ନୂଆଦିଲ୍ଲୀ:ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ବୁଧବାର କାରବାର ବେଶ୍ ଉନ୍ନତ ସ୍ତରରେ ରହିଛି। ଏହା ପ୍ରାୟ ୫୦୦ ପଏଣ୍ଟ ବଢି ପ୍ରଥମ ଥର ଲାଗି ୪୬ ହଜାର ପଏଣ୍ଟ ସ୍ତର ଟପିଛି। ବିଶ୍ୱ ବଜାରର ସ୍ଥିତି ଉନ୍ନତ ରହିବା ଏବଂ ବିଦେଶୀ ନିବେଶକଙ୍କ ପୁଞ୍ଜି ଆଗମନ ଯୋଗୁ ଷ୍ଟକ୍ ବଜାରରେ ଏଭଳି ସ୍ଥିତି ଦେଖିବାକୁ ମିଳିଛି। ୩୦ ଶେୟାର ବିଶିଷ୍ଟ ବିଏସ୍ଇ ୪୯୫ ପଏଣ୍ଟ ବା ୧.୦୯% ବଢ଼ିବା ଯୋଗୁ ୪୬,୧୦୪ ପଏଣ୍ଟ ସ୍ତରରେ ବନ୍ଦ ହୋଇଛି। ସେହିଭଳି ନିଫ୍ଟି କାରବାର ୧୩୬ ପଏଣ୍ଟ ବା ୧.୦୨% ଉଚ୍ଚରେ ରହି ୧୩,୫୨୯ ସ୍ତରରେ ରହିଛି।
ବିଏସ୍ଇରେ ଭଲ କାରବାର କରିଥିବା କମ୍ପାନୀ ମଧ୍ୟରେ ଏସିଆନ ପେଣ୍ଟ, କୋଟାକ ମହିନ୍ଦ୍ରା ବ୍ୟାଙ୍କ, ଏଚ୍ଡିଏଫ୍ସି ବ୍ୟାଙ୍କ, ଇନ୍ଫୋସିସ୍, ଆକ୍ସିସ ବ୍ୟାଙ୍କ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ ରହିଛି। ଏହି କମ୍ପାନୀଗୁଡିକର ଶେୟାର କାରବାର ପ୍ରାୟ ୩.୫୯% ଊର୍ଦ୍ଧ୍ୱରେ ରହିଛି। ନିଫ୍ଟିରେ ମିଡିଆ ଶେୟାର କାରବାର ୩.୭୭% ଉଚ୍ଚରେ ରହିଛି। ବିଶ୍ୱ ବଜାରକୁ ନଜରରେ ରଖି ନିବେଶକ ନିବେଶ କରୁଥିବାରୁ ଏହାର ଲାଭ ଭାରତୀୟ ଶେୟାର ବଜାରକୁ ମିଳିଛି ବୋଲି ରିଲାଏନ୍ସ ସିକ୍ୟୁରିଟିଜର ଷ୍ଟ୍ରାଟେଜି ମୁଖ୍ୟ ବିନୋଦ ମୋଦି କହିଛନ୍ତି। ବିଭିନ୍ନ କ୍ଷେତ୍ରରେ ବାଣିଜି୍ୟକ କାର୍ଯ୍ୟକଳାପ ଟ୍ରାକ୍କୁ ଫେରୁଛି। କମ୍ପାନୀଗୁଡିକର ଲାଭରେ ମଧ୍ୟ ପରିବର୍ତ୍ତନ ଆସିଛି। ଏହା ନିବେଶକଙ୍କ ମନୋବଳ ବଢାଇଛି। ଏହାବାଦ ବିଦେଶୀ ନିବେଶକ ଭାରତୀୟ ଶେୟାର ବଜାରରେ ଏବେ ନିବେଶ ବଢାଉଥିବା ଦେଖାଯାଇଛି।
ବିଦେଶୀ ନିବେଶକମାନେ ୨୯୦୯ କୋଟି ଟଙ୍କାର ଶେୟାର କ୍ରୟ କରିଛନ୍ତି। ଭାରତରେ କୋଭିଡ୍ ସଂକ୍ରମଣ ଏବେ ହ୍ରାସ ହେଉଥିବା ବେଳେ ଟିକାକରଣ ନେଇ ସରକାର ସଜବାଜ ହେଉଛନ୍ତି। ଏହାର ପ୍ରଭାବ ମଧ୍ୟ ପୁଞ୍ଜିବଜାର ଉପରେ ପଡିଥିବା କୁହାଯାଉଛି।