ରାବାତ,୯।୯ : ଶୁକ୍ରବାର ବିଳମ୍ବିତ ରାତିରେ ମୋରୋକୋରେ ଭୟଙ୍କର ଭୂକମ୍ପ ଅନୁଭୂତ ହୋଇଥିଲା। ଏହି ଭୂକମ୍ପର ତୀବ୍ରତା ରିଚ୍ଟର ସ୍କେଲରେ ୬.୮ଥିଲା। ମୋରୋକୋର ଆଭ୍ୟନ୍ତରୀଣ ମନ୍ତ୍ରୀ କହିଛନ୍ତି ଏହି ଭୂକମ୍ପରେ ମୃତ୍ୟୁସଂଖ୍ୟା ୮୨୦ କୁ ବୃଦ୍ଧି ପାଇଛି। ସେହିପରି ଆହତଙ୍କ ସଂଖ୍ୟା ୬୭୨ ଛୁଇଁଛି। ମୃତାହତଙ୍କ ସଂଖ୍ୟା ବଢ଼ିବାର ଆଶଙ୍କା ରହିଛି। ଭଙ୍ଗାକୋଠାର ଆର୍ବଜନା ତଳୁ ଉଦ୍ଧାରକାରୀ ଦଳ ଜୀବନ ସନ୍ଧାନ ଜାରି ରଖିଛନ୍ତି।
ମୃତକଙ୍କ ମଧ୍ୟରୁ ଅଧାରୁ ଅଧିକ ଅଲ-ହାଜ ଏବଂ ତାରୁଦାଣ୍ଟ ପ୍ରଦେଶର। ଏହା ବ୍ୟତୀତ ମୋରୋକୋର ଓଆରଜାଜେଟ, ଚିଚୁଆ, ଅଜିଲାଲ ଏବଂ ୟୋସେଫିଆ ପ୍ରଦେଶରେ, ଏବଂ ମରାକେଶ, ଆଗାଦୀର ଏବଂ କାସାବ୍ଲାନଙ୍କା ଅଞ୍ଚଳରେ ମଧ୍ୟ ବହୁ ଲୋକଙ୍କ ମୃତ୍ୟୁ ଘଟିଛି। ଏହି ସ୍ଥାନରେ ଆହତଙ୍କ ସଂଖ୍ୟା ୩୨୯ ରେକର୍ଡ ହୋଇଥିବାବେଳେ ୫୧ ଜଣଙ୍କ ଅବସ୍ଥା ଗୁରୁତର ରହିଛି।
ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଭୂକମ୍ପରେ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ। ଭୂକମ୍ପ ବିଷୟରେ ସୂଚନା ଥିବା ମୋରୋକୋ ସଂଗଠନ ଏହି ଭୂକମ୍ପର ତୀବ୍ରତାକୁ ସାତରୁ ଅଧିକ ବୋଲି ବର୍ଣ୍ଣନା କରିଛି। ଆମେରିକାର ଜିଓଲୋଜିକାଲ ସର୍ଭେ ଅନୁଯାୟୀ ଏହି ଭୂକମ୍ପର କେନ୍ଦ୍ରସ୍ଥଳ ପର୍ଯ୍ୟଟନ ସହର ମାରାକେଶଠାରୁ ୭୧ କିଲୋମିଟର ଦକ୍ଷିଣ-ପଶ୍ଚିମ ଦିଗରେ ଭୂଗର୍ଭର୧୮.୫ କିଲୋମିଟର ଗଭୀରରେ ଥିଲା। ସ୍ଥାନୀୟ ସମୟ ରାତି ପ୍ରାୟ୧୧ଟା ୧୧ ସମୟରେ ଏଠାରେ କମ୍ପନ ଅନୁଭୂତ ହୋଇଥିଲା। କିଛି ସମୟ ପରେ, ଏହି ସ୍ଥାନଗୁଡିକରେ ଭୂକମ୍ପର ଆଫ୍ଟଶୋକ ମଧ୍ୟ ଅନୁଭୂତ ହୋଇଥିଲା, ଯାହାର ତୀବ୍ରତା ୪.୯ ମାପ କରାଯାଇଥିଲା।
