ପଦ୍ମପୁର,୨୮।୬: ସ୍କୁଟି ଷ୍ଟାର୍ଟ କରିଦେବାକୁ କହି ଗାଡ଼ି ନେଇ ଫେରାର ହୋଇଯିବା ଅଭିଯୋଗରେ ପୋଲିସ ଜଣେ ଯୁବକଙ୍କୁ ଗିରଫ କରିଛି। ସେ ହେଲେ ଭଦ୍ରକ ଗ୍ରାମାଞ୍ଚଳ ଥାନା ଅଧୀନ କିଆଗଡ଼ିଆ ବରପଦାର ପ୍ରଶାନ୍ତ ପରିଡ଼ା। ପୋଲିସ ତାଙ୍କଠାରୁ ସ୍କୁଟି ଜବତ କରିଛି।
ସୂଚନା ଅନୁଯାୟୀ, ବାସୁଦେବପୁର ବ୍ଲକ ମିର୍ଜାପୁର ଗ୍ରାମର ଶେଖ୍ ଆଜାରୁଦ୍ଦିନ ତାଙ୍କ ସ୍କୁଟି ନେଇ ବରାଙ୍ଗ ନିକଟସ୍ଥ ପେଟ୍ରୋଲ ପମ୍ପରେ ପେଟ୍ରୋଲ ପକାଉଥିଲେ। ଏହାପରେ ଗାଡ଼ି ଷ୍ଟାର୍ଟ ହୋଇ ନ ଥିଲା। ପାଖରେ ଛିଡ଼ା ହୋଇଥିବା ପ୍ରଶାନ୍ତ ଗାଡ଼ି ଷ୍ଟାର୍ଟ କରିଦେବେ କହି ଚାବି ନେଇଥିଲେ। ପରେ ଗାଡ଼ି ଷ୍ଟାର୍ଟ କରି ଦ୍ରୁତଗତିରେ ଭଦ୍ରକ ଆଡ଼କୁ ପଳାଇ ଯାଇଥିଲେ। ଏ ନେଇ ଆଜାରୁଦ୍ଦିନ ସାବରଙ୍ଗ ଥାନାରେ ଅଭିଯୋଗ କରିବା ପରେ ଥାନା ଅଧିକାରୀ ମନୋରମା ବାରିକ ତଦନ୍ତ କରି ପ୍ରଶାନ୍ତଙ୍କୁ ଧରିଥିଲେ। ଏ ନେଇ ଥାନାରେ ଏକ ମାମଲା (ନଂ.୧୫୦/୨୧) ରୁଜୁ ହୋଇଛି। ପ୍ରଶାନ୍ତଙ୍କ ନାମରେ ପୂର୍ବରୁ ବହୁ ମାମଲା ରହିଥିବା ଥାନା ଅଧିକାରୀ କହିଛନ୍ତି।
