ଭୁବନେଶ୍ୱର,୧୨।୧୦(ବ୍ୟୁରୋ): ଓଡ଼ିଶା ସଚିବାଳୟ ଷ୍ଟେନୋଗ୍ରାଫର ଓ ପିଏ ରୁଲ୍ସ-୧୯୯୭କୁ ସଂଶୋଧନ କରାଯାଇଛି। ନୂଆ ସର୍ଭିସ ରୁଲ୍ସରେ କେତେକ ପରବର୍ତ୍ତନ କରାଯାଇଛି। ଏଥିରେ ନିଯୁକ୍ତି ପାଇଁ ଥିବା ପାଠ୍ୟକ୍ରମ ପରିବର୍ତ୍ତନ ହେବା ସହ କମ୍ପ୍ୟୁଟର ଦକ୍ଷତା ଇତ୍ୟାଦିକୁ ମାପକାଠି ଭାବେ ଧରାଯାଇଛି। ଜୁନିୟର ଷ୍ଟେନୋଗ୍ରାଫରଙ୍କୁ ଏଣିକି ଜୁନିୟର ଏକ୍ଜିକ୍ୟୁଟିଭ ଆସିଷ୍ଟାଣ୍ଟ (ଜେଇଏ) କୁହାଯିବ। ଏହାଛଡ଼ା ଗ୍ରୁପ-ଡି କର୍ମଚାରୀଙ୍କୁ ଏହି ପଦବୀକୁ ପଦୋନ୍ନତି ଦେବାର ବ୍ୟବସ୍ଥା କରାଯାଇଛି। ପୋଲିସ ମିନିଷ୍ଟେରିଆଲ ଅଫିସରମାନଙ୍କ ଲାଗି ଏକ ସ୍ବତନ୍ତ୍ର ସର୍ଭିିସ ରୁଲ୍ସ ରହିଥିଲା। ଏବେ ସେମାନେ ଓଡ଼ିଶା ସିଭିଲ ସର୍ଭିସ୍ ରୁଲ୍ସ ୧୯୬୨ ଅଧୀନକୁ ଆସିବେ। ଏହାଦ୍ୱାରା ପୋଲିସ ବିଭାଗ ଏବଂ ଅନ୍ୟ ବିଭାଗର ଯେଉଁମାନେ ମିନିଷ୍ଟେରିଆଲ ଅଫିସର ଅଛନ୍ତି ସେମାନଙ୍କର ଗୋଟିଏ ପ୍ରକାର ପେ-ଷ୍ଟ୍ରକ୍ଚର ହେବ। ଓଡ଼ିଶା ଡିଷ୍ଟ୍ରିକ୍ଟ ପୋଲିସ ମିନିଷ୍ଟେରିଆଲ ସର୍ଭିସ ରୁଲ୍ସ -୨୦୨୧ କରାଯାଇଛି। ଏହି ନୂଆ ରୁଲ୍ସ ଦ୍ୱାରା ପୂର୍ବରୁ ଥିବା ମାଟ୍ରକ ଶିକ୍ଷାଗତ ଯୋଗ୍ୟତା ହଟାଇ ଯୁକ୍ତ ଦୁଇ ଏବଂ କମ୍ପ୍ୟୁଟର ଶିକ୍ଷାକୁ ନିଯୁକ୍ତିର ଏକ ଆଧାର ଭାବେ ଗ୍ରହଣ କରାଯାଇଛି। ଓଡ଼ିଶା କର୍ମଚାରୀ ବୀମା ଚିକିତ୍ସା ସେବା -୨୦୧୪ର ସଂଶୋଧନ କରାଯାଇଛି। ଇଏସ୍ଆଇ ମେଡିକାଲ ସର୍ଭିିସରେ ଯୁଗ୍ମ ନିର୍ଦ୍ଦେଶକ ଲେଭଲ-୧ ଏବଂ ଲେଭଲ-୨କୁ ଉଚ୍ଛେଦ କରାଯାଇଛି। ଯୁଗ୍ମ ନିର୍ଦ୍ଦେଶକ ପଦବୀ କେବଳ ଗୋଟିଏ ଲେଭଲରେ ରହିବେ। ଏହାଦ୍ୱାରା ଇଏସ୍ଆଇ ମେଡିକାଲ ଅଫିସରମାନଙ୍କର ପଦୋନ୍ନତିରେ ଉନ୍ନତି ହୋଇପାରିବ। ଓଡ଼ିଶା ବିଧାନସଭାର ସପ୍ତମ ଅଧିବେଶନର ସତ୍ରାବସାନକୁ କ୍ୟାବିନେଟ ଅନୁମୋଦନ କରିଛି।