ଖୋର୍ଦ୍ଧା ଅଫିସ,୧୫।୯: କରୋନା ମହାମାରୀ ଲୋକଙ୍କ ଜୀବନ ନେବା ସହ ଜୀବିକା ବଦଳାଇ ଦେଇଛି। ପରିବାର ପ୍ରତିପୋଷଣ ପାଇଁ ଶେଷରେ ଛତୁ ଚାଷ କରିବାକୁ ବାଧ୍ୟ ହୋଇଛନ୍ତି ଖୋର୍ଦ୍ଧା ଉପକଣ୍ଠ ଗୁରୁଜଙ୍ଗ ମାଳି ସାହିର ମୂର୍ତ୍ତି କାରିଗର ଆଶିଷ ରଣା। ସୂଚନା ମୁତାବକ, ଆଶିଷଙ୍କ ବାପା ଜଟାଧାରୀ ରଣା ଦୀର୍ଘ ବର୍ଷ ହେବ ମାଟିରେ ମୂର୍ତ୍ତି ନିର୍ମାଣ କରିଆସୁଛନ୍ତି। ଏହି କାର୍ଯ୍ୟରେ ତାଙ୍କ ଦୁଇପୁଅ ଆଶିଷ ଓ ଶୁଭାଶିଷ ସହଯୋଗ କରିଥାନ୍ତି। ଜାନୁୟାରୀରୁ ଫେବୃୟାରୀ ମାସ ପର୍ଯ୍ୟନ୍ତ ନଡ଼ା ଓ ମାଟି ସଂଗ୍ରହ କରାଯାଏ। ମାର୍ଚ୍ଚରୁ କାର୍ଯ୍ୟ ଆରମ୍ଭ ହୋଇଥାଏ। ପ୍ରଥମେ ଗଣେଶ ମୂର୍ତ୍ତି ପରେ ଖୁଦୁରୁକୁଣୀ, ବିଶ୍ୱକର୍ମା, ଦୁର୍ଗା, କାଳୀ, ଲକ୍ଷ୍ମୀ, କାର୍ତ୍ତିକ ପରେ ସରସ୍ବତୀ ପୂଜା କାମ ହୋଇଥାଏ। ଗୋଟିଏ କାମ ସରି ନ ଥିବା ବେଳେ ଆଉ ଏକ କାମ ଆରମ୍ଭ ହୋଇଥାଏ। ଏହି ନିର୍ମାଣ କାର୍ଯ୍ୟରେ ଆଶିଷଙ୍କ ପରିବାରଙ୍କ ସହ ୧୦ଜଣ କର୍ମଚାରୀ ଲାଗିଥାନ୍ତି। ପାର୍ବଣ ସମୟରେ ଦୁର୍ଗା, କାଳୀ, ଲକ୍ଷ୍ମୀ ମୂର୍ତ୍ତି ନିର୍ମାଣ ପାଇଁ ଦିନରାତି କାମ ହୋଇଥାଏ। ଖୋର୍ଦ୍ଧା ସମେତ ବିଭିନ୍ନ ଅଞ୍ଚଳରୁ ଅର୍ଡର ମିଳିଥାଏ। ଚଳିତବର୍ଷ ଗ୍ରାହକଙ୍କ ଚାହିଦା ମୁତାବକ ଗଣେଶ ମୂର୍ତ୍ତି ୩ରୁ ୧୨ଫୁଟ ପର୍ଯ୍ୟନ୍ତ ନିର୍ମାଣ ହୋଇଥିଲା। କରୋନା ସଂକ୍ରମଣ ରୋକିବା ଲାଗି ପ୍ରଶାସନ ପକ୍ଷରୁ ସାମୂହିକ ପୂଜା ଆୟୋଜନ ଉପରେ କଟକଣା ଜାରି କରିଥିଲେ। ଏହା ପରେ ଗ୍ରାହକମାନେ ମୂର୍ତ୍ତି ନ ନେବା ପାଇଁ ଫୋନ କରି ଜଣାଇଥିଲେ। ଫଳରେ ଲକ୍ଷାଧିକ ଟଙ୍କା କ୍ଷତି ସହିବାକୁ ପଡିଲା। କାମ ନ ମିଳିବାରୁ ପରିବାର ଚଳାଇବା କଷ୍ଟକର ହୋଇପଡ଼ିଲା। ଶେଷରେ ଅନ୍ୟ ଉପାୟ ନ ପାଇ ଘର ବାରିପଟେ ଛତୁ ଚାଷ ଆରମ୍ଭ କରିଛୁ। ଦୈନିକ ୩୦ରୁ ୪୦କେଜି ଛତୁ ବଜାରରେ ବିକ୍ରି କରି ପରିବାର ଚଳାଉଛୁ। ଛତୁ ଚାଷ ଏକ ନୂତନ ପରିଚୟ ଦେବା ସହ ଆଗକୁ ଏହାକୁ ଅଧିକ ବ୍ୟାପକ କରିବା ପାଇଁ ଆଶା ରଖିଛନ୍ତି ବୋଲି ଆଶିଷ କହିଛନ୍ତି।