ରସୁଲପୁର,୧୩।୭(ଡି.ଏନ.ଏ.): ଯାଜପୁର ଜିଲାର ରସୁଲପୁର ବ୍ଲକ ଅଧୀନ ଯୋକଡ଼ିଆଠାରେ ୧୩୮ବର୍ଷ ପରେ ୨ୟ ବ୍ୟାରେଜ ନିର୍ମାଣ ହେବାର ପରିକଳ୍ପନା କରାଯାଇଛି। ଉକ୍ତ ବ୍ୟାରେଜ ନିର୍ମାଣ ପାଇଁ ଜଳସମ୍ପଦ ବିଭାଗ ପକ୍ଷରୁ ପ୍ରସ୍ତାବ ରଖାଯାଇଥିଲା। ବିଭାଗର ଏହି ପ୍ରସ୍ତାବକୁ ଏକପ୍ରକାର ମଞ୍ଜୁରୀ ମିଳିସାରିଛି। ଉକ୍ତ ପ୍ରକଳ୍ପ ନିର୍ମାଣ ସକାଶେ ନାବାର୍ଡରୁ ୨୫୦ କୋଟି ଟଙ୍କା ଆର୍ଥିକ ସହାୟତା ଯୋଗାଇ ଦିଆଯିବ ବୋଲି ଜାରକା ଜଳସେଚନ ବିଭାଗ ପକ୍ଷରୁ ସୂଚନା ମିଳିଛି। ଉକ୍ତ ବ୍ୟାରେଜ ନିର୍ମାଣ ପୂର୍ବରୁ ଧର୍ମଶାଳା ବିଧାୟକ ପ୍ରଣବ ବଳବନ୍ତରାଏ, କୋରେଇ ବିଧାୟକ ଅଶୋକ ବଳ ଓ ଜଳସେଚନ ବିଭାଗ ନିର୍ବାହୀ ଯନ୍ତ୍ରୀ ଧନେଶ୍ୱର ସାମଲ, ଉପନିର୍ବାହୀଯନ୍ତ୍ରୀ କାମଦେବ ଦାସ, ସହକାରୀ ଯନ୍ତ୍ରୀ ସୁବାସ ସାହୁ, ରସୁଲପୁର ତହସିଲଦାର ଜ୍ୟୋତିକାନ୍ତ ଭୁଜବଳ, ବିଡିଓ ଉମାକାନ୍ତ ପରିଡା ପ୍ରମୁଖ କ୍ଷେତ୍ର ପରିଦର୍ଶନ କରି ଏହାର ସ୍ଥିତାବସ୍ଥା ଦେଖିଛନ୍ତି। ଇଂରେଜମାନେ ନିର୍ମାଣ କରିଥିବା ବ୍ୟାରେଜ କ୍ରମଶଃ ଦୁର୍ବଳ ହୋଇଯିବା ସହ ତାର ଜଳ ଧାରଣ କ୍ଷମତା କମିଯାଉଛି। ନୂତନ ଜ୍ଞାନକୌଶଳରେ ନିର୍ମାଣ ହେବାକୁ ଥିବା ବ୍ୟାରେଜର ଜଳଧାରଣ କ୍ଷମତା ବୃଦ୍ଧି ପାଇବ। ନଦୀଜଳକୁ ନଦୀରେ ବୋହିବାକୁ ଦିଆ ନ ଯାଇ ତା’ର ଉପଯୋଗିତା ଉପରେ ଗୁରୁତ୍ୱ ଦିଆଯିବ ବୋଲି ବିଭାଗୀୟ ଯନ୍ତ୍ରୀ ସାହୁ ପ୍ରକାଶ କରିଛନ୍ତି।
