ବାଲିଆପାଳ,୩୧।୮(ସ୍ବ.ପ୍ର): ପ୍ରାକୃତିକ ପରିବର୍ତ୍ତନ ମଣିଷର ଦମ୍ଭକୁ ଭାଙ୍ଗି ଦେଉଛି। କେତେବେଳେ ବାତ୍ୟା ତା’ର ମହା କରାଳ ରୂପ ଦେଖାଇ ଘର ଦ୍ୱାର ଭାଙ୍ଗି ଜନ ଶୂନ୍ୟ କରିଦେଉଛି ତ କେତେବେଳେ ସମୁଦ୍ରରୁ ଲୁଣା ଜଳ ମାଡ଼ି ଆସି ନିତ୍ୟ ବ୍ୟବହାର୍ଯ୍ୟ ଉପକରଣ ଭସାଇ ନେଉଛି। ପୁଣି କେତେବେଳେ ସମୁଦ୍ର ଗାଁ ମୁହାଁ ହୋଇ ଲୋକଙ୍କୁ ଡରାଉଛି। ବାତ୍ୟା ‘ୟାସ୍’ ପ୍ରଭାବରେ କ୍ଷତିଗ୍ରସ୍ତ ହୋଇଛି ବାଲେଶ୍ୱର ଜିଲା ବାଲିଆପାଳ ବ୍ଲକ ଅନ୍ତର୍ଗତ ଜମ୍ଭିରାଇ ପଞ୍ଚାୟତର ସମୁଦ୍ର କୂଳିଆ ଗାଁ ଚାଉଳତି। ସମୁଦ୍ର ଢ଼େଉରେ ନଷ୍ଟ ହୋଇଯାଇଛି ଝାଉଁ ଜଙ୍ଗଲ ସହିତ ବହୁ ପୂର୍ବରୁ ରହିଥିବା ଲୁଣିବନ୍ଧ। ସମୁଦ୍ର ଗାଁ ମୁହାଁ ହେଉଥିବା ଦେଖି ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ରହିଛନ୍ତି। ଜୀବନକୁ ବାଜି ଲଗାଇ ଜନ୍ମ ମାଟିରେ ପଡ଼ି ରହିଛନ୍ତି ସେମାନେ।
ଏହି ଗାଁରେ ୧୨୦ରୁ ଊର୍ଦ୍ଧ୍ୱ ଘର ଥିଲା ବେଳେ ହଜାରେରୁ ଅଧିକ ଲୋକ ବସବାସ କରନ୍ତି। ଚଳିତ ବର୍ଷ ‘ୟାସ୍’ ବାତ୍ୟା ସମଗ୍ର ଓଡ଼ିଶାବାସୀଙ୍କୁ ଆତଙ୍କିତ କରିଥିଲା ବେଳେ ସମୁଦ୍ରର ଉଚ୍ଚ ଜୁଆର ଯୋଗୁ ଧୋଇଯାଇଛି ଏହି ଗାଁର ବାତ୍ୟା ପ୍ରତିରୋଧକ ବିଶାଳ ଝାଉଁ ଜଙ୍ଗଲ। ଉପୁଡ଼ି ପଡ଼ିଛି ବଡ଼ବଡ଼ ଝାଉଁ ଗଛ। ଲୀନ ହୋଇ ଯାଇଛି ଗଁାକୁ ସୁରକ୍ଷା ଦେଉଥିବା ସମୁଦ୍ର ପ୍ରାଚୀର ଲୁଣିବନ୍ଧ। ତେଣୁ ଅନାୟସରେ ଗାଁ ମୁହାଁ ହେବାରେ ଲାଗିଛି ସମୁଦ୍ର। ପ୍ରାୟତଃ ୩ରୁ ୪ ଚେନ୍ ସମୁଦ୍ର ମାଡ଼ି ଆସିଛି ଗାଁ ଭିତରକୁ। ଫଳରେ ଚାଷ ଜମିରେ ମାଡ଼ି ଯାଇଛି ସମୁଦ୍ରର ଲୁଣି ପାଣି। ଗୃହ ପାଳିତ ପଶୁଙ୍କର ଚାରଣ ଭୂଇଁରେ ଆଣ୍ଠୁଏ ଉଚ୍ଚର ପାଣି ଜମି ରହିଛି। ସମୁଦ୍ରର ଗର୍ଜନ ଡ଼ରାଉଛି ଗାଁ ଲୋକଙ୍କୁ। ସୌନ୍ଦର୍ଯ୍ୟରେ ଭରପୁର ଚାଉଳତି ଗ୍ରାମ ସମୁଦ୍ର ଗର୍ଭରେ ଲୀନ ହୋଇଯିବା ଅଶଙ୍କାରେ ପ୍ରମାଦ ଗଣୁଛନ୍ତି ଗ୍ରାମବାସୀ। ଲହଡ଼ି ରୋକିବା ପାଇଁ ଖୁବ୍ ଶୀଘ୍ର ପଥର ପ୍ୟାକିଂ ସହିତ ପଥର ବନ୍ଧ କରିବାକୁ ଗ୍ରାମବାସୀ ସରକାରଙ୍କୁ ନିବେଦନ କରିଛନ୍ତି। ଲୁଣି ବନ୍ଧ କରାଯାଇ ଲହଡ଼ିକୁ ରୋକା ନ ଗଲେ ଖାଲି ଜମ୍ଭିରାଇ ପଞ୍ଚାୟତର ଚାଉଳତି ଗାଁ ନୁହେଁ ଏହି ପଞ୍ଚାୟତର ୪/୫ଟି ଗାଁ ସହିତ କଷାଫଳ, ବୁଳଂ, ସାଉଡ଼ି, ନୂଆଗାଁ, ପଞ୍ଚପାଲି ପଞ୍ଚାୟତର କିଛି ଗଁା ସମୁଦ୍ର ଗର୍ଭରେ ଲୀନ ହେବ ବୋଲି ଗ୍ରାମବାସୀ ଆଶଙ୍କା ପ୍ରକାଶ କରିଛନ୍ତି।