଲାଗି ଦାବି କରାଯାଇଛି। ଯେଉଁ ଘରୋଇ ଶିକ୍ଷକ ଏବେ ଶିକ୍ଷାଦାନ କରୁଛନ୍ତି, ସେମାନଙ୍କୁ ଯୋଗ୍ୟତା ଭିତ୍ତିରେ ଏହି ବିଦ୍ୟାଳୟରେ ନିଯୁକ୍ତି ଦିଆଯାଉ ବୋଲି ଗ୍ରାମବାସୀ ଦାବି କରିଛନ୍ତି। ଶିକ୍ଷକ ନିଯୁକ୍ତି ନ ହେଲେ ଆଗାମୀ ଦିନରେ ଆନ୍ଦୋଳନ କରିବେ ବୋଲି ସେମାନେ ଚେତାବନୀ ଦେଇଛନ୍ତି। ଜିଲା ଶିକ୍ଷାଧିକାରୀ କପିଳେନ୍ଦ୍ର ମିଶ୍ର କହିଛନ୍ତି, ସରକାରୀ ନିୟମରେ ଏବେ ଶିକ୍ଷକ ନିଯୁକ୍ତି ଦିଆଯାଇପାରିବ ନାହିଁ। ତେବେ ଯଥାସମ୍ଭବ ଗେଷ୍ଟ ଟିଚର ଯୋଗାଇ ଦିଆଯିବା ଲାଗି ବ୍ୟବସ୍ଥା କରାଯାଉଛି।