ଭଦ୍ରକ ଅଫିସ, ୩।୩: ଭଦ୍ରକ ଜିଲା ପୋଲିସର ଏକ ସ୍ବତନ୍ତ୍ର ଟିମ୍ ଧୂଷୁରୀ ପୋଲିସ ସହାୟତାରେ ବୁଧବାର ୨୬ଲକ୍ଷରୁ ଊର୍ଦ୍ଧ୍ୱ ଟଙ୍କାର ବ୍ରାଉନସୁଗାର ଜବତ କରିଛି। ବାଇକ୍ରେ ଚାଲାଣ ହେଉଥିବା ବେଳେ ପୂର୍ବରୁ ଛକିଥିବା ପୋଲିସ ଟିମ୍ ଆରଡ଼ି ରାସ୍ତାର ଉଚ୍ଚପଦା ଛକଠାରେ ସ୍କୁଟିକୁ ଅଟକାଇଥିଲେ ହେଁ ଅସୁରାଳି ବିଦ୍ୟୁତ୍ ଷ୍ଟ୍ରକ୍ଚର ନିକଟରେ ୩ ବ୍ୟବସାୟୀଙ୍କୁ ପୋଲିିସ କାବୁ କରି ସେମାନଙ୍କଠାରୁ ୨୬୫ ଗ୍ରାମର ଓଜନର ବ୍ରାଉନସୁଗାର ଜବତ କରିଥିଲା। ପୋଲିସ ୩ ଜଣଙ୍କୁ ଗିରଫ କରିଛି।
ବ୍ରାଉନସୁଗାର ଚାଲାଣ ହେଉଥିବା ନେଇ ପ୍ରଥମେ ଧୂଷୁରୀ ପୋଲିସ ଖବର ପାଇଥିଲା। ପୋଲିସ ଟିମ୍ ପୂର୍ବାହ୍ନ ୧୧ଟାରୁ ଭଦ୍ରକ ଆରଡ଼ି ରାସ୍ତାର ଉଚ୍ଚପଦା ଛକ ନିକଟରେ ଜଗି ରହିଥିଲା। ୩ ଅଭିଯୁକ୍ତ ଏକ ସ୍କୁଟରରେ ବ୍ରାଉନସୁଗାର ନେଇ ଧୂଷୁରୀ ଅଭିମୁଖେ ଯାଉଥିଲେ। ପୋଲିସ ଟିମ୍ ସେମାନଙ୍କୁ ଧରି ଯାଞ୍ଚ କରିବାରୁ ଏକ ପଲିଥିନରେ ବ୍ରାଉନସୁଗାର ମିଳିଥିଲା। ଯାହାର ଆନୁମାନିକ ମୂଲ୍ୟ ୨୬ ଲକ୍ଷରୁ ଅଧିକ ହେବ ବୋଲି ଅତିରିକ୍ତ ଏସ୍ପି ଯତୀନ ପଣ୍ଡା ଟାଉନ ଥାନା ପରିସରରେ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଗିରଫ ୩ ବ୍ୟବସାୟୀ ହେଲେ ଧୂଷୁରୀ ଥାନା ଖପରପଦା ଅଞ୍ଚଳର ମଣିଭଦ୍ର ସାହୁ, ଗ୍ରାମାଞ୍ଚଳ ଥାନା ଚୁନିଦା ଅଞ୍ଚଳର ନିରାକାର ଜେନା ଓ ତ୍ରିଲୋଚନ ଦାସ। ମଣିଭଦ୍ର ନିକଟରୁ ୨୨,୮୦୦ ଟଙ୍କା, ୧୦ ମୋବାଇଲ ଫୋନ ଓ ଗୋଟିଏ ସ୍କୁଟି, ନିରାକାରଠାରୁ ୭୬୦୦ ଟଙ୍କା, ମୋବାଇଲ, ବ୍ଲେଡ୍, କଇଁଚି, କାଗଜ ଏବଂ ତ୍ରିଲୋଚନ ନିକଟରୁ ମୋବାଇଲ, ୧୪ ଶହ ଟଙ୍କା, କଇଁଚି ଓ ବ୍ରାଉନସୁଗାର ପ୍ୟାକେଟ ପାଇଁ ଥିବା କାଗଜ ଜବତ ହୋଇଛି। ଏ ନେଇ ଧୂଷୁରୀ ଥାନାରେ ଏକ ମାମଲା (ନଂ. ୩୭/୨୧) ରୁଜୁ କରାଯାଇଥିବା ଥାନା ଅଧିକାରୀ ପ୍ରଫୁଲ୍ଲ କୁମାର ସିଂ ସୂଚନା ଦେଇଛନ୍ତି।