ଭୋପାଳ: ମଧ୍ୟପ୍ରଦେଶର ରାଜଧାନୀ ଭୋପାଳରୁ ଏକ ଅଜବ ମାମଲା ସାମ୍ନାକୁ ଆସିଛି। ଏଠାରେ ସାତଜଣ ବର ଏକାଠି ପୋଲିସ ଷ୍ଟେଶନରେ ପହଞ୍ଚିଥିଲେ। ଏପରିକି ସେମାନଙ୍କ ଅଭିଯୋଗ ସମାନ ରହିଥିଲା। ବିବାହ ପାଇଁ ସେମାନେ ପହଞ୍ଚିଥିଲେ ହେଁ ଘଟଣାସ୍ଥଳରେ ବଧୁ ଏବଂ ତାଙ୍କର ପରିଜନ ନ ଥିବା ନେଇ ସେମାନେ କହିଥିଲେ। ପୋଲିସ ସମସ୍ତଙ୍କ କାହାଣୀ ଶୁଣିବା ପରେ ଚକିତ ହୋଇଯାଇଥିଲା। ପରେ ସେମାନେ ଠକାମୀର ଶିକାର ହୋଇଥିବା ନେଇ ମାମଲା ରୁଜୁ କରାଯାଇ ତଦନ୍ତ କରିଥିଲା।
ଘଟଣାଟି ଏପରି। ଏକ ଅନୁଷ୍ଠାନ ଯୁବକମାନଙ୍କୁ ବିବାହ କରିବା ପାଇଁ ଯୁବତୀଙ୍କୁ ଭେଟାଇବା ଏବଂ ରେଜିଷ୍ଟ୍ରେଶନ ନିମନ୍ତେ ୨୦ ହଜାର ଟଙ୍କା ଲେଖାଏ ନେଇଥିଲା। ସେମାନଙ୍କ ବିବାହ ଧୁମ୍ଧାମ୍ରେ ହେବ ବୋଲି କୁହାଯାଇଥିଲା। ସେହିଭଳି ଯୁବତୀମାନଙ୍କ ପରିବାରକୁ ଫସାଇଥିଲା। ସେମାନେ ବିଶ୍ୱାସ କରିବା ପରେ ଯୁବକ ବିବାହ କରିବାକୁ ମନା କଲେ ବୋଲି କୁହାଯାଇଥିଲା। ଏଭଳିସ୍ଥିତିରେ ଭିଣ୍ଡର ଜଣେ ବ୍ୟକ୍ତି ବ୍ୟାଣ୍ଡବାଜା ଧରି ବଧୂଙ୍କ ଘରେ ପହଞ୍ଚିବା ବେଳକୁ ସେଠାରେ ତାଲା ପଡ଼ିଥିବା ଦେଖିବାକୁ ମିଳିଥିଲା। ଏପରିକି ବିବାହ କରିବାକୁ କହିଥିବା ଉକ୍ତ ସଂସ୍ଥାର କୌଣସି ଅଫିସ ମଧ୍ୟ ତାଙ୍କୁ ମିଳି ନ ଥିଲା। ଶେଷରେ ସେ ପୋଲିସ ଷ୍ଟେଶନରେ ଅଭିଯୋଗ କରିବାକୁ ପହଞ୍ଚିଥିଲେ। ହେଲେ ପୂର୍ବରୁ ସେଠାରେ ଉପସ୍ଥିତ ୬ଜଣଙ୍କ ସହ ସମାନ ଘଟଣା ଘଟିଥିବା ଜାଣି ସେ ଚିନ୍ତିତ ହୋଇଯାଇଥିଲେ।
ତେବେ ଠକାମୀର ଶିକାର ଯୁବକମାନଙ୍କ କହିବା ମୁତାବକ, ତାଙ୍କୁ ବିବାହ କରାଇଦେବାକୁ କହି ୨୦ ହଜାର ଟଙ୍କା ନିଆଯାଇଥିଲା। ସେମାନେ ବିବାହ ଦିନ ପହଞ୍ଚିବା ପରେ ସେଠାରେ କେହି ନ ଥିଲେ। ଦିଆଯାଇଥିବା ମୋବାଇଲ ନମ୍ବରରେ ଯୋଗାଯୋଗ କରିବାକୁ ଚେଷ୍ଟା କରିଥିଲେ ହେଁ ସବୁ ବନ୍ଦ ଥିଲା। ପୋଲିସ ଘଟଣାର ତଦନ୍ତ କରିବା ପରେ ଏହା ପଛରେ ଏକ ବଡ଼ ଗ୍ୟାଙ୍ଗ ଥିବା ଜାଣିବାକୁ ପାଇଛି। ସେମାନେ ଗରିବ ଝିଅମାନଙ୍କୁ ସ୍ବପ୍ନ ଦେଖାଇ ଭଲ ଘରେ ବିବାହ କରିବେ ବୋଲି କହୁଥିଲେ। ସେହିଭଳି ବିବାହ ହୋଇପାରୁ ନ ଥିବା ପୁଅଙ୍କୁ ମଧ୍ୟ ଜଡ଼ିତ କରୁଥିଲେ। ଏହି ଲୋକମାନେ ବସ୍ଷ୍ଟାଣ୍ଡ ନଚେତ ଅନ୍ୟାନ୍ୟ ସର୍ବସାଧାରଣ ସ୍ଥାନରେ ବିବାହର ଲିଫ୍ଲେଟ୍ ଲଗାଇଦେଉଥିଲେ। ସେଠାରୁ ଠିକଣା ନେଇ ଯିଏ ଯୋଗାଯୋଗ କରୁଥିଲା ଫସୁଥିଲା। ପରେ ସେମାନେ ବଡ଼ ଧରଣର ଠକେଇର ସମ୍ମୁଖିନ ହେଉଥିବା ପୋଲିସ କହିଛି।
