ମୁମ୍ବାଇ: ବୁଧବାର ଭାରତୀୟ ପୁଞ୍ଜିବଜାର ପୁଣି ଥରେ ପ୍ରଭାବିତ ହୋଇଛି। ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ୬୨୭ ପଏଣ୍ଟ (୧.୨୫%) ହ୍ରାସ ହେବା ଫଳରେ ଏହା ୪୯,୫୦୯ ପଏଣ୍ଟ ସ୍ତରରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ ନିଫ୍ଟି ୧୫୪ ପଏଣ୍ଟ (୧.୦୪%) ନିମ୍ନରେ ରହିବା ଯୋଗୁ ଏହା ୧୪,୬୯୧ ପଏଣ୍ଟ ସ୍ତରକୁ ଖସିଛି। ବ୍ୟାଙ୍କିଙ୍ଗ୍ ଏବଂ ଫାଇନାନ୍ସିଆଲ ଷ୍ଟକ୍ କାରବାର ଖସିବା ଯୋଗୁ ଏଭଳି ସ୍ଥିତି ଦେଖାଯାଇଛି। ଏଚ୍ଡିଏଫ୍ସିର ଶେୟାର ସବୁଠାରୁ ବେଶି ପ୍ରଭାବିତ ହେବା ଯୋଗୁ ୪.୦୬% ଖସିଥିବା ନଜରକୁ ଆସିଛି। ସେହିଭଳି ପାଓ୍ବାର ଗ୍ରୀଡ୍, ଟେକ୍ ମହିନ୍ଦ୍ରା, ଆଇସିଆଇସିଆଇ ବ୍ୟାଙ୍କ ଏବଂ ଓଏନ୍ଜିସି ଭଳି କମ୍ପାନୀର ଶେୟାର ପ୍ରଭାବିତ ସ୍ଥିତିରେ ରହିଛି।
ସେନ୍ସେକ୍ସରେ ଆଇଟିସି, ବଜାଜ ଫିନ୍ସର୍ଭ, ହିନ୍ଦୁସ୍ଥାନ ୟୁନିଲିଭର, ଏସ୍ବିଆଇ, ଟିସିଏସ୍ ଭଳି କମ୍ପାନୀର ଶେୟାର କାରବାର ୧.୮୨% ବୃଦ୍ଧି ପାଇଛି। ଏନ୍ଏସ୍ଇ ପ୍ଲାଟ୍ଫର୍ମରେ ନିଫ୍ଟି ଫାଇନାନ୍ସିଆଲ ସର୍ଭିସ, ବ୍ୟାଙ୍କ, ଆଇଟି ଶେୟାର ୨.୦୧% ହ୍ରାସ ହୋଇଛି। ଘରୋଇ ବ୍ୟାଙ୍କ ଶେୟାରଗୁଡିକରେ ପ୍ରଫିଟ ବୁକିଂ ଏବଂ ଆଇଟି ଷ୍ଟକ୍ଗୁଡିକରେ ସେଲିଂ ପ୍ରେସର ଦେଖାଯାଇଛି। ଏସିଆର ଅନ୍ୟ ଶେୟାର ବଜାର ଯଥା ସାଂଘାଇ, ହଂକଂ, ସିଓଲ ଏବଂ ଟୋକିଓ ଭଳି ଶେୟାର ବଜାରଗୁଡିକ ମଧ୍ୟ ପ୍ରଭାବିତ ସ୍ଥିତିରେ ବନ୍ଦ ହୋଇଛି। ଏଭଳି ସ୍ଥିତିରେ ଫରେନ ପୋର୍ଟଫୋଲିଓ ନିବେଶକମାନେ ପୁଞ୍ଜି ବଜାରରୁ ନେଟ୍ ୭୬୯ କୋଟି ଟଙ୍କାର ଶେୟାର କ୍ରୟ କରିଛନ୍ତି।