ଯାଜପୁର ଟାଉନ,୧୯ା୧୦(ଡି.ଏନ୍.ଏ.): ଯାଜପୁର ସହରରେ ଗଞ୍ଜେଇ ଖୁଲମଖୁଲା ବିକ୍ରି ହେଉଛି। କମ ପରିଶ୍ରମରେ ଅଧିକ ଲାଭ ଆଶାରେ ଯୁବପିଢ଼ି ଗଞ୍ଜେଇ ଚୋରା ବ୍ୟବସାୟ କରୁଥିବା ବେଳେ ସାଙ୍ଗସାଥିଙ୍କୁ ଏହାକୁ ବିକ୍ରି କରୁଛନ୍ତି। ଫଳରେ ସହରର ଅନେକ ଯୁବପିଢ଼ି ଗଞ୍ଜେଇ ନିଶା କବଳରେ ପଡମୁଛନ୍ତି। ଯାଜପୁର ସହରର ବାଳାଶ୍ରମ ପଡ଼ିଆ, ବଲ୍ଲଭି ଘାଟ, ଦେବୀଗଡ଼ା ଘାଟ, ଦଶାଶ୍ୱମେଧ ଘାଟ, ଜଗନ୍ନାଥ ମନ୍ଦିର ଓ ବରାହ ରିଂରୋଡ୍ ଆଦି ସ୍ଥାନରେ ଅନେକ ସମୟରେ ବହୁ ଯୁବକ ଏକାଠି ଗଞ୍ଜେଇ ସେବନ କରୁଥିବା ଦେଖାଯାଇଛି। ସିଗାରେଟରେ ଗଞ୍ଜେଇ ପୁରାଇ ସହରର ବିଭିନ୍ନ ପାନ ଦୋକାନ, ଜଳଖିଆ ଦୋକାନ, ଚା’ ଦୋକାନରେ ବିକ୍ରି କରାଯାଉଥିବା ନଜିର ରହିଛି। ବିଶେଷ କରି ୧୫ ରୁ ୨୦ ବର୍ଷର ପିଲାମାନେ ଏହି ନିଶା କବଳରେ ପଡିଛନ୍ତି। ଯାଜପୁରସହର ସଂଲଗ୍ନ ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଷୋଳମପୁର ଗ୍ରାମରୁ ଗଞ୍ଜେଇ ଆସୁଥିବା ଶୁଣିବାକୁ ମିଳୁଛି। ଅବକାରୀ ବିଭାଗ ଓ ପୋଲିସ ପ୍ରଶାସନ ଚୋରା ବ୍ୟବସାୟୀଙ୍କ ଉପରେ ନଜର ରଖୁ ନ ଥିବା ବେଳେ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯାଉ ନ ଥିବାରୁ ସହରରେ ଧୀରେଧୀରେ ଗଞ୍ଜେଇ ବିକ୍ରି ବଢିବାରେ ଲାଗିଛି। ଏ ସମ୍ପର୍କରେ ଅବକାରୀ ବିଭାଗ ଇନ୍ସପେକ୍ଟର ସ୍ବପ୍ନାରାଣୀ ସାହୁଙ୍କୁ ପଚାରିବାରେ ସେ କୌଣସି ମନ୍ତବ୍ୟ ଦେବାକୁ ମନା କରିଦେଇଛନ୍ତି। ଯାଜପୁର ଥାନା ଭାରପ୍ରାପ୍ତ ଅଧିକାରୀ ମାନସ ରଞ୍ଜନ ଚକ୍ରଙ୍କୁ ପଚାରିବାରେ ଗଞ୍ଜେଇ ବିକ୍ରି କଥାକୁ ସ୍ବୀକାର କରିବା ସହ ଅଧିକାଂଶ ସମୟରେ ଚଢ଼ାଉ କରାଯାଇ ମାମଲା ରୁଜୁ କରାଯାଉଛି ଏବଂ ଆଗାମୀ ଦିନରେ ଏହାକୁ ବ୍ୟାପକ କରାଯିବ ବୋଲି କହିଛନ୍ତି।