୧୮୮୨ରେ ଇଂରେଜମାନେ ଏଠାରେ ବ୍ୟାରେଜ କରିଥିଲେ। ଯାଜପୁର ରୋଡ୍ ରେଲୱେ ଷ୍ଟେସନ ସହ ବ୍ୟାରେଜର ସଂଯୋଗ ଥିଲା। ଏହି ଜରିଆରେ ସହଜରେ ସାମଗ୍ରୀ ପରିବହନ ହୋଇପାରୁ ଥିଲା। ବ୍ୟାରେଜ ଉପରେ ଗମନାଗମନ ସୁବିଧା ରହିଥିଲା। ଏହା କ୍ରମଶଃ ଦୁର୍ବଳ ହୋଇଯିବାରୁ ବ୍ୟାରେଜଠାରୁ ୨୦୦ମିଟର ତଳକୁ ଆଉ ଏକ ପୋଲ ନିର୍ମାଣ କରାଯାଇଛି। ପୂର୍ତ୍ତ ବିଭାଗ ପକ୍ଷରୁ ୧୫ବର୍ଷ ତଳେ ଏହି ପୋଲି ନିର୍ମାଣ କରାଯାଇଥିଲା। ଏଠାରେ ହେବାକୁ ଥିବା ନୂତନ ବ୍ୟାରେଜଟି ପୁରୁଣା ବ୍ୟାରେଜ ଓ ନୂତନ ପୋଲ ମଧ୍ୟସ୍ଥଳରେ ହେବ ବୋଲି ବିଭାଗ ପକ୍ଷରୁ ସ୍ଥାନ ନିରୂପଣ କରାଯାଇଛି। ଏହି ସୂଚନା ସ୍ଥାନୀୟ ଅଞ୍ଚଳ ଜନସାଧାରଣଙ୍କୁ ଆନନ୍ଦିତ କରିଛି।
ପ୍ରକଳ୍ପ ପୂର୍ଣ୍ଣାଙ୍ଗ ହେଲେ ହାଇଲେଭଲ କେନାଲ-୨ର ପରିକଳ୍ପନାକୁ ସାକାର କରିବାରେ ସହାୟକ ହେବ। ଖରସ୍ରୋତାର ଯୋକଡ଼ିଆଠାରୁ ବାହାରି ଯାଜପୁର ବ୍ଲକର ରୁଢିଆଠାରେ ବୁଢା ନଦୀକୁ ସଂଯୋଗ କରୁଥିବା ଏହି କେନାଲରେ ବର୍ଷସାରା ଜଳ ପ୍ରବାହିତ ହୋଇପାରିବ। ନଦୀର ବନ୍ୟାକୁ ନିୟନ୍ତ୍ରଣ କରାଯାଇ ପାରିବ। କେନାଲରେ ଜଳ ପ୍ରବାହିତ ହେଲେ ଜିଲାର କୋରେଇ, ରସୁଲପୁର ଓ ଯାଜପୁର ବ୍ଲକ ଅଞ୍ଚଳର ଶହଶହ ହେକ୍ଟର ଚାଷ ଜମି ଜଳ ସେଚିତ ହୋଇପାରିବ। ବ୍ୟାରେଜ ଜରିଆରେ ଜଳଧାରଣ କରିବା ଦ୍ୱାରା ବ୍ରାହ୍ମଣୀ ନଦୀରେ ଅଧିକ ଜଳ ପ୍ରଭାବିତ ହୋଇପାରିବ। ଏସବୁ ବାଦ ଜିଲାର ଇସ୍ପାତ ନଗରୀ କଳିଙ୍ଗ ନଗରକୁ ଏହି ନଦୀରୁଜଳ ଯୋଗାଣ କରାଯାଉଛି। ଏଠାରେ ଥିବା ୧୦ରୁ ଊର୍ଦ୍ଧ୍ୱ କାରଖାନାକୁ ପ୍ରର୍ଯ୍ୟାପ୍ତ ପରିମାଣର ପାଣି ଯୋଗାଇ ସମ୍ଭବ ହୋଇପାରିବ। ଏଭଳି ଏକ ନିଷ୍ପତ୍ତିକୁ ସ୍ଥାନୀୟ ଅଞ୍ଚଳବାସୀ ସ୍ବାଗତ କରିଛନ୍ତି।