ମହାକାଳପଡ଼ା, ୨୨ା୧୧ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ଖରିନାସୀ ପଞ୍ଚାୟତ ଲୁଣା ନଦୀ ବନ୍ଧର ଏକ ନମ୍ବର କ୍ରିକ୍ ନିକଟରେ କେତେଜଣ ଲୋକ ଜାଲ ବସାଇ ମାଛ ଧରୁଥିଲେ। ଏହାଦ୍ୱାରା ନଦୀ ବନ୍ଧ ଦୁର୍ବଳ ହୋଇଯାଇଥିଲା। ସମୁଦ୍ର ଉଚ୍ଚ ଜୁଆର ମାଡରେ ଲୁଣାନଦୀ ବନ୍ଧରେ ଶନିବାର ଘାଇ ସୃଷ୍ଟି ହୋଇଛି। ଫଳରେ ଶତାଧିକ ଏକର ପାଚିଲା ଧାନ ଲୁଣା ପାଣିରେ ପ୍ରଭାବିତ ହୋଇଛି।
ସୂଚନା ଅନୁସାରେ, ଲୁଣାନଦୀ ବନ୍ଧର ଭିତରପାର୍ଶ୍ୱରେ ୧୨ ଶହ ଏକର ଓ ୮ ଶହ ଏକର ଅଞ୍ଚଳରେ କେତେଜଣ ମତ୍ସଜୀବୀ ଦୀର୍ଘବର୍ଷ ଧରି ପୋଖରୀ ଖୋଳି ଚିଙ୍ଗୁଡି ଚାଷ କରୁଛନ୍ତି। ଫଳରେ ସମୁଦ୍ର ଜଳକୁ ଏହି କ୍ରିକ୍ ମାଧ୍ୟମରେ ଚିଙ୍ଗୁଡି ଚାଷୀମାନେ ଘେରିରେ ପାଣି ପୂରାଇଥାନ୍ତି। ପରବର୍ତ୍ତୀ ସମୟରେ ଚିଙ୍ଗୁଡି ଚାଷୀ ମାଛ ଧରିବା ପରେ ଏହି କ୍ରିକ ଦ୍ୱାରା ରାସାୟନିକ ଜଳ ନଦୀ ଓ ସମୁଦ୍ରକୁ ଛାଡ଼ିଥାନ୍ତି ବୋଲି କେତେଜଣ ଚାଷୀ ଅଭିଯୋଗ କରିଛନ୍ତି। ଲଘୁଚାପ ପ୍ରଭାବ ଓ ପୂର୍ଣ୍ଣିମା ଯୋଗୁ ସମୁଦ୍ର ଉଚ୍ଚ ଜୁଆର ପାଣି କୂଳ ଲଂଘିଛି। ଘାଇ ଯୋଗୁ ଶତାଧିକ ଏକର ଚାଷ ଜମିରେ ବ୍ୟାପକ ପରିମାଣରେ ଧାନ ଫସଲ ଉଜୁଡ଼ି ଯାଇଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ତୁରନ୍ତ ଏହି ଲୁଣା ଘେରି ବନ୍ଧରେ ଘାଇକୁ ବନ୍ଧାଇବାକୁ ସ୍ଥାନୀୟ ଚାଷୀ ଦାବି କରିଛନ୍ତି। ଏ ସମ୍ପର୍କରେ ଆଳିସ୍ଥିତ ଲୁଣାନଦୀ ତଟବନ୍ଧ ବିଭାଗ ନିର୍ବାହୀଯନ୍ତ୍ରୀ ସରୋଜ କୁମାର ମିଶ୍ରଙ୍କୁ ପଚାରିବାରେ ଯୁଦ୍ଧକାଳୀନ ଭିତ୍ତିରେ ଘେରି ବନ୍ଧ ଘାଇ ବନ୍ଧା ଯିବାକୁ ପଦକ୍ଷେପ ନିଆଯିବ ବୋଲି ସେ କହିଛନ୍ତି।