କାଳିଆପାଣି,୧୭ା୧୨(ଡି.ଏନ.ଏ.):ଯାଜପୁର ଜିଲା କାଳିଆପାଣି ଥାନା ଅଧୀନ କାଙ୍କଡ଼ପାଳ ଗ୍ରାମର ଜଣେ ଯୁବକ ଦ୍ବିତୀୟ ବିବାହ କରି ଏବେ ହରଡ଼ଘଣାରେ ପଡ଼ିଛନ୍ତି। ତାଙ୍କ ପ୍ରଥମ ସ୍ତ୍ରୀ ଦ୍ୱିତୀୟ ସ୍ତ୍ରୀଙ୍କୁ ଘରେ ପୂରାଇ ନ ଦେବରୁ ଦ୍ବିତୀୟ ସ୍ତ୍ରୀ ଥାନା ଦ୍ବାରସ୍ଥ ହୋଇଛନ୍ତି। ସମ୍ପୃକ୍ତ ଯୁବକ ହେଲେ ଗ୍ରାମର ଜଗବନ୍ଧୁ ନାୟକ(୩୦)। ସେ ୫ ବର୍ଷ ପୂର୍ବେ ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକର ବିରାଶାଳ ଗ୍ରାମରେ ବିବାହ କରିଥିଲେ। ସେମାନଙ୍କ ଗୋଟିଏ ଝିଅ ମଧ୍ୟ ରହିଛି। ତେବେ ଜଗବନ୍ଧୁ ୩ ବର୍ଷତଳେ ଜଗତ୍ସିଂହପୁର ଜିଲାର ରେଣୁକା ବାରିକ(୨୫)ଙ୍କ ସହ ପ୍ରେମ ସମ୍ପର୍କ ରଖିଥିଲେ। ଫଳରେ ଉଭୟ ୨୧ା୭ା୨୦୨୧ରେ କୁଜଙ୍ଗସ୍ଥିତ ଏକ ମନ୍ଦିରରେ ଓ ପରେ ରେଜିଷ୍ଟ୍ରି ବିବାହ କରିଥିଲେ। ଉଭୟ କିଛି ଦିନ ହେବ ସମ୍ବଲପୁର ଅଞ୍ଚଳରେ ରହିଥିଲେ। ତେବେ ରେଣୁକା ଶୋଇଥିବାବେଳେ ତାଙ୍କୁ ଏକାକୀ ଛାଡ଼ି ଜଗବନ୍ଧୁ ଫେରାର ହୋଇ ଯାଇଥିଲେ। ଶେଷରେ ନିରାଶ ହୋଇ ରେଣୁକୁ ଜଗବନ୍ଧୁଙ୍କ ଘରକୁ ଆସିଥିଲେ। ସେ ବୁଧବାର ସକାଳେ ପହଞ୍ଚତ୍ ଘଟଣା ସମ୍ପର୍କରେ ଜଗବନ୍ଧୁଙ୍କ ପ୍ରଥମ ସ୍ତ୍ରୀଙ୍କୁ ଜଣାଇଥିଲେ। ତେବେ ପ୍ରଥମ ସ୍ତ୍ରୀ ସବୁକଥା ଶୁଣିବା ପରେ ରେଣୁକାଙ୍କୁ ଘର ମୁଖ୍ୟ ଗେଟ୍ ବାହାରକୁ ବାହାର କରି ଗେଟ୍ବନ୍ଦ କରି ଫେରାର ହୋଇଯାଇଥିଲେ। ଫଳରେ ରେଣୁକା ଜଗବନ୍ଧୁଙ୍କ ଘର ସମ୍ମୁଖରେ ଧାରଣାରେ ବସିଥିବା ବେଳେ ଗୁରୁବାର ଥାନା ଦ୍ବାରସ୍ଥ ହୋଇଛନ୍ତି। ଏନେଇ ଥାନା ଅଧିକାରୀ ସୁଶାନ୍ତ କୁମାର ଦାସ କହିଛନ୍ତି, ଘଟଣାର ତଦନ୍ତ କରାଯାଇ ପଦକ୍ଷେପ ଗ୍ରହଣ କରାଯିବ।